வெள்ளி, 12 மார்ச், 2021

உலகப் பகுத்தறிவாளர் - ஏரியன் ஸெரீன்

லண்டன் பேருந்து விளம்பரப் புகழ் ஏரியன் ஸெரீன்

உலகப் பகுத்தறிவாளர்களிலேயே தனித்த சிறப்பான இடம் தந்தை பெரியாருக்கு உண்டு. ஏனைய நாட்டுப் பகுத்தறிவாளர்கள் அனைவருமே தங்களின் கருத்துகளை ஏடுகளில் எழுதினர். நூல்களில் பதிவு செய்தனர். மண்டபங்களில் கூட்டப்பட்ட சிறு கூட்டத்தினர் மத்தியில் விளக்கினர். இவை அத்தனையையும் செய்த பெரியார், தம் கொள்கைகளை விளக்கி ஆயிரக்கணக்கில் கூடிய மக்கள் மத்தியில் பேசினார். கொள்கைகளைப் பரப்புவதற்கான இயக்கத்தைத் தோற்றுவித்தார். தம் காலத்திற்குப் பிறகும் கொள்கைப் பரப்பல் நடைபெற்றிடும் வகையில் சிறப்பான ஏற்பாடுகள் செய்தார்.

அதன் விளைவாக அவர் மக்கள் மனதில் நீங்காத இடம் பெற்றிருக்கிறார். அவரின் கருத்துகள் இன்றளவும் புதிய புதிய பற்றாளர்களையும் பின்பற்றுவோர்களையும் கொண்டிருக்கிறது. இந்நிலை அமெரிக்காவின் இங்கர்சாலுக்குக் கிடைக்காதது. இங்கிலாந்தின் சார்லஸ் பிராட்லாவும், பெர்ட்ரண்ட் ரசலும் பெறாதது.

மற்ற மற்ற பகுத்தறிவாளர்களுக்கும் கிட்டாத நிலை. ஆனாலும்கூட, அந்நாட்டு மக்கள் படித்தவர்களாகவும், சிந்திப்பவர் களாகவும் இருக்கின்ற காரணத்தால் பகுத்தறிவின் பயனை உணர்ந்தும் செயல்பட்டும் வருகின்றனர். ஆனாலும்-கூட, மவுடிகப்போக்கு மதப்பற்றும் வெறியும் வெகுவாக மண்டிக் கிடக்கிறது என்பதை மறுப்பதற்கில்லை.

மேலை நாடுகளில்...

கிறித்துவர்களாக இருந்தால்தான் கதிமோட்சம், இல்லையேல் கடும் நரகம்தான், கடைசிவரை எரியும் நெருப்பில் எரிந்து கொண்டேதான் இருக்க வேண்டும் என்கிற பரப்புரை கிறித்துவ மத நிறுவனங்களால் செய்யப்படுகிறது. யேசு இருக்கிறார், யேசு ஜீவிக்கிறார், யேசு அழைக்கிறார், யேசு குணப்படுத்துகிறார் என்று புளுகும் மதப் பிரச்சாரகர்கள் பில்லி கிரகாம் போன்றவர்கள் அங்கும் வளர்ந்து கொழித்துக் கொண்டிருக்கிறார்கள். நம்மூர் டிஜிஎஸ் தினகரன் கோடிகோடியாகப் புளுகியே சம்பாதித்ததைப்போல சம்பாதித்துக் கொண்டிருக்கிறார்கள். அதற்கான விளம்பரங்கள், பரப்புரைகள் ஏராளம். அவற்றோடு ஒப்பிட்டால் பகுத்தறிவுப் பரப்புரையோ, விளம்பரமோ ஒன்றுமே நடைபெறுவதில்லை என்றே கூறலாம். அதனைச் செய்திடும் ஆர்வமுள்ள அமைப்பு இருந்தாலும் எடுத்துச் செய்திடும் தொண்டர்கள் இல்லை என்பது மிகவும் கசப்பான உண்மையாகும்.

தூண்டிவிட்ட சிறு பொறி

கிறித்துவ மதத்தின் பெருமை பேசும், மிரட்டல் தொனியில் அமைந்த வாசகங்களை விளம்பரம் செய்த ஒரு மதத் தொண்டர் அமைப்பின் செயல் லண்டன் நகரின் பகுத்தறிவாளர்களிடையே சிறு பொறியைக் கிளப்பியது. மக்கள் நாள்தோறும் பயன்படுத்தும் பேருந்துகளில் விளம்பரப் பதாகைகளை வைத்தது. கிறித்துவராக இல்லாதவர்கள் நரகத்தில்தான் உழல வேண்டும், எரியும் நெருப்பு ஏரியில் கடைசிவரை எரிந்து கொண்டுதான் கிடக்க வேண்டும் என்கிற வாசகங்களை அதில் எழுதி வைத்தது.

சொர்க்கலோகங்களைப் பட்டியலிட்டுத் தத்தம் மதங்களைப் பின்பற்றுமாறு தூண்டில் போடுவதென்பது உலகம் முழுக்க எல்லா மதங்களுக்குமே வாடிக்கை. இந்துவாக இல்லாவிட்டால் வைகுந்தம் இல்லை, கிறித்துவராக இல்லாவிட்டால் சொர்க்கம் இல்லை, இசுலாமியனாக இல்லாவிட்டால் சுவனம் இல்லை என்ற வகையில் ஆசை காட்டல்கள் ஒரு பக்கம். மறு பக்கத்தில் அப்படி இல்லாவிட்டால் நரகத்தீதான் என எல்லா மதங்களுமே மிரட்டல்கள்தான், பிளாக் மெயில்கள்தான். இத்தகைய பிளாக் மெயிலை விளம்பரம் செய்த காரணத்தால்தான் அதே லண்டன் நகரப் பேருந்துகளில் பகுத்தறிவு வாசகங்களை எழுதி விளம்பரம் செய்ய வேண்டும் என்கிற எண்ணம் ஏற்பட்டது.

இத்தகைய சிந்தனைப் பொறியில் தூண்டப்பட்டுச் செயலாற்றியவர் 23 வயதே ஆன ஏரியன் ஷெரீன் எனும் இளம்பெண். கிறித்துவத்தின் நூற்றுக்கணக்கான பிரிவுகளில் ஒன்றான UNITARIAN UNIVERSALIST எனும் மதத்தைச் சார்ந்த தந்தைக்கும் பார்சி மதத் தாய்க்கும் பிறந்த பெண். 03-.07.1980இல் இங்கிலாந்தில் பிறந்து தம் 21 வயதில் இதழாளராகப் பணியைத் தொடங்கி நகைச்சுவை எழுத்தாளராக விளங்கி வருபவர். பேருந்துகளில் பகுத்தறிவுக் கருத்துகளை விளம்பரம் செய்த பெரும் காரியத்தின் கர்த்தா. அதன்மூலம் அய்ரோப்பிய நாடுகளில் அதிர்ச்சி அலைகளை எழும்பச் செய்தவர். வானொலி, தொலைக்காட்சிகளில் நிகழ்ச்சி நடத்துபவர். கடவுள் ஒரு பொய் நம்பிக்கை எழுதிய ரிச்சர்டு டாகின்ஸ் நடத்திய தொலைக்காட்சி நிகழ்ச்சி போலவே, இவரது நிகழ்ச்சிகளும் வரவேற்பைப் பெற்றன என்பது இளவயதுக்காரரான இவரது பெரும் சாதனைதான்.

எதிர்வினைக் கடவுள் மறுப்பு

ஒவ்வொரு வினைக்கும் எதிர்வினை உண்டு எனும் இயற்கை விதிக்கேற்ப, மதப்பிரச்சாரகர் வைத்த விளம்பரப் பதாகை - பகுத்தறிவுப் பிரச்சாரப் பதாகை வைத்திடும் எண்ணத்தை இவருக்குள் ஏற்படுத்தியது. சும்மா கிடந்த சங்கை ஊதிக் கெடுத்த கதையாக ஆகிவிட்டது. லண்டன் மாநகரில் பயணிக்கும் பேருந்துகளில் 30 பேருந்துகளில் மட்டும் விளம்பரம் செய்து நான்கு வாரங்கள் மட்டும் விளம்பரம் செய்வதற்கு 5,500 பவுண்ட் பணம் தேவைப்படும் என மதிப்பிட்டார். இத்தொகையை வசூலிப்பதற்கு பிரிட்டிஷ் மனித நேயச் சங்கம் (BRITISH HUMANIST ASSOCIATION) உதவியது. இந்த அளவுக்குத் தொகையை வசூலித்துவிட்டால், அதே அளவு தொகையைத் தனிப்பட்ட முறையில் தாம் நன்கொடையாகத் தருவதாக ரிச்சர்டு டாகின்ஸ் அறிவித்து ஊக்கப்படுத்தினார்.

அமோகமாக ஆதரவு

நன்கொடை வசூல் தொடங்கிய சில நாள்களிலேயே (21-_10_2008) 11,000 பவுண்ட்கள் வசூலாகிவிட்டது. அதன்பிறகு மூன்றே நாள்களில் அதாவது 24_10-_2008இல் வசூலான தொகை ஒரு லட்சம் பவுண்ட்கள் ஆகும். வசூலுக்கான இறுதிநாளான 11-04-2009 முடிவில் வசூலாகியிருந்த தொகை 1,53,516 பவுண்ட்கள் என்றால் பிரிட்டன் மக்கள் இதன் அவசியத்தை எந்த அளவுக்கு உணர்ந்தார்கள் என்பதைப் புரிந்து கொள்ளலாம்.

800 பேருந்துகளில் கடவுள் மறுப்பு

30 பேருந்து போதும் எனத் திட்டமிடப்பட்ட தனது, 6-1-2009 இல் தொடக்க நாளன்று லண்டன் மாநகரத்தில் மட்டுமல்லாது பிரிட்டன் முழுவதுமாக 800 பேருந்துகளில் எனச் செயல்படுத்தப்பட்டது. அத்தோடு, புகழ்பெற்ற நாத்திகர்களின் கருத்துகளை பதாகைகளில் எழுதி பாதாள ரயில் நிலையங்களில் வைத்தனர். லண்டன் நகரின் ஆக்ஸ்போர்டு தெருவிலும் மத்திய லண்டனிலும் மிகப் பிரம்மாண்டமான LCD திரைகள் அமைத்து இவ்வாசகங்களை ஒளிபரப்பிக் கொண்டே இருந்தனர்.

பெரும்பாலும், கடவுள் இல்லை. எனவே கவலையை விடு; வாழ்க்கையை அனுபவி (THERE’S PROBABLY NO GOD. NOW STOP WORRYING AND ENJOY YOUR LIFE) என்பவைதான் வாசகங்கள். வாசகங்கள் படித்தவர்களின் மனதில் பெரும்மாற்றத்தை ஏற்படுத்தியது என்றாலும் 326 பேர்கள் வாசகங்களைப் பற்றிப் புகார்கள் கூறியிருந்தனர். விதிமுறைகளுக்கு முரணானது எனும் கருத்துப்பட கிறித்துவர் குரல் (CHRISTIAN VOICE) எனும் அமைப்பின் புகார் இருந்தது. ஆனால், விதிமீறல் எதுவும் இல்லை என்று தொடர்புடைய துறை அறிவித்துவிட்டது.

பிஷப் எதிர்ப்பு

வழக்கமாக எதிர்பார்த்ததைப் போலவே. கான்டர்பரி ஆர்ச் பிஷப் ஆக இருந்த ஜியார்ஜ் காரி என்பவரும் பீட்டர் பிரைஸ் எனும் BISHOP OF BATH AND WELLS பிரிவின் பிஷப்பும் எதிர்ப்புத் தெரிவித்தனர். வாசகங்கள் எழுதப்பட்ட பேருந்தை ஓட்டவேண்டிய ஓட்டுநர் ஒருவர் மறுத்துவிட்ட நிகழ்ச்சியும் நடந்தது. வேறு ஓட்டுநர் பேருந்தை ஓட்டிச் சென்றாரே தவிர, வாசகம் அகற்றப்படவில்லை. நிச்சயமாக கடவுள் இல்லை என்றே போட்டிருக்கலாம் என்று நாத்திகர்கள் கூறினர். என்றாலும், பெரும்பாலும் எனும் சொல் சேர்க்கப்பட்ட காரணத்தால் விளம்பர விதிமுறைகள் எதுவும் மீறப்படவில்லை என்பதால் நாடு முழுவதும் அது அனுமதிக்கப்பட்டது என்பதைப் புரிந்துகொள்ள வேண்டும்.

மறுப்புக்கு எதிர்ப்பு மடத்தனம்

மதவெறியர்கள் சும்மா இருப்பார்களா? எதிர் விளம்பரம் போட்டார்கள். நிச்சயமாகக் கடவுள் உண்டு. கிறித்துவக் கட்சியில் சேருவீர்! வாழ்க்கையை அனுபவிப்பீர் என்று ஒரு விளம்பரம். பைபிளில் வரும் முட்டாள்கள் தம் மனதுக்குள் கடவுள் இல்லை என்று சொல்லிக் கொள்வர் என்பது மற்றொரு விளம்பரம். கடவுள் உண்டு, நம்புங்கள். கவலைப்படாமல் வாழ்க்கையை அனுபவியுங்கள் என்பது இன்னொரு விளம்பரம். தந்தை பெரியார் 1967 இல் கடவுள் மறுப்பு வாசகங்களைத் தந்து அதனைப் பொதுஇடத்தில் கல்வெட்டாகப் பதிவு செய்த சம்பவம் திருச்சி தேவர்ஹால் அருகில் நடந்தது.

எதிர்வினை என்ற பெயரில் பக்தர்கள் இல்லை என்பதற்குப் பதில் உண்டு என்று எழுதினார்கள். கடவுளைக் கற்பித்தவன் முட்டாள் என்ற பெரியாரின் வாசகத்திற்குப் பதில், கடவுளைக் கற்பித்தவன்அறிவாளி என்று எழுதி வைத்தனர். அந்த இடத்தில் கூட்டம் போட்டுப் பேசிய தந்தை பெரியார் கூறினார், கடவுள் தானாகத் தோன்றியதல்ல, முட்டாள் மனிதனால் கற்பிக்கப்பட்டது என்று நான் கூறினால், இல்லை, இல்லை அறிவாளி மனிதனால் கற்பிக்கப்பட்டது எனக் கூறிகிறீர்களே! அட முட்டாள்களே, கடவுள் கற்பிக்கப்பட்ட கற்பனையான ஒன்று என்பதை நீங்களே ஒத்துக் கொண்டுவிட்டீர்களே! எனக் கூறினார். அதேபோலத்தான் 40 ஆண்டுகளுக்குப் பிறகும் பக்தர்கள் பாமரத்தனமாகவே இருக்கின்றார்கள்.

- தொடரும்...

"ஓ" மறப்போம், மன்னிப்போம் (ஓபரா-4)

"ஓ" மறப்போம், மன்னிப்போம்

- சோம.இளங்கோவன்

பேரறிஞர் அண்ணா அவர்களின் வார்த்தைகளில் சில முத்திரைகளாகப் பதிந்து விட்டன. அதில் ஒன்றுதான் "மறப்போம், மன்னிப்போம்" என்ற முத்திரை. இன்று விஞ்ஞானப் பூர்வமாக ஆராய்ச்சியில் ஓ பதிவிடுகின்றார் " மறப்போம், மன்னிப்போம், மகிழ்வுடன் வாழ்வோம்" என்று.

ஓப்ரா தனது தொலைக்காட்சி நிகழ்ச்சிகளுடன் சேர்ந்து வானொலி மற்றும் "ஓ" என்ற இதழும் நடத்துகின்றார். அதில் பல கட்டுரைகள் வாழ்க்கைக்கு வழிகாட்டிகளாகத் திகழ்கின்றன. மானமிகு ஆசிரியர் கி. வீரமணி அவர்கள் எழுதும் வாழ்வியல் சிந்தனைகள் போன்று, நமது வாழ்க்கைக்கு மிகவும் முக்கியமான வழிமுறைகள் பற்றி வெளியிடுவார். அதிலே சிறந்த ஒன்றுதான் யாரை வேண்டுமானாலும் மன்னிக்கலாம், உங்கள் உடல்நலத்துக்காக! என்ற கட்டுரை.

இதை அமெரிக்க நியூயார்க் சிரக்குயூசு பல்கலைப் பேராசிரியை ஃகேரியட் பிரவுன் எழுதியுள்ளார். அவரும் சிலரும் ஒரு சிறு கூட்டத்தில் உள்ளனர். அங்கே ஒரு ஆராய்ச்சியாளரைப் பார்க்கின்றனர் தங்கள் மன்னிப்புத் தேடுதலுக்காக. அவருக்குப் பல ஆண்டுகளாக அவரது அம்மா மீது கடுங் கோபம். அதை மாற்ற முயலுகின்றார்.

அமெரிக்கா கலிபோர்னியாவில் மிகவும் போற்றப்படும் பல்கலைக்கழகம் ஸ்டான் போஃர்டு பல்கலைக்கழகம். சான்பிரான்சிஸ்கோ அருகே பேலோஆல்ட்டோ என்ற அருமையான நகரிலே அற்புதமான சூழலிலே உள்ள பல்கலைக்கழகம். அதிலே பல வாழ்வியல் ஆராய்ச்சிகள் நடக்கின்றன. அதிலே ஒன்றுதான் " மன்னிப்பு மய்யம்" எனும் ஆராய்ச்சித் திட்டம். அதிலே புகழ் வாய்ந்த பேராசிரியர் முனைவர் பிரட் லசுகின். இவர் 20 ஆண்டுகளுக்கு மேலே இதிலே ஆராய்ச்சிகள் செய்துள்ளார்.

அயர்லாந்தில் நடந்த வன்முறைகளிலே, போரிலே பாதிக்கப்பட்ட இரு சாரரையும் தனித்தனியே சந்தித்துள்ளார். இதுபோன்ற ஆயிரக்கணக்கானவர்களைப் பார்த்து ஆராய்ந்துள்ளார். நியூயார்க் இரட்டைக் கோபுர இடிப்பில் பாதிக்கப்பட்டவர்களை ஆராய்ந் துள்ளார்.

மனிதருக்கு இயற்கையாக உண்டாகும் உணர்வுகள்தாம் கோபம், அதிலே தோன்றும் வெறி, பழிவாங்கும் மனப்பான்மை போன்றவை மிகவும் ஆழமானவை. பலருக்குப் பல அனுபவங்கள். மற்றவர்கள் செய்த துரோகத்தை, தந்த வேதனையை, மனவருத்தத்தை மறக்க முடியாத வாழ்க்கை. மன அழுத்தமும், மன உளைச்சலும் இல்லாத மனிதரைக் காண முடியுமா? அது நம்மை எப்படித் தாக்குகின்றது? நமது ரத்த அழுத்தத்தை ஏற்றுகின்றது. தூக்கமின்மை, வருத்தம், கோபம் என்று மன அமைதியைக் குலைக்கின்றது. நம்முள்ளே ஒரு புற்று நோய் போல அரித்துத் தின்கின்றது !

இத்தாலியில் லிசா (லிசா சாய்ந்த கோபுரம் உள்ள நகரந்தான்) பல்கலைக்கழகத்திலே மூளை ஆராய்ச்சி செய்து உயிரோட்ட ஸ்கேன் எம்.ஆர்.அய். எடுத்துள்ளார்கள். அதிலே மூளையின் எந்தெந்த பாகங்கள் கோபம், வருத்தம் போன்ற உணர்வுகள் வரும்போது துடிக்கின்றன என்பது தெளிவாகப் பிடிக்கப்பட்டுள்ளது. சிலருக்கு "மண்டையே வெடித்து விடும்" என்கின்றார்களே, அது உண்மைதான்.

இந்தக் கட்டுரையாளர் பேராசிரியர் பிரட் லசுகின் அவர்களின் மன்னிப்பு மய்ய நிகழ்ச்சியில் கலந்து கொள்கின்றார். எங்கோ விளையாடப் போவது போன்ற காக்கி உடுப்பு. ஆடம்பரமே இல்லாதவர் ஒருவருடைய கதை, அய்ந்து வயதிலிருந்தே தந்தையால் மிகுந்த தொந்தரவிற்கும், பாலியல் வன்முறைக்கும் ஆளானவர். நான் எப்படி மன்னிக்க முடியும் என்று கோபத்திலும் வேதனையிலும் துடிக்கின்றார். பேராசிரியர் அனைத்து உணர்ச்சிகளையும் எழுதச் சொல்கின்றார். எழுதி முடித்ததும் இதில் எது உனக்கு உதவி செய்யப் போகிறது, கெடுதல் செய்யப் போகிறது என்று குறிக்கச் சொல்கின்றார். அனைத்துமே மன அழுத்தம், ரத்த அழுத்தம், படபடப்பு உண்டாக்கக் கூடியவைதான். பேராசிரியர் சொல்கின்றார்:

மன்னிப்பு உன்னைத் துன்புறுத்தியவருக்காக அல்ல. உனக்காக என்பதை உணர வேண்டும். உன் உடல்நலம் நன்றாக இருக்க வேண்டுமானால் நீ மனதார மன்னிக்க வேண்டும் என்கின்றார். அதுபோலவே இறந்துவிட்ட தனது தந்தையின் (தந்தை தற்கொலை செய்து இறந்துவிடுகின்றார்) கல்லறையில் ஒரு கூழாங்கல்லை வைத்து மன்னித்துவிடுகின்றேன் என்று மனமார மன்னித்துவிடுகின்றார். மன அழுத்தம் குறைந்துவிடுகின்றது.

தொந்தரவு செய்தவர்கள் தொடர்ந்தும் தொந்தரவு செய்தால் என்ன செய்வது என்று கேட்கின்றார்கள். அதற்குப் பேராசிரியர், கோபமில்லாமல் எவ்வளவு விலக முடியுமோ அவ்வளவு விலகிச் செல்லுங்கள் என்கிறார்.

இதெல்லாம் சொல்வதற்கு எளிது, செயல்படுத்த முடியுமா?

மேடிசன் விசுகான்சின் பல்கலைக்கழகப் பேராசிரியர் ராபர்ட் என்ரைட் 26 ஆண்டுகளுக்கு முன்னர் இந்த மன்னிப்பு ஆராய்ச்சியைத் தொடங்கினார். அப்போது பலர் சிரித்தனர். அவர் சொன்னார், இந்த மன்னிப்பு என்பது மிகச் சாதாரணமானதல்ல. நீ யார்? உண்மையிலேயே உயர்ந்த மனது படைத்தவரா இல்லை போலியா? என்பதை உங்களுக்கே உணர்த்திவிடும் என்ற மிக ஆழமானக் கருத்தை எடுத்துரைத்தார். ஆம், வெறும் நடிப்பாக இல்லாமல் உண்மையாக மனதார மன்னிப்பவர்கள் நல்ல மன அமைதி, மனமகிழ்வுடன் வாழ்கின்றார்கள்.

மன்னிக்கத் தெரியாதவர்கள் நோயாளிகள். அந்த நோய் அவர்களை அரித்துக் கொண்டேயிருக்கும்.
மன்னிப்பு என்பது உண்மையாக இருக்க வேண்டும். கனிவுடன் இருக்க வேண்டும். கிழக்குக் கரோலினா பல்கலைக்கழகப் பேராசிரியை காத்தலீன் லாலர் -ரோ, மன்னிப்பும், உடல்நலமும்" என்ற ஆராய்ச்சி யிலே சிறப்புப் பெற்றவர். ரத்த அழுத்தம், மன அழுத்தம், மன உளைச்சல் , தூக்கமின்மை நீங்கி, மன அமைதி, உடல், உள்ளநலம் முன்னேறுகிறது என்று கூறுகின்றார்.
சரி, இதையெல்லாம் எப்படி நடைமுறைப்படுத்துவது ? நடக்கக்கூடியதா?

இது உடனே திடீரென்று நடந்துவிடாது. இதற்குப் பயிற்சி வேண்டும். என்ன மாதிரிப் பயிற்சி ? வயிற்றால் மூச்சுவிட வேண்டும். இந்தக் கோபம், வருத்தம், வெறி வரும்போது வயிற்றை ஏற்றி இறக்கி வயிற்றால் மூச்சுவிட வேண்டும். நமக்கு மிக மிக அன்பு கொண்டோர் தாய், தந்தை, வாழ்விணையர், உடன்பிறப்பு, நல்ல ஆசிரியர் என்று யாரை நாம் மிகவும் அன்புடன் நினைக்கின்றோமோ அவர்களது அன்பை, அவர்கள் செய்த நல்லவற்றை நினைத்துப் பார்க்க வேண்டும். இதில் இந்த ஆசிரியர் பெண் நினைத்தது யாரைத் தெரியுமா? அவரது மாமியாரை! அவரது அன்பை நினைத்துச் சிந்தித்ததும் அவரது கண்களில் கண்ணீர் வடிந்ததாம்! அந்த நினைவு தரும் மன அமைதி மிக்க நிறைவுடையது, மருந்துகள் தர முடியாதது என்கின்றார். அம்மாவுடன் ஆண்டாண்டு காலமாகக் கோபத்தில் உள்ள இவர் மாமியாரின் அன்பிலே உருகிவிட்டார்! ஒவ்வொருவருக்கும் இப்படி யாராவது இருப்பார்கள். அவர்களை நினைத்தால் அமைதி கிடைக்கும்.

இது நடைமுறைக்கு ஒத்து வருமா? என்று பலர் கேட்கலாம். பல்லாயிரம் பேர் பயனடைந்து மன மகிழ்வு பெற்றுள்ளனர். அவர்களது மன மகிழ்வே இது முடியும் என்பதற்கு அடையாளம். நாம் ஒவ்வொருவரும் மகிழ்வுடன் வாழ்வதற்குப் பெருந்தடைகளில் ஒன்றை எளிதாக ஒழிக்க முடியுமென்றால் அதை முயற்சி செய்து பார்க்க வேண்டியதுதானே ! சில கோபதாபங்கள் குறைவதற்கு நாட்கள் ஆகலாம். எதுவுமே இரண்டு ஆண்டுகளுக்கு மேலே இருக்கக்கூடாது என்கின்றார்கள்.

பேரறிஞர் அண்ணா என்ன செய்தார் என்று பார்ப்போம். முதலமைச்சர் ஆனவுடன் அவர் செய்த முதல் வேலை தந்தை பெரியார் அவர்களைத் திருச்சிக்குச் சென்று பார்த்து மகிழ்ந்ததுதான். தேர்தலிலே பெரியார் அவர்கள் மிகவும் காட்டமான தாக்குதலுடன் பிரச்சாரம் செய்தார். ஆனால் அண்ணா வந்தவுடன் தந்தை பெரியார் அவர்களே வெட்கப் பட்டாராம். மகிழ்ச்சியுடன் வாழ்த்தினாராம். தமிழுக்காகவும், தமிழ்நாட்டிற்காகவும் பாடுபட்ட அத்துனைப் பேரையும் மனமாரப் பாராட்டிப் பரிசுகளும், மரியாதையும் செய்தவர் அண்ணா. பெருந்தலைவர் காமராசர் உலகத் தமிழ் மாநாட்டில் சிறப்புச் செய்யப்பட்டார்.

காமராசர் என்ன கவிஞரா என்று கேலி பேசியவர்களை வெட்கப்பட வைத்தார் அண்ணா.

புரட்சிக் கவிஞர் பாரதிதாசன் பேசாத, எழுதாத கொடுமையான வார்த்தைகளே இல்லை எனலாம். அவரை நான் கொடுத்து நீங்கள் வாங்கக் கூடாது, என் கை கீழே இருக்கட்டும், நீங்கள் பொற்கிழியை எடுத்துக் கொள்ளுங்கள் என்றார். இதுபோன்ற பலர் அண்ணா அவர்களை வன்மையாகத் தாக்கியவர்கள். அவர்கள் பெருமைப்படுத்தப் பட்டதால் அண்ணா மட்டுமல்ல, தமிழினமே உடல்நலமும், உள்ள நலமும் பெற்றது.

ஓப்ராவைப் பலர் விமர்சித்தனர். சில வெள்ளை உள்ளமில்லாத வெள்ளைப் பெரிய மனிதர்கள், சிலர் வெள்ளையாக மாறிவிட்ட ஓப்ரா என்று கேலி பேசிய கருப்பர்கள், அவருடைய அந்தரங்க வாழ்க்கையை அலசியவர்கள், ஒரு நம்பிக்கைக்குள்ள நண்பி அவரது சிறு வயதில் குழந்தை பெற்ற செய்தியை வெளியே சொன்னவர் என்று அனைவரையும் தனது நிகழ்ச்சிக்கே வரச் சொல்லி மன்னித்துக் கட்டித் தழுவியவர் ஓப்ரா! இது உங்களுக்காக மட்டுமல்ல, எனக்காகவுந்தான் என்றார்.
"ஓ" ஒரு அதிசயந்தான் !

- தொடரும்

வியாழன், 11 மார்ச், 2021

'ஓ' நூலைப் படி! (ஓபரா-3)

'ஓ' நூலைப் படி!

சங்கத் தமிழ் நூலைப் படி ! காலையில் படி, மாலையில் படி என்றார் புரட்சிக்கவிஞர் பாரதிதாசன். இதை முழுதும் ஆதரித்து நூலைப் படிப்பதன் அவசியத்தை எடுத்துச் சொல்லிப் பரப்பியவர் ஓப்ரா வின்ஃபிரி.

அவருடைய குழந்தைப் பருவம் மிகவும் தாங்க முடியாத துன்பத்திலிருந்தது. தனது பதினான்காவது வயதிலே அவரது தந்தை என்று கருதப்பட்டவரிடம் ஒப்படைக்கப்பட்டார். அவர் மிகவும் கண்டிப்பானவர். இராணுவத்திலிருந்தவர். முடி திருத்துபவராகப் பணிபுரிபவர். அவர் ஓப்ரா நனறாகப் படிக்க வேண்டும் என்பதில் கண்டிப்பாக இருந்தார். பள்ளி நிகழ்ச்சிகளில் பேச்சுப் போட்டி, கலை நிகழ்ச்சிகளில் கலந்து கொள்ள ஆர்வமூட்டியவர்.

வாரம் ஒரு புத்தகம் கட்டாயம் படித்து அதைப் பற்றி எழுதி அவரிடம் காண்பிக்க வேண்டும் என்பதில் மிகவும் கண்டிப்பாக இருந்தார். பள்ளிப் படிப்பிலும், பேச்சிலும் நல்ல திறமைசாலியாக வந்தார் ஓப்ரா. அதுவே அவர் பின்னாட்களில் இந்தத் துறையில் வெற்றி பெற வழி வகுத்தது.

பெண்களுக்குக் கல்வி வேண்டுமென்று பாடுபட்ட தந்தை பெரியார் பிறந்த நாள் செப்டம்பர் 17. பாருங்கள் அதிசயத்தை. அந்த நாளிலேதான் பல அதிசயங்களைச் சாதித்த ஓப்ரா 1996 ஆம் ஆண்டு அவரது நூலைப் படி நிகழ்ச்சியை ஒரு நாவலைப் பற்றி அறிமுகப்படுத்தித் தொடங்கி வைத்தார்.

அமெரிக்காவிலே பல புத்தகக் குழுக்கள் உள்ளன. மாதம் ஒரு புத்தகம் என்ற மிகவும் பிரபலமான புத்தகக் குழு 1926 ஆம் ஆண்டு முதல் உள்ளது. சேரும் பொழுது ஒரு டாலருக்கு நான்கு நல்ல புத்தகங்களை வாங்கிக் கொள்ளலாம். மாதந்தோறும், அவர்கள் நல்ல புத்தகத்தைத் தேர்ந்தெடுத்து உறுப்பினர்களுக்கு அனுப்புவார்கள். வேண்டாமென்றால் முதலில் சொல்ல வேண்டும்.

அந்த மாதப் புத்தகத்தை அனுப்ப மாட்டார்கள். அல்லது புத்தகத்தைத் திருப்பி அனுப்பலாம். அதில் உறுப்பினராக பல ஆண்டுகள் இருந்து வருபவர்கள் பலர். 5 லட்சத்திற்கு மேற்பட்டோர் உறுப்பினர்களாக இருந்துள்ளனர். இன்னும் பல குழுக்கள் அமெரிக்க மக்கள் தொலைக்காட்சி நிறுவனம், ரேடியோ நிறுவனங்கள் என்றும் உண்டு. பொதுவாகவே அமெரிக்காவில் புத்தகங்கள் வாங்குவோரும் படிப்போரும் அதிகம். இதில் ஓப்ராவின் புத்தகக் குழுவிற்கு அப்படி என்ன சிறப்பு?

ஓப்ரா தேர்ந்தெடுப்பது மிகவும் பிரபலமான எழுத்தாளர்களை அல்ல. மக்களின் ஆர்வம், புத்தகம் படிக்க வேண்டும் என்று தூண்டுமாறு உள்ள புத்தகங்கள், மக்களுக்குப் பயன் தரும், உற்சாகம் தரும், முன்னேற வைக்கும் அல்லது மகிழ்ச்சியூட்டும் என்று பல முறைகளை வைத்துத் தேர்ந்தெடுத்துள்ளார்.

ஆசிரியர்களை அழைத்துப் பேசுவார். அவர் தேர்ந்தெடுத்த 70க்கும் மேற்பட்ட புத்தகங்கள் 5 கோடிகளுக்கு மேலே விற்கப்பட்டுள்ளன. அவர் தேர்ந்தெடுக்கிறார் என்றால் உடனே பல்லாயிரக்கணக்கான அதிக நூல்கள் அச்சிடப்பட வேண்டும்.

முக்கியமாக பெண்களும், புத்தகம் படிக்கும் பழக்கமில்லாதவர்களுமே அழைக்கப்பட்டுப் பேசுவார்கள். அவர்கள் வெளிப்படுத்தும் ஆர்வம் மற்றவர்களையும் தொற்றிக் கொள்ளும். ஆகமொத்தம் மக்கள் புத்தகம் படிக்கும் நல்ல பழக்கத்தை மகிழ்ச்சியுடன் ஏற்றுக் கொள்ள வேண்டும்; வாழ்வில் மகிழ்ச்சியடைய வேண்டும்; இதற்கு அவரது நிகழ்ச்சி பயன்பட வேண்டும்; இதுதான் அவர் குறிக்கோள். இதில் வெற்றி கண்டு பல பாராட்டுகளும் பெற்றுவிட்டார்.

இதில் என்ன அதிசயம் என்றால் புத்தகங்களும், தொலைக்காட்சியும் போட்டி நிறுவனங்களாகக் கருதப்பட்டன. ஆனால், தொலைக்காட்சி மூலமாகவே புத்தகங்களை அறிமுகப்படுத்தி தொலைக்காட்சி நிகழ்ச்சியும் வெற்றி பெற்றது, புத்தக நிறுவனங்களும் வெற்றி பெற்றன என்பது அவரால்தான் சாதித்துக் காண்பிக்கப் பட்டது. இதை நல்ல அறிஞர்களையும், பேராசிரியப் பெண்மணிகளையும் வைத்து தமிழகத் தொலைக்காட்சிகள் பயன் பெறலாம், பயன் பெற வைக்கலாம்.

சிகாகோவின் சிறந்த பல்கலைக் கழகங்களின் ஒன்றான டீ பால் பல்கலைக் கழகப் பேராசிரியர் காத்தலீன் ரூணி அம்மையார் இதை எடுத்துச் சொல்கின்றார். ஆண்டாண்டு காலமாக உடன்பட்டுச் செயல்பட முடியாத புத்தக நிறுவனங்களையும், வியாபார நோக்கமே கொண்ட தொலைக்காட்சியையும் வெற்றிகரமாக இணைத்து வெற்றி கண்டவர் ஓப்ரா என்றார். அவரது நூல் ஓப்ரா- அமெரிக்காவையே மாற்றிவிட்ட புத்தகக் குழு இதை எடுத்துச் சொல்கின்றது. புத்தகங்களைப் பற்றிப் பேசாதவர் களை யெல்லாம் புத்தகங்களைப் பற்றிப் பேசும் நடைமுறையை உண்டாக்கியவர் ஓப்ரா என்கின் றனர். அதாவது தமிழகத்திலே சினிமாவையும், தொலைக்காட்சித் தொடர் நிகழ்ச்சிகளையும் பற்றிப் பேசிக் கொள்கின் றார்களே அதைப் போல. ஒரு கிழவர் இறந்ததற்குத் தமிழகமே அழுததே அதே போல ஓப்ரா லியோ டால்ஸ்டாயின் 19ஆம் நூற்றாண்டின் துயரமான காதலோவியம் ஆனா காரனினா பற்றி அறிமுகப்படுத்தியதும், அந்தப் புத்தகம் விற்பனையில் முதலிடத்திற்கு வந்து விற்றது. அது போல பழையன, புதியன என்று பல்வேறு நூல்களை விற்பனையில் உயரச் செய்து அந்த ஆசிரியர்களின் அடுத்த நூல்களும் சிறந்து விற்றுள்ளன.

இதில் குறைபாடுகள் இல்லாமல் இல்லை. ஒரு ஆசிரியர் பொய்யான தகவல்களைக் கொண்டு நூலை வெளியிட்டுவிட்டார். அதை ஓப்ராவும் அறிமுகப்படுத்தி விட்டார். தவறை அறிந்ததும் அந்த ஆசிரியரை வரவழைத்து மன்னிப்புக் கேட்க வைத்தார். சில நூல்கள் விற்பனை ஆகாது என்று தெரிந்தாலும் அதன் சமுதாயத் தாக்கத்திற்காக, மக்கள் மேம்பாட்டிற்காக அவைகளை அறிமுகப்படுத்தியுள்ளார். குடி, போதைகள் அவற்றிலிருந்து மீளுதல் போன்றவை அவருக்கு மிகவும் பிடித்த, மக்களுக்கு வேண்டிய நூல்களாக விவாதிக்கப்பட்டன.

ஓப்ரா புத்தகங்களைப் பற்றிப் பேசும்போது நமக்கு மிகவும் வேண்டிய நண்பர் நம்மிடம் புத்தகத்தைப் பற்றிப் பேசுவதுபோல உள்ளது என்கின்றார்கள் அவரது நிகழ்ச்சிகளைப் பார்க்கும் பல லட்சம் பேர். அதுவே பெரிய உற்சாகமாகப் பேசப்படவும், மற்றவர்கள் படிக்கவும் நேர்ந்து ஒரு இயற்கைத் தன்மை வாய்ந்த விளம்பரம். ஆனால், விளம்பரத்திற்காக அல்ல நமக்காக என்று எண்ணப்பட்டு விடுகின்றது.

ஆங்காங்கே புத்தகக் குழுக்கள் உருவாகவும், முக்கியமாக மகளிர் பங்கேற்று தன்னம்பிக்கை, மன உளைச்சல்களிலிருந்து விடுதலை, வாழ்க்கையில் மகிழ்ச்சி, முன்னேற்றம் பெறுவதாகவும் பங்கு பெறுவோர் கூறி வருகின்றனர்.

நமக்குத் தமிழகத்தின் இன்றைய முக்கியத் தேவை இந்த மாதிரியான புத்தகக் குழுக்களே! தொல்லைக்காட்சிகளின் அடி,உதை, சூழ்ச்சி, மாமியார் மருமகள் சண்டைகள், சின்ன வீட்டு நிகழ்ச்சிகள் என்று சமுதாயத்தையே சீர்குலைக்கும் போதையிலிருந்தும், குடி போதையில் வாடும் குடும்பங்களுக்கு வழி முறைகள் காட்டவும் இந்தப் புத்தகக் குழுக்கள் கட்டாயம் உதவும். முக்கியமாக மகளிர் தன்னம்பிக்கை, தன்முனைப்பு, மகிழ்ச்சியான உறவுகள், நல்ல குழந்தை வளர்ப்பு, நல்ல உணவு உடற்பயிற்சி, மன அமைதி வழிமுறைகள் என்று வாழ்வின் அனைத்து முன்னேற்றங்களும் வளர வழி வகுக்கும்.

மிக எளிதாக மூன்று, நான்கு பேர் அமைத்த புத்தகக் குழுக்கள் எல்லாம் வளர்ந்து அவர்களுக்கு உதவுவதை ஓப்ராவின் வாசகர்கள் உணர்ந்து பாராட்டுகின்றனர். இதில் திராவிட மகளிர் அணி முன்னோடியாக இருந்து, எந்தப் புத்தகத்தையும் படிக்கலாம் என்று பொதுவாக இருந்து ஆரம்பித்துக் காட்ட வேண்டும்.

இது நமது பண்பாட்டுச் சீரழிவைத் தடுக்கும். மக்கள் மகிழ்வுடனும், தன்னம்பிக்கையுடனும் வாழக் கட்டாயம் வழி வகுக்கும்.

நடுவிலே ஓராண்டு நிறுத்தி வேறு மாதிரியாக நூலாசிரியர்கள் பங்கேற்காமல் நடத்தினார். இப்போது OWN (Oprah Winfrie Network) என்று அவரது தொலைக்காட்சி நிகழ்ச்சியிலே கொண்டு வரவுள்ளார்.

இந்த மாதிரி தமிழகத்துத் தொலைக்காட்சிகளில் வரும் நாள் எந்நாளோ ?

ஓ வைப் பாராட்டுவோம். அவரிடமிருந்து மக்கள் பயன் பெற்றதை அறிமுகப்படுத்துவோம்.

- தொடரும்

புதன், 10 மார்ச், 2021

உலகப் பகுத்தறிவாளர்: புதிய மாந்தநேயர் - கிரேக் எப்ஸ்டீன்

உலகப் பகுத்தறிவாளர்

புதிய மாந்தநேயர் - கிரேக் எப்ஸ்டீன்

- சு.அறிவுக்கரசு

மானிடம் போற்ற மறுக்கும் - ஒரு
மானிடம் தன்னைத் தன் உயிரும் வெறுக்கும்
மானிடம் என்பது குன்று - தனில்
வாய்த்த சமத்துவ உச்சியில் நின்று
மானிடருக்கினிதாக - இங்கு
வாய்த்த பகுத்தறிவாம் விழியாலே
வான்திசை எங்கணும் நீ பார் - வாழ்வின் வல்லமை
மானிடத் தன்மை என்றே தேர்!

எனப் பாடினார் புரட்சிக் கவிஞர் பாரதிதாசன்.

மானிட சக்தி எனும் தலைப்பில் இப்பாடலை எழுதிய ஆண்டு 1931. மானிடம், மானுடம், மாந்த நேயம், மனித நேயம் எனப் பலவாறு கூறப்படும் சொற்கள் HUMANISM எனும் இங்கிலீஷ் மொழிச் சொல்லுக்கான, பல தமிழ்ச் சொற்கள் எனலாம். இம்மானுடப்பற்றை இயக்கமாக நடத்திடும் நிலை உலகில் இன்று நிலவுகிறது. இறப்புக்குப் பின்னர் ஓர் உலகம் இருக்கிறது, அதில் ஒரு வாழ்வு இருக்கிறது, அதுதான் பேரின்பம்; இவ்வுலகில் வாழும் வாழ்வு, இறப்புக்கு முன்னர் வாழும் வாழ்வு சிற்றின்பம் - எனவே, பேரின்பத்தை நாடு என மத நூல்கள் எல்லாம் கூறுகின்றன. பேரின்பத்தை நாடும் பேதையர், தம் சம மாந்தர்களைப் பற்றிக் கவலைப்படுவதே கிடையாது. சரியாகச் சொன்னால், தம் சக மனிதர்களைச் சங்கடப்படுத்தியும் தொல்லைப்படுத்தியும் தன் பெண்டு, பிள்ளை, சம்பாத்தியம், தானுண்டு எனும் கடுகு உள்ளம் கொண்டு சிற்றின்ப வாழ்க்கையை(?)ச் சுகித்துக் கொண்டுள்ளார்கள். இந்நிலையில் மானுடப் பற்றின் அவசியத்தைக் கூற ஓர் இயக்கம் அவசியம்தான்!

இவ்வியக்கத்தவர் கடவுள் மறுப்பாளர் களாகவோ, மத வெறுப்பாளர்களாகவோ இருக்க வேண்டியதில்லை; இத்தகைய நம்பிக்கைகளைக் கொண்டிருந்தாலும் மானுடப் பற்று கொண்டிருக்க வேண்டும் என்கின்ற வகையில் இவர்களைச் சிறிது மார்ஜின் கொடுத்து ஏற்று வருகின்றனர் பகுத்தறிவாளர் கள். அத்தகைய மானுடப் பற்றியக்கம் (HUMANISM) 1900 முதல் இயங்கி வருகின்றது. அதனைக் கூர்ந்து புதிய மானுடப் பற்றியக்கம் (NEW HUMANISM) எனும் இயக்கத்தில் ஈடுபட்டு அதன் சார்பாக மதகுருவாகவும் இயங்கி வருபவர் கிரெக் எப்ஸ்டீன் எனும் யூதர்.

யூதமத குருவுக்கு ரப்பி (RABBI) என்று பெயர். அந்தவகையில் இவர் HUMANIST RABBI புகழ்பெற்ற ஹார்வார்டு பல்கலைக் கழகத்தின் மதநீக்கு மானிடப்பற்றான மதகுரு (SECULAR HUMANIST CHAPLAIN) ஆக இருந்து வருகிறார்.

1852இல் (SECULAR) செக்யுலர் எனும் சொல் பழக்கத்திற்கு வந்தது. இங்கிலாந்து நாட்டில் ஜி.ஜே. ஹோலியாக் என்பவரால் இச்சொல் உருவாக்கப்பட்டது. இந்த உலகுக்கு உரியன எனும் பொருளில் உருவாக்கப்பட்டுப் பழக்கத்திற்கு வந்தது.

கடவுள், இறப்புக்குப் பிந்தைய உலகம் போன்ற (மூட) நம்பிக்கைகள் அந்த தன்மை, இவ்வுலக வாழ்க்கையைச் சீரிய, நேரிய முறையில் நடாத்திக் கொள்ளும் ஒழுகலாறுகள் போன்றவற்றிற்கு முதன்மை தரும் முறைமைக்கு இப்பெயர் வழங்கப்பட்டது.

இங்கிலாந்து நாடெங்கும் செக்யுலர் சபைகள் ஏற்படுத்தப்பட்டன. அத்தகைய சபை ஒன்று இந்தியாவில், சென்னையில் ஆங்கிலேயரான திரு. அப்ஷன் என்பவரால் யூரேஷியர் மெட்ராஸ் செக்யுலர் சொசைட்டி எனும் பெயரில் 1886இல் அமைக்கப்பட்டது. அதே ஆண்டு ஏப்ரல் 12இல் இங்கிலாந்தில் கிளாஸ்கோ நகரில் இருந்த நேஷனல் செக்யுலர் சொசைட்டியுடன் இணைப்பு பெற்றுச் செயல்பட்டது. கிறித்துவ மதக் காப்பாளராக இருந்துகொண்டே, கடவுளை மறுத்த சீரிய பகுத்தறிவாளர் சார்லஸ் பிராட்லா, இந்த செக்யுலர் சொசைட்டியின் உறுப்பினராக இருந்தவர்தான்.

அவரைப் போலவே கிரெக் எப்ஸ்டீனும் நாத்திகத்தைப் போல கடவுள் மறுப்பையும் மத வெறுப்பையும் தீவிரமாகப் போதிக்காமல், அமைதி முறையில் மக்களை மா-னுடப் பற்றாளர்களாக மாற்றுவது தங்கள் இலட்சியம் என்கிறார். மதங்கள் இக, பர என்று இவ்வுலக, மறுஉலக வாழ்க்கையைப் பிரித்துக்கூறி இகவாழ்க்கையைவிட பரவாழ்க்கையை முன்னிறுத்திக் கூறும்போது இகவாழ்வின் சிறப்புக்குரிய மானுடப் பற்றாளர்களாக எப்படி மதப்பற்றாளர்கள் வரமுடியும்? வாழமுடியும்? என்பதைக் காலம்தான் உணர்த்தும்.

இத்தகைய மானுடப் பற்றாளரான கிரெக் எப்ஸ்டீன் நியுயார்க் நகரில் 1977 பிப்ரவரி 4 ஆம் நாள் பிறந்தவர். இவரது தாய், தந்தை யூதமதத்தினர் என்றாலும் மதப்பற்று மிக்கவர்கள் அல்லர். யூதவிடுமுறை நாள்களிலோ, பண்டிகை நாள்களிலோ மட்டும் தேவாலயம் சென்று மதவழிபாடு செய்யும் பழக்கம் கொண்டவர்கள். இதனாலேயே கிரெக் எப்ஸ்டீன் மானுடப் பற்றுள்ள யூதமதக் கொள்கை கொண்டவராக வளர்ந்தார் எனலாம்.

மன்ஹாட்டனில் உயர்நிலைப் பள்ளியில் படிக்-கும்போது எப்ஸ்டீன் பவுத்த மதம் பற்றியும், சீனத்தின் டாவோயிச மதம் பற்றியும் படித்தார். மிக்சிகன் பல்கலைக்கழகத்தில் படிக்கும்போது அறிவியல், கலை ஆகியவற்றுடன் ஜென் பவுத்தம் பற்றியும் படித்தார். தைவான் நகரில் ஓராண்டுக்காலம் சீன மொழியிலேயே ஜென் பவுத்தம் பற்றிப் படித்தார். விளைவு?

கீழ்த்திசை மதங்களின் மீது பற்று, பிடிப்பு விட்டுப் போயிற்று. தைவானை விட்டு அமெரிக்கா திரும்பி மிக்சிகன் பல்கலைக்கழகத்தில் மதத்தில் பி.ஏ. பட்டமும், சீன மொழியில் பட்டமும் பெற்றார். பின்னர் யூதமதம் பற்றி முதுகலைப் பட்டம் பெற்றார். பிறகு ஹார்வார்டு திருச்சபைப் பள்ளியில் இறையியல் படிப்பு படித்து முதுகலைப் பட்டம் பெற்று மானுடப்பற்றான மதகுருவாக நியமனம் செய்யப்பட்டு ஹார்வார்டு பல்கலைக்கழகத்தில் பணிபுரிகிறார்.

கடவுள் இன்றியே நன்மை (GOOD WITHOUT GOD) எனும் நூல் இவர் 2010இல் எழுதிய நூலாகும். மதம் மறுத்த ஒரு கோடி மக்கள் நம்புவது என்ன? (WHAT A BILLION NON RELIGIOUS PEOPLE DO BELIEVE) என்னும் துணைத் தலைப்பு கொண்ட இந்த நூல், கடவுள் நம்பிக்கை இல்லாமலே மக்கள் எப்படி ஒழுக்கமாகவும் உண்மையாகவும் வாழ்கிறார்கள் என்பதை விளக்கும் அருமையான நூல் ஆகும். இந்நூல் வெளிவந்த காலகட்டத்தில் மன்ஹாட்டன் பகுதியின் புறநகர் தொடர்வண்டி நிலையங்களில் பரபரப்பான விளம்பர வாசகம் இடம்பெற்றது நினைவிருக்கலாம். நியுயார்க் நகரின் மிக முக்கியப் பகுதி மன்ஹாட்டன் என்பது. ஒசாமா பின்லாடன் இடித்துத் தகர்த்த இரட்டைக் கோபுரங்கள் இந்தப் பகுதியில்தான் இருந்தன. அந்தப் பகுதியில் எழுதப்பட்ட வாசகங்கள்: நியுயார்க் நகரின் பத்து லட்சம் பேர் கடவுள் இல்லாமலே நல்லவர்களாக இருக்கிறார்கள்: நீங்கள்? (A MILLION NEYYORKERS ARE GOOD WITHOUT GOD. ARE YOU?) இதே வாசக விளம்பரம் 20 பெருநகரங்களில் வெளியிடத் திட்டமிடப்பட்டது. லாஸ் ஏஞ்சலில் சான்ஃபிரான்சிஸ்கோ போன்ற பெரிய நகரங்களிலும் இடாகோ போன்ற சிறிய நகரங்களிலும் விளம்பரம் செய்யப்பட்டது.

அமெரிக்க மானுடப் பற்றியக்கம் சார்பில் வைக்கப்பட்ட இத்தகைய விளம்பரப் பதாகை சீரழிக்கப்பட்டது சிலரால்! (பக்த கே()டிகளால்தான்!) இதுபற்றி எப்ஸ்டீனைக் கேட்டார்கள். அவர் சொன்னார், யார் மதத்தையும் நாங்கள் சீரழிக்கவில்லை மதத்தை அழிக்கக்கூட நாங்கள் முயலவில்லை. மக்களிடம் உண்மையைச் சொல்கிறோம். அதனைத் தவறாகப் புரிந்துகொண்டோர் இதைச் செய்கிறார்கள். ஆத்திரப்பட்டவர்கள் WITHOUT என்ற சொல்லை அழித்துவிட்டனர்.

OUT என்பதை மட்டும் அழித்திருக்கலாம். அவர்கள் விரும்பும் வாசகமான மில்லியன் மக்கள் கடவுள் நம்பிக்கையுடன் நல்லவர்களாக இருக்கின்றனர் எனும் பொருள் கிடைத்திருக்கும். இதை ஒரு யோசனையாக அவர்களுக்குச் சொல்கிறேன், என்று அமைதியாகக் கூறிவிட்டார். ஆத்திரக் காரனுக்கு அறிவு மட்டு, பக்தி வந்தால் புத்தி போகும் என்பன போன்ற சொலவடைகள் அங்கே இல்லையோ?

அவருடைய கருத்துப்படி, மானுடப் பற்று என்பது சீரிய, சிறந்த, ஒழுக்கமான வாழ்வை இயற்கைக்கு அப்பாற்பட்ட ஆற்றல் (SUPER NATURALISM) ஆகப் பெரும் சக்தி போன்றவை - கடவுள் இல்லாமலே வாழமுடியும் என்பதை எண்பிக்கும் வாழ்வியல் என்பதே!

பாஸ்டன் நகரில் இயங்கும் அறிவைப் பயன்படுத்துவோர் கூட்டணி (BOSTON COALITION OF REASON) யினருடன் கிரெக் எப்ஸ்டீனும் அவரது ஹார்வார்டு மதாலயமும் இணைந்து கடவுளின்றியே நன்மை விளம்பரங்களை நாடு முழுவதும் செய்திடும் பணியில் தங்களை ஈடுபடுத்திக் கொண்டுள்ளனர். 2009 முதல் இவ் விளம்பரப் பணி நடந்து நல்ல விளைச்சலைத் தந்துள்ளது. டாலர் நோட்டிலேயே, கடவுள் நம்பிக்கையைப் பறையடிக்கும் அமெரிக்க நாட்டில் கடவுள் கலகலத் துப் போகிறார் என்பது மகிழ்ச்சிதானே?

- (தொடரும்)

உலகப் பகுத்தறிவாளர் - கிரெக் எப்ஸ்டீன் (2)

திருமணம் தேவையில்லை

- சு. அறிவுக்கரசு

நல்ல கடவுள் மறுப்பாளரான கிரெக் எப்ஸ்டீன் கடவுளின்றியே நன்மை எனும் நூலில் கடவுளின் தோற்றம் பற்றி எழுதுகிறார். நீ கடவுளை நம்புகிறாயா? என்பது அர்த்தமற்ற கேள்வி என்கிறார். கடவுள் பற்றி நீ என்ன நம்பிக்கை கொண்டிருக்கிறாய்? (WHAT DO YOU BELIEVE ABOUT GOD) என்றுதான் கேட்கவேண்டும் எனக் கூறுகிறார். ஏன் இந்தச் சிறிய வேறுபாடு கேள்வியில்? இந்த (அறிவு வளர்ச்சி)க் காலத்தில் கடவுள் என்ற சொல் எந்த அர்த்தத்தையும் தரலாம்; எனவே, அது இல்லை என்ற அர்த்தத்தையும் தரக்கூடும் என விளக்குகிறார்.

எது முதலில் வந்தது? கோழியா, முட்டையா? எது முதலில்? மதமா? நாத்திக மனித நேயமா? மதம்தான் முதலில் என்றால்... நாத்திகமும் மனித நேயமும் அதே காலகட்டத்தில் மறுப்பாக எழுந்த தத்துவங்கள்தான் என்கிறார். மறுக்க முடியுமா? இதற்கு ஆதாரமாக ரிக் வேதத்தைக் காட்டுகிறார். 3,500 ஆண்டுகளுக்குமுன் தொகுக்கப்பட்டது எனக் கூறப்படும் இந்நூலின் சில வரிகளை மேற்கோள் காட்டுகிறார். படைப்பு பற்றிய ரிக் வேத ஸ்லோகத்தைச் சுட்டுகிறார்.

யாருக்கு சரியாகத் தெரியும்?

யாரால் உறுதியாகக் கூறமுடியும்?

எப்போது இப்பிறப்பு நிகழ்ந்தது?

எப்போது இதன் படைப்பு நிகழ்ந்தது?

இந்த உலகம் படைக்கப்பட்டபின் கடவுளர்களின் பிறப்பு நடந்தது.

அப்படியெனில் இது எப்போது நடந்தது

என்று யார் அறிவார்?

எவருக்கும் இது தெரியாதே!

அவன் படைத்தானா?

படைக்கவில்லையா, என்பதும் தெரியாது சொர்க்கத்திலிருந்து குனிந்து பார்க்கும்

அவன் மட்டுமே அறிந்திருக்கலாம்! அவனுக்கே கூட, ஒருவேளை, இது தெரியாமல் இருக்கலாம்!
- இந்தச் சந்தேகம் அன்றைக்கே இருந்திருக்கிறதே!

இந்த அய்யத்தைக் கிளப்பியவர்கள் மானுடப் பற்றாளர்களாகிய லோகாயதர்கள், சார்வாகர்கள். ஒரே மாதிரியான கருத்தும் கொள்கையும் கொண்ட மனித நேயர்கள் இந்திய மண்ணில் 2,100 ஆண்டுகளுக்கு முன்பே இருந்திருக்கிறார்கள். மானுடப் பற்றாளர்கள் எனப் பெருமையுடன் பறை சாற்றுகிறார் இந்நூலில். இறப்புக்குப்பின் எந்த ஒரு வாழ்க்கையும் கிடையாது என அறுதியிட்டு அவர்கள் கூறினார்கள்.

மாதவ ஆசார்யா என்பவர் எழுதிய சர்வ தரிசன சம்கிதை எனும் நூலின் பாடல் ஒன்றினையும் எடுத்தாண்டிருக்கிறார்.

அடுத்த உலகத்திற்கு இறந்த உடல் செல்கிறதென்றால், ஏன் திரும்பவில்லை? இறந்தோரை இழந்து தவிக்கும் உறவினரைச் சாந்தப்படுத்திட

ஏன் அவர்கள் திரும்பி வரவில்லை? எல்லாம், தம் வயிற்றுப் பாட்டுக்காக
பார்ப்பனர் கட்டிவிட்ட கதையிது - செத்தவர்க்குச் செய்திடும் சடங்குகள்!
வேறெங்கும் வாழ்வு கிடையாது இவ்வுலகில் வாழும் மாந்தரெல்லாம்
மகிழ்வுடன் வாழ்ந்திடவே
பற்றுவீர் சார்வாகத் தத்துவத்தை!

எனப் போகும் பாடல் அது! IT IS ONLY AS A MEANS OF LIVELIHOOD THAT BRAHMINS HAVE ESTABLISHED HERE ABUNDANT CEREMONIES FOR THE DEAD என அப்பட்டமாக எழுதி சார்வாகக் கொள்கையை சர்வதரிசன சம்கிதை கூறுவதை மேற்கோள் காட்டி எழுதியுள்ளார்.

இந்தியாவில் 2,600 ஆண்டுகளுக்கு முன் தோற்றுவிக்கப்பட்ட சமண மதம் கூட பார்ப்பனச் சடங்குகளையும் மேலாதிக்க வல்லாண்மையையும் எதிர்த்து வந்ததுதானே! கடவுள்தான் உலகை உண்டாக்கியது என்றால் அதற்கு முன் அது எங்கே இருந்தது? அது அனைத்துக் கட்டுப்பாட்டுக்கும் அப்பாற்பட்டது என்றால், இப்போது எங்கே இருக்கிறது? உலகைப் படைப்பதற்குத் தேவையான பொருள்களை அது எப்படிப் பெற்றது? எங்கிருந்து பெற்றது? என்ற கேள்விகளை சமண அறிஞர் குந்த குந்த கேட்டார் எனக் குறிப்பிடுகிறார். கீழை நாடுகளின் சிந்தனைகளில்தான் மானுடப்பற்றும், கடவுள் மறுப்பும் ஆதிகாலம் தொட்டே தொடங்கி நிலவி வந்தது என்பதை நிறுவுகிறார். நாம் பெருமை கொள்ள வேண்டிய சேதி!

ஜென் பவுத்தம் பற்றிப் படித்தவர் என்ற காரணத்தால் அவர் அதுபற்றி விளக்குகிறார். ஷான் (CHAN) என்று சீன மொழியில் அழைக்கப்படும் கட்டுப்பாடுகள் நிறைந்த வழிபாட்டு முறையே, ஜப்பானிய மொழியில் ஜென் (ZEN) எனப்படுகிறது. தியானம் என்ற பொருள்தரும் சமக்கிருதச் சொல் தியானா (DHYANA) என்பது சீனத்தில் ஷான் ஆனதாம். இந்த ஷான் முறையைக் கைக்கொள்ளும் சீன குருக்கள் ஒயின் பாட்டில், நீலப்படம் பார்க்க உதவும் டி.வி., வி.சி.ஆர். பெட்டிகளின் பக்கத்தில்தான் தைவானில் அமர்ந்து ஜெபம் செய்கிறார்களாம். இந்தக் கபடவேடதாரிகளை அடையாளம் கண்டதால்தான், இவர்கள் கம்யூனிஸ்ட் சீனாவிலிருந்து வெளியேற்றப்பட்டு, சியாங்கே ஷேக்கின் ஃபார்மோஸா தீவில் அடைக்கலம் புகுந்து தம் மத வணிகத்தைச் செய்து வருகிறார்கள் போலும்!

உலகின் மதங்கள் எல்லாமே ஒன்றை மட்டுமே வலியுறுத்துவதாக அவர் எழுதுகிறார்.

உனக்குத் தீங்கு நேரும் வகையிலான காரியத்தை, நீ, பிறருக்குச் செய்யாமல் இருப்பதே உன் கடமை. (மகாபாரதம் 5:1517) இதே கருத்தையே பவுத்தம் கூறுவதாக (உதன _ வர்கம் 5,18) எழுதுகிறார். பிறர் உனக்குச் செய்வதால் உனக்குத் தீங்கு நேரிடுமானால், அதே காரியத்தை நீ பிறருக்குச் செய்யாமலிருப்பதுதான் சட்டம் என்று மாத்யூ எழுதிய பைபிள் (7, 12) கூறுவதாக எழுதுகிறார்.

வாழ்நாள் முழுவதும் கடைப்பிடிக்கப்பட வேண்டிய கொள்கை ஒன்றே! அதுதான் கருணையுடன் அன்பு செலுத்துதல். பிறர் உனக்கு எதைச் செய்யக் கூடாது என்று நினைக்கிறாயோ, அதைப் பிறருக்கு நீ செய்யாதே என்று கன்பியூஷியஸ் மதம் (15, 23) கூறுவதாக எழுதுகிறார்.

தனக்கு விருப்பமானதைப் பிறருக்கும் செய்து வாழ்வதே (இறை) நம்பிக்கையாளர் என்பதற்கான அடையாளம் என்று இசுலாத் கூறுவதாக எழுதுகிறார்.

எதை நீ விரும்பவில்லையோ, அதை அடுத்தவருக்கு நீ செய்யாதே என்று யூதமதம் (டால்முட், ஷபாத் 31டி) கூறுவதாக எழுதுகிறார்.

உன் பக்கத்து வீட்டாருக்கு ஏற்படும் ஆதாயம் உன்னுடையது என்றும் அவருக்கு ஏற்படும் இழப்பும் உனக்கு ஏற்பட்டதாகும் என்றும் கருது என்று டாவோயிச மதம் கூறுகிறதாம்.

நேர்மையான வாழ்க்கை முறை என்பது எதுவென்றால், எவரையும் துன்புறுத்தாமல் இருப்பதுதான் என்கிறதாம் சமணம்.

எனவே, மனித நேய இயக்கம் எதையும் புதிதாகச் சொல்லவில்லை. ஒழுக்கநெறிகளைப் பின்பற்ற வேண்டும் என்று மட்டுமே கூறுகிறது என்கிறார். யூத மதத்தில் ஹலாச்சா (HALACHA) என்றும் கத்தோலிக்கக் கிறித்துவத்தில் கானன் சட்டம் (CANON LAW) என்றும் 10 கட்டளைகள் என்றும், இசுலாத்தில் ஷரியா என்றும் பவுத்தத்தில் கூறப்படும் எட்டுப் பாதைகள் (EIGHT FOLD PATH) போன்ற எல்லாமே, தற்காலத்திற்கு அவ்வளவாகப் பொருந்தி வராதவை. காலத்திற்கேற்ப மாறுதலுடன் ஒழுக்கநெறிகள் கடைப்பிடிக்கப்பட வேண்டும். கம்பளியையும் பஞ்சையும் கலக்கக்கூடாது. இறைச்சியையும் பாலையும் கலக்கக் கூடாது. ஆணும் பெண்ணும் கலந்திருக்கக் கூடாது என வேலை செய்யும் இடங்கள், வழிபாட்டிடங்கள், திருமணங்கள் போன்றவற்றில் பேதம் காண்பது என்பவையெல்லாம் தற்காலத்திற்கு ஒத்து வராதவை என்று அழுத்தந்திருத்தமாகக் கூறுகிறார்.

குழந்தை பிறந்தால், அதன் பெயர்சூட்டு விழா மேலை நாடுகளில் மதச் சடங்காக நடக்கும். அதுபோலவே திருமணங்கள், சாவுச் சடங்குகள் போன்றவையும் மதக் கருத்துகளின் அடிப்படையில் நடத்தப்பெறும். கடவுள், மதநீக்கம் செய்து மாந்தநேயக் கொள்கைப்படி வாழ்பவர்கள் எப்படி மதம் சம்பந்தமில்லாமல் இவற்றைச் செய்து கொள்வது என்பதுபற்றியும் விளக்குகிறார்.

குழந்தைக்குப் பெயர் வைப்பதுபற்றிக் கூறும்போது, மனைவி, கணவன் ஆகிய இருவரின் குடும்பம், கலாச்சாரம் போன்றவற்றைப் பிரதிபலிக்கும் வகையில் பெயர் வைக்கலாம். ஞானத்தந்தை, ஞானத்தாய் என்று குடும்பப் பெரியவர்களைக் குறிப்பிட்டுக் குழந்தைகளுக்கு ஞானஸ்நானம் செய்வர். அதற்கு மாற்றாக அவர்களை GOD PARENTS என்பதற்குப் பதில் GUIDE PARENTS (வழிகாட்டும் பெற்றோர்) என்றழைக்கலாம் என்று கூறுகிறார்.

திருமணம் பற்றிக் கூறும்போது, ஏன் அதைச் செய்துகொள்ள வேண்டும்? அது தேவையே இல்லை என்கிறார். திருமணம் கிரிமினல் குற்றமாகக் கருதப்பட வேண்டும் என்று தந்தை பெரியார் கூறியதைக் கருத்தில் கொள்ளலாம். 34 வயதான இவர் திருமணம் செய்து கொள்ளவில்லை. ஆனால், பல திருமணங்களை நடத்தி வைத்திருக்கிறார். பெண் வீட்டிலிருந்து மணமகளைப் பல மணமகன்கள் விலைக்கு வாங்கியும், சிலர் நல்ல வாழ்வு வாழ்ந்திட தெய்வ கடாட்சம் கேளிச்சடங்குகள் செய்தும் திருமணங்கள் நடக்கின்றன.

திருமணம் என்பது - ஆணும் பெண்ணுமான இருவர், நாங்கள் இணைந்து வாழ முடிவு செய்திருக்கிறோம் என்பதைப் பலருக்கும் பொதுவில் தெரிவிப்பதற்கான ஏற்பாடுதான். எனவே, இது தொடர்பான ஒப்பந்த உறுதிமொழிகளைக் கூறிக்கொண்டபின், கூட்டத்தினரைப் பார்த்து, இவர்கள் இருவரும் இன்பமாகவும் இடையூறு இல்லாமலும் இணைந்து வாழ்வதற்கு எல்லா வகையான ஊக்கமும் அளித்து திருமணப் பிணைப்பை உறுதியுடன் நீடிக்கச் செய்வீர்களா? என்ற கேள்வியைக் கேட்க வேண்டும். அவர்களின் சம்மதக் குரல் எழும்பியதும் திருமணம் முடிந்ததாக அறிவித்து விடலாம் என்கிறார்.

இறக்கும் தருவாயில் இருப்பவரிடம் நான் உங்களுக்காகப் பிரார்த்திக்கிறேன் என ஆறுதல் கூறுவதும், இறந்த பிறகு அவர் சொர்க்கம் சென்று விட்டார் என்று கூறுவதும் வழக்கமாகிவிட்டது.

சாவதற்குப் பலரும் பயப்படுகிறார்கள். சாகும் நேரத்தில் ஏற்படும் துன்பங்களிலிருந்து விடுவிக்க, கடவுளோ வேறெதுவுமோ கிட்டே வருவது கிடையாது. யார் வந்தாலும் துன்பங்களை நிரந்தரமாகத் தீர்த்திடவும் முடியாது. ஆனால், நம்மால் மதிக்கப்படும், நேசிக்கப்படும் ஒருவரது இறப்பு நிகழ்ந்து விட்டால் நாம் போய் அவர்கள் குடும்பத்தினரிடம் நான் வருந்துகிறேன், என் இரக்கங்கள், என் ஆறுதல்கள் என்கிற மாதிரியான வார்த்தைகளைக் கூறாமல், உங்கள் துன்பத்தில் நானும் பங்கு கொள்கிறேன். (I TAKE PART IN YOUR GRIEF) எனக் கூறலாம் என்கிறார். இரங்கல் தெரிவிக்கக் கூடியிருப்போரிடையே, ஒருவரோ, சிலரோ இறந்தவர் பற்றிய செய்திகளைக் கூறிப் பேசலாம். கடைசியாக, இந்த இறுதிக் கூட்டத்தில் அவரின் பூத உடலை கவுரவத்துடனும் மரியாதையுடனும் அன்புடனும் பாசத்துடனும் மதித்து, அவருடைய நினைவுகளையும் ஆற்றல்களையும் நம் நினைவில் தேக்கி அவரது உடலைப் புதைத்து/எரித்து இயற்கைச் சுழற்சிக்கு அளிக்கிறோம். மண்ணிலிருந்து மண்ணுக்கே! புழுதியிலிருந்து புழுதிக்கே! சாம்பலிலிருந்து சாம்பலுக்கே! எனப் பேசி சடங்கை நிறைவு செய்யலாம் என்கிறார்.

தம்மைப் பற்றிக் கூறும்போது, தமக்கு கடவுள், கடவுளச்சி அல்லது அமானுஷ்ய ஆற்றல் கொண்ட ஆவிகள் போன்றவற்றில் நம்பிக்கை கிடையாது என்கிறார்.

ஒரே உலகம்தான் உள்ளது, அதுதான் நாம் வாழும் உலகம், இறப்புக்கு முன்னதாக நாம் வாழும் உலகம், இறப்பிற்குப் பின் எந்த வாழ்வும், உலகமும் கிடையாது என உறுதியாகச் சொல்கிறேன் என்கிறார். ஒரே வாழ்வுதான் - கருப்பையிலிருந்து கற்குழிவரை உள்ள வாழ்வுதான் (FROM WOMB TO TOMB) நான் கடவுளுக்கு எதிர்ப்பல்ல, நான் நாத்திகன் மட்டுமல்ல நான் மானுடப் பற்றாளன் என்கிறார். கடவுள் என்கிற கருத்தியல் இல்லாமலே நன்றாக இருப்பதும் நன்றாக வாழ்வதுமே என வரையறை செய்கிறார்.

"ஓ " ஒரு ஏழை பணக்கார ஏழை ஆகின்றார்- (ஓபரா-2)

22011 இதழ்கள் -> ஜூலை 01-15

- சோம.இளங்கோவன்

ஏழை பணக்காரர் ஆவது ஆங்காங்கே நடப்பதுதான். அதில் பலர் தமது ஏழ்மையை மறைக்கப் பார்ப்பார்கள், பலர் மறந்தும் விடுவார்கள்.

ஆனால், மற்ற ஏழைகளைப் பார்த்து அவர்களின் மனம் நோகாமல் அவர்களுடன் பழகி, அவர்கள் வாழ்க்கையை முன்னேற்ற வைக்கும் பணக்கார ஏழைகள் வெகு சிலரே ! அதில் மிகவும் நேர்மையான மனதுடன் தெளிவாகவும், துணிவாகவும் செயல் பட்டுப் பல்லாயிரக்கணக்கானோர் தங்கள் வாழ்வின் ஒளிவிளக்கே என்று மனமாரப் புகழ்வது ஓப்ராவை மட்டுமே!

ஓப்ராவின் குழந்தைப் பருவம் மிகவும் ஏழ்மையும், துன்பமும் நிறைந்திருந்தது. வேண்டாத குழந்தையாக இளந்தாய்க்குப் பிறந்தவர். பாட்டி ஏழ்மையில் வளர்த்தாலும் தன்னம்பிக்கையுடன் பேச்சு, எழுத்து, பாட்டு, கிறித்துவ ஆலயம் என்று அன்புடன் வளர்த்தார். ஆனால் ஓப்ரா ஒன்பதாவது வயதிலே வீட்டு வேலை செய்த அம்மாவுடன் வாழ மில்வாக்கி நகருக்கு அனுப்பப்பட்டு விட்டார்.

அம்மா நாள் முழுதும் வேலைக்குப் போய் விடுவார். உடன் இருந்த உறவினர்களும், நண்பர்களும் இளம் ஓப்ராவை பால் வன்முறைத் தொல்லைக்கு ஆளாக்கி அலைக்கழித்துவிட்டனர். தனது 13 ஆம் வயதிலே வீட்டைவிட்டு ஓடப் பார்த்தார். ஆனால் குறைந்த வயது என்பதால் குழந்தைகள் நிறுவனத்தில் அடைக்கப்பட்டார். அவர் அடைந்த துன்பங்களை நினைவு கூர்ந்து தன்னுடைய நிகழ்ச்சியில் பலமுறைப் போராடி பில் கிளிண்டன் அமெரிக்கத் தலைவராக இருந்தபோது குழந்தைகள் பால் வன்முறையாளர்கள் எங்கே வாழ்கிறார்கள் என்று அறியும் ஓப்ரா சட்டம் என்றழைக்கப் பட்ட சட்டத்தை நிறைவேற்றினார்.

பெற்றோர்கள் ஆதரவில்லாத இளம் பெண்களுக்காக ஓப்ரா பல முறைகளில் ஆதரவும், அந்த ஆதரவளிப்போரை தனது நிகழ்ச்சிகளில் சிறப்பாகப் பாராட்டியும் உள்ளார். இளம் பெண்கள் கல்வியில் முன்னேறி தங்கள் திறமைகளை வளர்த்து வாழ்க்கையில் முன்னேற வேண்டும் என்பதே இவரது அடிப்படைக் கொள்கை. பெண்கள் தங்கள் பொருளாதாரம் பற்றிய அறிவைப் பெருக்கி எது முக்கியம், எது முக்கியமில்லை, எப்படிச் சிக்கனமாக வாழ வேண்டும், ஏன் கட்டாயமாகச் சேமிக்க வேண்டும் என்பதையெல்லாம் உணரவைத்தார்.

சூசன் ஆர்மன் என்றொரு பெண் தனது வாழ்க்கையின் பொருளாதாரச் சீர்குலைவும் பின் எப்படி முன்னேறி வந்தார் என்று சொல்லியும் எழுதியும் வந்தார். அது நல்ல வழி முறைகள் நிறைந்திருந்ததைப் பார்த்த ஓப்ரா அவரை தனது நிகழ்ச்சியில் பங்கேற்க வைத்தார். அவர் உடனே மிகவும் புகழ் பெற்றது மட்டுமல்லாமல் பல லட்சம் நூல்கள் விற்றார். அதனால் பல லட்சம் பேர் ஆண்களும், பெண்களும், குடும்பங்களும் தங்கள் பொருளாதாரச் சிக்கல்களிலிருந்து வெளியேறி வாழ்க்கை யில் முன்னேறியதுதான் மிகவும் முக்கியம்.

சூசன் ஆர்மன் ஓப்ரா தன் வாழ்க்கை யையே மாற்றிவிட்டார் என்பதல்லாமல் பலர் கூறும் கூற்றைச் சொன்னார்.

"இது எங்களுக்கு ஒரு நிகழ்ச்சியல்ல. எங்கள் வாழ்க்கையை நல்ல வழியில் உருமாற்றி விட்ட திருப்பு முனை என்று நெஞ்சார வாழ்த்தியது தான் மிகவும் முக்கியம்" என்று சொல்லிப் பெருமைப்பட்டார்.

இது ஒரு துறையென்று இல்லை. இந்த மாதிரி வாழ்வின் பல துறைகளில் உடல் நலம், உறவுகள், மன நலம், முன்னேற்றம், கல்வி, தொழில் என்று ஏழைகள், முக்கியமாக பெண்கள் தன்னம்பிக்கையுடனும், தன்முனைப்புடனும் வாழும் வழிகள் என்று தனது நிகழ்ச்சிகளை மக்களின் வாழ்க்கைத் தடத்தைச் செப்பனிட்டு முன்னேற்றும் மனிதநேயப் பாதையில் கொண்டு செல்வதுதான் மிகவும் போற்றப்படுகின்றது. போற்றாத பத்திரிகைகளே இல்லை, தொலைக்காட்சி நிகழ்ச்சிகளே இல்லை. அடையாத பரிசுகளும், பட்டங்களும் இல்லை என்று புகழின் உச்சக் கட்டத்தில் நிற்கின்றார். குற்றம் குறை கூறுபவர்களையும் நிகழ்ச்சிக்கு அழைத்து அவர்களுடன் பேசித் தீர்த்துக் கொள்ளும் மனப்பக்குவம் அடைந்தவர்.

பெண்களுக்கு, அதுவும் ஏதாவது தொழில் தொடங்கி முன்னேற வேண்டும் என்று துடிக்கும் ஏழைப் பெண்களுக்கு முக்கியத்துவம் கொடுத்து அவர்களை நிகழ்ச்சியில் பங்கேற்க வைப்பார். நல்ல கேள்விகளைக் கேட்பார். அது மற்றவர்களுக்குப் பாடமாக அமையும். இந்த நிகழ்ச்சியில் கலந்து கொண்ட உடனேயே அவர்களின் தொழில் சில நாட்களிலேயே பெருவளர்ச்சி அடைந்துவிடும். இந்த மாதிரி ஒருவர், இருவர் என்று அல்ல, பலர் பல துறைகளிலே. ஆனால், மக்களுக்குத் தேவையான துறைகளிலே அறிமுகப்படுத்தப்பட்டுள்ளனர். கோடிசுவரர்கள் ஆகியுள்ளனர்.

அதைவிட முக்கியம் ஏழை மக்களின் பழக்க வழக்கங்களை மாற்றுவது. பணக்கார நாடான அமெரிக்காவிலே ஏழைககாட்டி விளக்கினார். இது ஏழைகளுக்கு மட்டுமன்றி உடல் நலத்துடன் நள் பல்லாயிரக் கணக்கில் உள்ளனர் என்பது உண்மை. அவர்களுக்கு அரசு வாரம் 40 டாலர்கள் சாப்பாட்டிற்காகத் தருகிறது.

அந்த 40 டாலர்களிலே எப்படி நல்ல உணவை வாங்கிச் சாப்பிட முடியும்? ஓப்ரா பெரிகோன் என்ற பெரிய பேராசிரியரை அழைத்து மக்களுக்குக் காண்பித்தார். என்ன உணவுகள் நல்ல குறைந்த விலையில் வாங்கக்கூடிய சிறந்த ஆனால் சுவைபட உண்ணக்கூடியவை என்று ன்றாக வாழ விரும்புபவர்களுக்கும், எடை குறைக்க வேண்டியவர்களுக்கும் மிக்க பயனுள்ள நிகழ்ச்சியாக அமைந்து போற்றப்பட்டது.

பணக்கார ஓப்ரா இந்த ஏழை உணவுவகைகளைத் தானே உண்டு அதன் பயன்களைத் தெரிவித்தார்.

இரண்டரை பில்லியன் டாலர் ( சுமார் 12,500 கோடி ரூபாய்) சொத்துக்கு உரியவராக இருந்தாலும் மரத்தடியில் அமர்ந்து புத்தகம் படிப்பதுதான் பேரின்பம் என்ற உண்மையை உணர்ந்து அனுபவிப்பவர். அதைக் கொஞ்சமும் தயக்கமில்லாமல் சொல்லுபவர். நம்மிடம் எவ்வளவு இருக்கின்றது என்பதல்ல. வாழ்க்கையில் நம்மிடம் கொடுப்பதற்கு என்ன இருக்கின்றது என்பதுதான்! என்று சொல்லிலும் செயலிலும் காட்டும் பணக்கார ஏழை, பெருங்கொடை வள்ளல் ஓப்ரா உலகின் ஒப்பற்ற " ஓ" தான்.

(தொடரும்)

"ஓ" ஆப்பிரிக்காவில் அதிசயம் - 4

- சோம.இளங்கோவன்

ஆப்பிரிக்கா என்ற உடனேயே பலருக்கு மனதில் தோன்றுவது இருண்ட கண்டமும், சிங்கம், புலி, யானைகளும் நிறைந்த காட்சிகளுந்தான். ஏன், அய்ம்பது ஆண்டுகளுக்கு முன் இந்தியா என்றாலே மேல் நாட்டில் பலர் பாம்பு, யானை நிறைந்த கிராமங்கள் என்றுதான் நினைத்திருந்தனர்.

நைல் நதிக்கரையிலே எகிப்திய நாகரிகம் ஓங்கி வளர்ந்து, இன்று உலகம் அதிசயிக்கும் பெரிய பெரிய பிரமிடுகள் உள்ள எகிப்தும் ஆப்பிரிக் காதான். மனித இனம் முதன் முதலில் தோன்றி யதே ஆப்பி ரிக்கா என்று தான் இன்று தெரிய வருகிறது. கருப்பின மக்கள் தங்கள் கூட்டு வாழ்க்கையில் பல கூறுகளாக வாழ்கின்றனர். கென்யா, தென்ஆப்பிரிக்கா மற்றும் பல ஆப்பிரிக்க நாடுகள் பல உலகத் தலைவர்களைத் தந்துள்ளன.

வட அமெரிக்காவிலே 1977இல் அலெக்சு ஃகேலி என்பவர் எழுதிய ஆராய்ச்சி நூல் வேர்கள் (Roots). அது தொலைக்காட்சிப் படமாக்கப்பட்டு 36 விருதுகள் பெற்றது. அது பெரிய தாக்கத்தை ஏற்படுத்திவிட்டது. நீக்ரோ என்றழைப்பதை ஒழித்து ஆப்பிரிக்க அமெரிக்கர்கள் என்ற புதிய தாக்கத்தைச் சொல்லில் மட்டுமல்லாது மனதளவிலும் உருவாக்கிவிட்டது. தென் ஆப்பிரிக்க இனப் போராட்டம் அமெரிக்காவின் தெருக்களிலும், கல்லூரிகளிலும் தாக்கத்தை உண்டாக்கி "தென் ஆப்பிரிக்காவை ஒதுக்குங்கள்" போராட்டம் வலுவுற்றது. நெல்சன் மண்டேலா தீவிரவாதியாக அமெரிக்க அரசால் முத்திரை குத்தப்பட்டிருந்தாலும் அவர் விடுதலைக்காக அமெரிக்காவின் பெரும்பாலானோர் போராடி னார்கள். அவரது விடுதலை அமெரிக்கக் கருப்பினத்தைச் சுயமரியாதையுடனும், கருப்பில் பெருமை என்றும் வாழ வளர வழிகாட்டி விட்டது. அந்த மாபெரும் தலைவர் ஓப்ரா வின்பிரியீடம் ஆப்பிரிக்கப் பெண்களுக்காக நல்ல முயற்சி செய்ய வேண்டும் என்று கேட்டுக் கொண்டார்.

ஓப்ரா வின்பிரி ஆழ்ந்து சிந்தித்து ஒரு அற்புதத்தை ஆப்பிரிக்காவில் ஏற்படுத்தினார். 52 ஏக்கர் பரப்பளவிலே, 28 அழகான இந்த நூற்றாண்டின் சிறந்த வகுப்பறைகள், கணினி மய்யங்கள், இரண்டு அற்புதமான அரங்கங்கள், இசை மன்றங்கள் என்று கனவில்கூட அந்தக் குழந்தைகள் நினைத்துப் பார்க்க முடியாத பெண்கள் தலைமைத்துவப் பயிற்சிப் பள்ளி என்ற மாணவியர் பள்ளி 2007இல் நெல்சன் மண்டேலா, மற்றும் இங்கிலாந்து, உலகப் பெரிய பாடகர்கள் கலந்து கொள்ளத் திறக்கப்பட்டது. ஓப்ராவின் கொடை நிறுவனத்தால் 40 மில்லியன் டாலர்களில் அய்ந்து நட்சத்திர ஓட்டல் போன்ற அந்த மாணவியர் தங்கிப் படிக்கும் எதிர்காலத் தலைமைகளை உருவாக்கும் கருவறை தொடங்கப்பட்டது.

பெண்கள் தலைமைத்துவப் பயிற்சிப் பள்ளியில் ஓப்ரா

இவ்வளவு ஆடம்பரப் பள்ளி அவசியமா? இந்தப் பணத்தை வேறு நல்ல முறையில் பயன்படுத்தியிருக்கலாமே என்று குறை சொன்னார்கள். நெல்சன் மண்டேலா தனது உரையில் தன்னம்பிக்கை குறைந்த, சமமான சந்தர்ப்பங்கள் அளிக்கப்படாத இந்த ஏழை, எளிய, நலிந்த பெண் குழந்தைகள் நன்கு பயிற்சி பெற்று பெரிய தலைவர்கள் ஆவார்கள். இங்கு நான் பலருடைய ஒளி மிகுந்த கண்களிலே பல வருங்கால ஓப்ரா வின்பிரீகளை இப்போதே பார்க்கின்றேன் என்றார். இந்த அரிய சந்தர்ப்பமும், சூழ்நிலையும் ஆப்பிரிக்காவையே மாற்ற வழி வகுக்கும் என்றார். அமெரிக்கத் தலைவர் பில் கிளிண்டன் இதன் தாக்கம் ஆப்பிரிக்காவையே மாற்றி அமைக்கப் போகின்றது. இதைச் செய்த ஓப்ராவின் திறமையே தனித்தன்மை வாய்ந்தது என்றார். இதைச் செய்ய உங்களுக்கு எப்படித் தோன்றியது என்று பில் கிளிண்டன் ஓப்ராவைக் கேட்டார். அதற்கு ஓப்ரா, ஆசிரியர்கள்தான் மிகவும் முக்கியமானவர்கள். எனது வாழ்க்கையை மாற்றி அமைத்தவரே ஒரு ஆசிரியர்தான். அந்தச் சந்தர்ப்பம் இந்தக் குழந்தைகளைக் கட்டாயம் மாற்றும் என்றார்.

இந்தப் பள்ளி ஆரம்பித்ததிலிருந்தே பல் துறைகளிலே பெருஞ்சாதனைகளைப் படைத்துக் காட்டியுள்ளது. உலக அளவிலே போட்டியிட்டுப் பல வெற்றிகளைப் படைத்துள்ளது. கணிதத்தில், அறிவியலில், பேச்சுப் போட்டியில், கலைகளில் என்று பல்வேறு உலக அளவிலே பங்கேற்று பரிசுகள் பெற்றுள்ளனர். இதிலே படிக்கும் மாணவிகள் பலர் எளிய சூழ்நிலையில், இன்னும் எய்ட்ஸ் நோய் பாதிக்கப்பட்ட குடும்பத்தைச் சேர்ந்தவர்கள். சரியான பயிற்சியும் சந்தர்ப்பமும் அளிக்கப்பட்டால் இவர்கள் சாதிக்கக் கூடிய வர்கள் என்பதைக் காட்டியுள்ளனர்.

இந்தப் பள்ளியின் கல்வி முறையே வேறுபட்டது. மாணவர்கள் சேர்ந்து பயில்வதும், புரியாததை மற்ற மாணவர்களே அவர்களுக்குப் புரிய வைப்பதுமான கூட்டுக் கல்வி முறை. அனைத்திலும் ஒரு புதிய அகன்ற நோக்குள்ள பயிற்சி. கலை, நாட்டியம், நாடகம், இசை இவை முக்கியப் பங்கு வகிக்கின்றன. தலைவர்களாக வரத் தயாராக பொது அறிவு, பேச்சுத் திறமை, எழுத்துத் திறமையை வளர்த்தல் என்று அதுவே ஒரு தனிச் சிறப்பு வாய்ந்த பயிற்சி ஆக்கப்பட்டுள்ளது.

அனைத்திற்கும் மேலாக ஒவ்வொரு மாணவரும் 3,000 மணிகள் போல சமுதாயப் பயிற்சி பெறுகின்றனர். முதியோர், உடல் நலமில்லாதவர்கள், கிராமத்துப் பெண்கள் இவர்களுக்கு உதவுதல், பயிற்சிகள் அளித்தல் போன்றவற்றைச் செய்கின்றனர். 2007இல் இந்தப் பள்ளி ஆரம்பிக்கப்பட்டது. 2008லேயே இந்தப் பள்ளி மாணவிகள் காய்கறிகள் வளர்ப்பது, மார்பகப் புற்று நோய் தடுப்பது பற்றிப் பெண்களுக்கு எடுத்துச் சொல்லுதல், ஆதரவற்றவர்கள் விடுதிகளுக்குச் சென்று பணி செய்தல் போன்றவற்றைச் செய்துள்ளனர்.

அலெக்சு ஃகேலி

2009இல் பெரிய எய்ட்ஸ் விழிப்புணர்வுப் பயிற்சி நடத்தினார்கள். 30 பள்ளிகளிலிருந்து 100 குழந்தைகளை வரவழைத்து அவர்களுக்குப் பயிற்சிகள் அளித்தனர். அவர்களுடைய புத்துலக அரங்கிலே பசுமைப் புரட்சிபற்றி நாட்டிய, கலை நிகழ்ச்சிகளை நடத்தினார்கள். அதிலே ஒரு எளிய குடும்பத்திலிருந்து வந்த பெண் அவரது குடும்பச் சூழ்நிலையை வருணித்து தான் எப்படி முன்னேறி நோபல் பரிசு வாங்கப் போகின்றேன் என்று சொன்னதைக் கேட்ட ஓப்ரா அப்படியே உருகிப் போய் அந்தப் பெண் குழந்தையைக் கட்டித் தழுவிப் பெருமைப் பட்டார். இங்கிலாந்து மற்றும் பிற நாட்டுப் பாடகர்கள், நடிகர்கள் அங்கே வந்து பங்கேற்றுள்ளனர். மற்றும் கலை மூலம் எதிர்கால வாழ்க்கை, எப்படி அனைத்தையும் குப்பையாக்காமல் மறுபடி பயன்படுத்த வேண்டும் என்பதை விளக்கியுள்ளனர். ஆகஸ்ட் 2009இல் 44 நாடுகளிலிருந்து போட்டியிட்டு இரண்டு குழந்தைகள் அமெரிக்க பாசுடன் நகரிலே நடந்த பெண்கள் தலைமைத்துவ மாநாட்டில் பங்கேற்றனர். 16 வயது டெப்ரா இளம் பெண்கள் கருத்தரிப்பு, பெண்கள் அனுபவிக்கும் குடும்ப வன்முறை, பெண்களுக்கு மறுக்கப்படும் உரிமைகள் என்பதைப்பற்றிய கட்டுரைப் போட்டியில் பங்கேற்று வெற்றி பெற்றார்.

2010இல் ஃகேபிடட் ஃபார் ஃகுயுமேனிட்டி (Habitat for Humanity) என்ற உலக அமைப்புடன் சேர்ந்து ஏழைகளுக்கு வீடுகள் கட்டிக் கொடுக்கும் திட்டத்தில் 225 மாணவிகள் சுண்ணாம்பு, கற்கள் என்று அனைத்திலும் பங்கு பெற்று உழைத்தனர்.

இதையெல்லாம் அதிசயம் என்று நினைக்கலாம். ஆனால் இதற்கும் மேலே ஒரு அதிசயம் நடந்துள்ளது. இவரது பள்ளியிலே பணிபுரியும் ஒரு பெண் ஊழியர் குழந்தைகளைத் துன்புறுத்தியுள்ளார் என்று குற்றம் சுமத்தப்பட்டது. உடனே ஓப்ரா தனது அனைத்து முக்கிய அலுவல்களையும் தள்ளி வைத்துவிட்டு அமெரிக்காவிலிருந்து நேரே சென்று ஏழு குழந்தைகளையும் விசாரித்தார். அவர்கள் பெற்றோருடன் பேசினார். அந்தக் குழந்தைகள் ஒவ்வொருவருக்கும் செல் பேசியைக் கொடுத்து தனது எண்ணையும் கொடுத்து ஏதாவது நடந்தால் என்னை நேரே கூப்பிடுங்கள் என்று சொன்னார்.

ஓ வென்ற அதிசயம் ஆப்பிரிக்காவை மட்டுமல்ல உலகத்தையே அதிசயிக்க வைத்தது.

- (தொடரும்)

" ஓ' அமெரிக்காவில் நிற வெறிப் போராட்ட வெற்றிகள்!

- சோம.இளங்கோவன்

ஓப்ராவின் நிகழ்வுகளில் முக்கிய இடம் பிடித்த நாட்களில் ஒன்று மே 4, 2011 ஆகும்.

மேடையிலே 178 பேர். ஆண்கள், பெண்கள், கருப்பு, வெள்ளை, இளையவர், முதியவர் , ஆனால் அனைவரும்

வெற்றி வீரர்கள், சாதனையாளர்கள். ஆம், 50 ஆண்டுகளுக்கு முன்னே தங்கள் உயிர்களைப் பணயம் வைத்தவர்கள். அவர்களுக்குப் பாராட்டு விழா நடத்தினார் ஓப்ரா வின்ஃபிரி.

அப்படி என்ன அவர்கள் சாதித்து விட்டார்கள் ? அது சாதனை மட்டுமல்ல சரித்திரமும் கூட !

மே 4, 1961 தலைநகர் வாசிங்டனிலிருந்து 13 பேர் ஆண்களும், பெண்களும், 5 கருப்பரும், 8 வெள்ளையருமாக இரண்டு பொதுப் பேருந்துகளில் ஏறிச் செல்கின்றனர். தென் கோடியில் உள்ள நியூ ஆர்லியன்சு மாநகருக்குச் செல்லத் திட்டம், எவ்வளவு தூரம் போக முடியும் என்பது அவர்களுக்கே தெரியாது.

1954லிலே அமெரிக்காவின் உச்ச நீதிமன்றம் சரித்திரப் புகழ் பெற்ற பிரவுன் கல்வி நிறுவனங்கள் வழக்கிலே தீர்ப்பளித்துவிட்டது. நூறாண்டுகளுக்கு முன்னரே ஆபிரகாம் லிங்கன் பல்லாயிரம் மக்கள் இழப்பிலே தெற்கிலே இருந்த அடிமைகளை விடுவித்துவிட்டார். அனைவரும் சமம், சட்டத்திலே. ரோசா பார்க் அம்மையார் 1955 இல் பேருந்திலே கருப்பர்கள் எங்கு வேண்டுமானாலும் அமரலாம், வெள்ளையர்களுக்காக எழுந்து இடங்கொடுக்க வேண்டிய அவசியமில்லை என்று போராடி வெற்றி பெற்றுவிட்டார். அமெரிக்கப் பள்ளியிலே கருப்பு மாணவர்கள் நுழையக் கூடாது என்பதை அய்சனோஃவர் படையை அனுப்பிச் சரி செய்துவிட்டார். அமெரிக்காவின் முதல் கத்தோலிக்கர் ஜான் கென்னடி தலைவராகத் தேர்ந்தெடுக்கப்பட்டு விட்டார்.

மிகவும் முற்போக்குவாதியாகக் கருதப்பட்டார். ஆனால், தென் மாநிலங்களிலே நிற வெறி தாண்டவமாடியது. பேருந்திலே சேர்ந்து உட்கார முடியாது. கழிவறைகள் தனித்தனிதான். சேர்ந்து உணவகங்களிலே உண்ண முடியாது. கருப்பர்கள் சாப்பாட்டை வெளியே இருந்து வாங்கி, வெளியே தரையிலே அமர்ந்து உண்ணும் பரிதாபம். இதற்கு முடிவு கட்டக் கிளம்பியவர்கள்தான் அந்தப் பதின்மூவர்.

அவர்களுக்கு " சமத்துவப் பேராயம் " என்ற அமைப்பு நல்ல பயிற்சி கொடுத்து அனுப்புகின்றது. உயிருடன் திரும்புவது நிச்சயமல்ல என்பதை நன்கு அறிந்துதான் துணிவுடன் செல்கின்றார்கள். தலைநகர் வாசிங்டனிலிருந்து நிறவெறி ததும்பிய தென் மாநிலங்களைக் கடந்து செல்ல வேண்டும். அமெரிக்கா ஒரு நாடாக இருந்த போதும் மாநிலங்களின் அதிகாரம் சிறப்பானவை. அந்தந்த மாநில அரசுகளுக்குச் சட்ட திட்டங்கள் உண்டு. 50 அய்க்கிய நாடுகள் சேர்ந்ததுதான் அமெரிக்கா.

ஆகவே அந்தந்த மாநிலங்கள் தனி நாடுகள் போன்றுதான் சட்டங்கள். அங்கே அரசாளுவோர் நிறவெறி கொண்ட தலைவர்கள்தாம். கூ கிளக்சு கிளான் என்ற வெள்ளை உடையும், முகமூடியும் அணிந்த நிறவெறிக் கூட்டம் தலைவிரித்தாடும் இடங்கள்தாம் தென் மாநிலங்கள். அதிலே பலி கிடாக்களாக இந்தப் பதின்மூன்று பேர்.

ஆரம்பத்திலே தொந்தரவு இல்லாமல் சென்றுவிட்டனர். ஆனால் இவர்கள் இரண்டு பேருந்துகளிலே கருப்பும், வெள்ளையும் ஒன்றாக அமர்ந்து வருகின்றனர். ஒன்றாக உணவருந்தி வருகின்றனர். கழிவறைகளிலே வெள்ளையர் கழிவறைகளைப் பயன்படுத்துகின்றனர் என்ற செய்தி காட்டுத் தீயாகப் பரவிவிட்டது. நிறவெறி வெள்ளையர்கள் கொலை வெறியுடன் இருக்கின்றார்கள். இந்தப் பதின்மூன்று பேருக்கு மார்ட்டின் லூதர் கிங் வரவேற்பு கொடுக்கின்றார். அவரைக்கூட வரச் சொல்கின்றார்கள். அவரோ, இவர்களைத் தொடர்ந்து செல்ல வேண்டாம் என்று கைவிடச் சொல்கின்றார். உயிருக்குத் துணிந்த இவர்கள் தொடர்ந்து செல்வதென்று விடுதலைச் சவாரி" என்று தொடர்கின்றனர்.

தென் மாநிலங்களின் முதல் எல்லையாக அலபாமா மாநிலத்தின் எல்லை அனிச்டன் என்ற ஊரில் நுழைகின்றனர். கும்பல் சூழ்ந்து கொண்டு பேருந்தை அடித்து நொறுக்குகின்றனர். ஓட்டுநர் காரை ஓட்டவிடாமல் டயரை வீணாக்கி விடுகின்றனர். ஓட்டுநர் தாழ்ப்பாள் போட்டுப் பூட்டிவிட்டு உதவிக்காகச் செல்கின்றார். உள்ளே நுழைய முடியாது என்று நம்பி உள்ளே இருப்பவர்கள் கல்லெறியிலிருந்து காப்பாற்றிக் கொஞ்சம் துணிவுடன் இருக்கின்றனர். அப்போது வெளியிலிருந்து அவர்கள் தயாரித்த கைக்குண்டுகளைப் பேருந்தின் உள்ளே வீசுகின்றனர். உள்ளே ஒரே புகையும் நெருப்பும், கதவோ பூட்டப்பட்டுவிட்டது.

சாவதுதான் வழி என்று நினைத்தபோது பேருந்தின் பெட்ரோல் டேங்க் வெடிக்கின்றது. அனைவரும் வெளியே தூக்கி எறியப்படுகின்றனர். கேஃங் தாமசு என்ற கருப்பு இளைஞருக்கும் அவருடன் உயிர் தப்பிய ஜெனவீவ் க்ஃயூசு என்ற வெள்ளை அம்மையாருக்கும் அடி விழுகின்றது.

இவர்களை வேடிக்கை பார்த்துக் கொண்டிருந்த 13 வயது வெள்ளைப் பெண் ஜேனி பொஃர்சைத் ஓடி வந்து உதவி குடிக்கத் தண்ணீர் கொடுக்கின்றார். "கூ கிளக்சு கிளான்" என்ன செய்தாலும் பரவாயில்லை என்று மனிதாபிமானத்துடன் உதவி செய்கின்றார். பின்னாட்களில் அமெரிக்கப் பாராளுமன்ற உறுப்பினராக வந்த ஜான் லூயிசு என்பவரை எல்வின் வில்சன் என்ற வெள்ளை நிற வெறியர் அடித்து நொறுக்குகின்றார். அவர் அங்கே அதிகாரி. கடைசியில் அவர், லூயிசிடம் புகார் செய்வதென்றால் நீ புகார் செய்யலாம் என்கின்றார். லூயிசோ நான் இங்கே யாரையும் தொந்தரவு செய்ய வரவில்லை, அனைவரும் அன்புடன் சேர்ந்து வாழ வேண்டும் என்றுதான் விரும்புகின்றேன் என்றாராம். அமெரிக்கப் போர் வீரர்கள் வாசிங்டன் தலைநகருக்குக் கட்டுப்பட்ட போராளிகள் வந்து காப்பாற்றி அடுத்த மாநிலம் டென்னசியில் நாச்வில்லுக்குக் கொண்டு செல்கின்றனர்.

போராட்டம் முடிந்து விட்டது என்று நிற வெறியர்கள் குதூகலிக் கின்றனர்.

இந்தப் போராட் டத்தைப் பற்றிக் கேள் விப்பட்ட பலரும் கலந்து கொள்ள வருகின்றனர். முக்கியமாகக் கல்லூரி மாணவர்கள் வருகின் றனர். சிகாகோவைச் சேர்ந்தவர் டயான் நாச் எனும் வெள்ளைப் பெண்மணி. அவர் 21 மாணவர்களுடன் போராட்டத்தில் குதிக்கின்றார். அமெரிக்காவின் சட்ட மந்திரியான ராபர்ட் கென்னடி அவரது துணைச் சட்ட ஆணையரை அழைத்து அந்தப் பெண்ணுடன் பேசிப் போராட்டத்தை நிறுத்தச் சொல்கின்றார். உங்கள் உயிர்களுக்கே ஆபத்து என்று அச்சுறுத்துகின்றார். அந்தப் பெண்ணோ, நாங்கள் எங்கள் உயில்களை எழுதி வைத்து விட்டுச் சாகத்தான் இங்கு வந்துள்ளோம் என்று பதிலளிக்கின்றார். இயக்கத்தின் தலைவர்களில் ஒருவரான ராபர்ட் அபர்நாத்திடம் ராபர்ட் கென்னடி இந்த "விடுதலைச் சவாரி" இயக்கம் உலக அளவிலே அமெரிக்காவிற்கு அவமானமாக இருக்கின்றது என்று சொன்னபோது அவர், "எங்களுக்கு இவ்வளவு காலமாக வாழ்க்கையே அவமானமாகத்தான் இருந்து வந்திருக்கின்றது என்பது அவருக்குத் தெரியாதா?" என்று சொன்னாராம். நியூயார்க் கார்னல் பல்கலைக்கழகம், மற்றும் பல பல்கலைக்கழக மாணவர்கள் மற்றும் பல்துறை வல்லுநர்கள், பொதுமக்கள் என்று 436 பேர் சேர்ந்து விட்டனர் அங்கே. அதிலே மூன்றில் ஒரு பங்குதான் கருப்பின மக்கள். மீதி அனைவரும் வெள்ளையர்கள். அவர்கள் தொடர்ந்து போராடிச் சென்றனர். மிகவும் பின்தங்கிய வெள்ளை வெறிபிடித்த ஓப்ராவின் மாநிலமான மிசிசிப்பியில் மிகவும் மோசமான சிறைச்சாலையிலே 4 பேர் தங்கும் அறையிலே 40 பேர் என்று அடைக்கப்பட்டனர். அங்கேயும் தொடர்ந்து இன வேறுபாடின்றி அவர்கள் ஒன்றாக இருந்ததைக் கண்டு மாநில ஆட்சியாளர் கொதித்துப் போனார். துன்புறுத்தப்பட்டனர். அங்கே அவர்கள் பாடிக் கொண்டே இருந்தனர். அவர்களை ஒன்றும் செய்ய முடியாமல் தவித்தனர் வெறி பிடித்தவர்கள்.

கடைசியாக செப்டம்பர் 22, 1961இல் மாநில வர்த்தக ஆணையர் சட்டப்படி ஒரு மாநிலத்திலிருந்து மற்றொரு மாநிலத்திற்கு வருபவர்களுக்கு மாநில அரசு சட்டப்படியல்லாமல் அமெரிக்கப் பொதுச் சட்டப்படி உரிமைகள் வழங்க வேண்டும், பொது இடங்களில் அனைவரும் சமமாக நடத்தப்பட வேண்டும் என்ற சட்டம் அமலுக்கு வந்தது. அந்தப் போராட்டத்தில் 1961இல் கலந்து கொண்டவர்களில் உயிருடன் உள்ள 178 பேர்கள்தான் ஓப்ராவின் சிறப்பு நிகழ்ச்சியில் பங்கேற்றவர்கள். இதில் 95 வயதானவர் ஒருவர், அவரும் கலந்து கொண்டார். அதைவிடப் பெரிய அதிசயங்கள் நடத்தியுள்ளார் அதிசயங்களின் சிகரமான "ஓ".

13 வயது வெள்ளைப் பெண்ணாக தவித்த வாய்க்குத் தண்ணீர் தந்த ஜெனி பொஃர்சைத் ரகசியமாக அழைக்கப்பட்டிருந்தார். அவரை மேடைக்கு அழைத்து, அவரிடம் தண்ணீர் குடித்த கருப்பர் ஃகேங் தாமசு அறிமுகப் படுத்தப்பட்டார். இருவரும் உணர்ச்சியுடன் கட்டிப்பிடித்துத் தழுவிக்கொண்ட காட்சி அற்புதமான காட்சி.

ஜான் லூயிசை அடித்த எல்வின் வில்சனும் வந்து அவரிடம் 2009இல் மன்னிப்புக் கேட்டுக் கொண்டதைச் சொன்னார். அவர்கள் இருவரிடமும் ஓப்ரா கேள்விகளைக் கேட்டார்.

கல்லூரி மாணவர்களைத் திரட்டிப் போராட்டத்தை வெற்றி பெறச் செய்த வெள்ளைப் பெண்மணி டயான் நாச் அனைவருக்கும் அறிமுகப்படுத்தப்பட்டார் !

கருப்பரும், வெள்ளையரும் இன்னும் முழுக்கச் சரிசமமாக வாழ முடியாவிட்டாலும் அமெரிக்கா ஒரு கருப்பு ஒபாமாவைத் தலைவராகத் தேர்ந்தெடுத்ததில் " ஓ' வின் பங்கு மிகவும் அதிகம் என்பதை அனைவரும் ஒத்துக் கொள்கின்றனர்.

தமிழகத்திற்கும் ஒரு " விடுதலைச் சவாரி" இன்னும் தேவை என்பதை இளைய தலை முறை நடத்திக் காட்டினால் தந்தை பெரியாரின் ஆசை நிறைவேறும்.

"அநியாயம் எங்காவது நடந்தாலும் அது நியாயம் எங்கும் நிலைத்திருப்பதற்கு ஆபத்தை உண்டாக்கும் மார்ட்டின் லூதர் கிங் சொன்னதை நினைப்போம் என்று நிகழ்ச்சியை முடித்தார் "ஓ".

2011 இதழ்கள் -> ஜூலை 16-31இவர் பகுத்தறிவாளர் : கேத்தரின் ஹேப்பர்ன்

2011உண்மை இதழ்கள் -> ஜூலை 16-31

இவர் பகுத்தறிவாளர்

பெயர் : கேத்தரின் ஹேப்பர்ன்

பிறப்பு : 12/05/1907

இறப்பு : 29/06/2003

நாடு : அமெரிக்கா

துறை : நடிப்புத்துறை

இவர் அமெரிக்காவைச் சேர்ந்த திரைப்பட நடிகை. தனது வாழ்க்கையை மேடை நாடகங்களில் இருந்து ஆரம்பித்தவர். பின்னர் 1932ஆம் ஆண்டு திரைத்துறையில் அடியெடுத்து வைத்தார். தொலைக்காட்சிகளிலும் நடித்துள்ளார். இவர் நடித்த சாங் ஆப் லவ், சீ ஓப் கிராஸ் போன்ற படங்கள் வசூலில் சாதனை படைத்தன. பெற்ற விருதுகள்: இவர் சிறந்த நடிகைக்கான ஆஸ்கார் விருதுகளை 4 முறை பெற்றவர்.

மேலும், 1976 இல் புகழ் பெற்ற எம்மி விருது மற்றும் கோல்டன் குலோபஸ் விருது பெற்றுள்ளார். இத்துடன் அமெரிக்க திரைப்படக் கல்லூரியின் மிகச் சிறந்த நடிகையாகத் தேர்ந்தெடுக்கப்பட்டவர்.

இது அந்நாட்டுத் திரைப்பட வரலாற்றில் குறிப்பிடத்தக்க நிகழ்வாகக் கருதப்படுகிறது.

நாத்திகக் குத்து: நான் ஒரு பகுத்தறிவுவாதி.எனக்குள்ள ஒரே ஆசையெல்லாம் இந்த மக்கள் நாத்திகச் சிந்தனையோடு வாழ்ந்து பிறர்மீது அன்பு செலுத்தி அவர்களுக்கு அதன் மூலம் ஏதாவது நன்மை செய்ய வேண்டும் என்பதே.

புருனோ

உலப்பகுத்தறிவாளர் : கிறிஸ்டோஃபர் ஹிட்சென்ஸ்

உலப்பகுத்தறிவாளர்

கிறிஸ்டோஃபர் ஹிட்சென்ஸ்

இறைவன் மிகப் பெரியவன் என்பார்கள். இந்த வாசகங்கள் எழுதப்பட்ட சரக்குந்துகள் சாலையோரங்களில் தலைகுப்புற விழுந்து கிடக்கும் காட்சிகளும் சர்வ சாதாரணம், தமிழ்நாட்டில்! கடவுள் ஒன்றும் பெரிய ஆள் அல்ல (GOD IS NOT GREAT) என்ற தலைப்பில் ஒரு நூல் 2007 இல் வெளிவந்து கடவுள் நம்பிக்கையாளர்களை ஒரு கலக்குக் கலக்கியது. அந்நூலாசிரியர் கிறிஸ்டோஃபர் ஹிட்சென்ஸ் என்பவர் 63 வயதான அமெரிக்கர்.

1949 ஆம் ஆண்டில் ஏப்ரல் 13 ஆம் நாளில் இங்கிலாந்து நாட்டில் போர்ட்ஸ் மவுத் எனும் ஊரில் பிறந்து, ஆக்ஸ்போர்டு பல்லியால் கல்லூரியில் பயின்று இதழாளராகவும் நூலாசிரியராகவும் செயல்பட்டு அமெரிக்காவில் நிரந்தரமாக வசிப்பவர் ஹிட்சென்ஸ். தி அட்லான்டிக், வானிடிஃபேர், ஸ்லேட், வொர்ல்டு அஃபேர்ஸ், தி நேஷன், ஃபிரீ என்கொயரி போன்ற பல ஏடுகளில் எழுதி வருபவர், தொலைக்காட்சிகளில் டாக் ஷோ (TALK SHOW), விவாதங்கள் போன்றவற்றில் பங்குபெற்று தம் நாத்திக முத்திரையைப் பதித்து வருபவர். 2005 ஆம் ஆண்டில் நடத்தப்பெற்ற அயல்நாட்டுக் கொள்கை வாக்கெடுப்பில் இவர் பெயரும் போட்டியில் சேர்க்கப்பட்டு, டாப் 5 இல் இவரும் ஒருவராக உலக அளவில் தேர்ந்தெடுக்கப்பட்டவர் என்பதே இவருக்கும் இவரது கொள்கைக்கும் கிடைத்த பெருமையைப் பறைசாற்றும். இவரது புகழ் இவர் பிறந்த பிரிட்டனிலும் வாழ்ந்துவரும் அமெரிக்காவிலும் இடதுசாரிக் கருத்தாளர்களிடையே பரவலான செல்வாக்கைப் பெற்றுள்ளது ஆனாலும் அரசியல் இடதுசாரிகள் எனப்படுவோர் மத்தியிலிருந்து இவர் வேறுபட்டுக் காட்சியளிக்கும் நிலை 1989 இல் ஏற்பட்டது. புகழ்பெற்ற பகுத்தறிவு எழுத்தாளரான சல்மான் ருஷ்டி எழுதிய சாத்தானின் கவிதைகள் நூலுக்காக அவருக்கு மரணதண்டனை விதித்து, மதக்கட்டளை (ஃபாட்வா) பிறப்பித்த ஈரான் மதத்தலைவர் அயாதொல்லா கொமேனிக்கு எதிர்ப்புத் தெரிவிக்க இந்த இடதுசாரிகள் தயங்கிக் கொண்டிருந்த நேரத்தில் ஹிட்சென்ஸ் கடும் கண்டனம் தெரிவித்து தாம் வித்தியாசமானவர் என்பதை எண்பித்தார். தொடர்ந்து அமெரிக்காவின் இரட்டைக் கோபுரங்கள் தகர்க்கப்பட்ட போது மத முகமூடியுடன் பாசிச முகம் காட்சி அளித்ததைக் கண்டித்தார்.

புதிய நாத்திக இயக்கத்தவன் எனத் தம்மைக் கூறிக் கொள்ளும் இவர், தமக்குக் கடவுள் நம்பிக்கை அறவே கிடையாது என அறிவித்திருக்கிறார். தம்மை ATHEIST எனக் கூறிக் கொள்வதைவிட ANTITHEIST எனக் கூறிக் கொள்ளவே விரும்புகிறார்.

இந்தச் சொல் பரப்பப்படவேண்டும் எனக் கூறுகிறார். கடவுள் என்பதோ, சர்வ சக்தி படைத்த பொருள் என்றோ கூறுவதும் நம்புவதும் தனிமனிதனின் சிந்தனைச் சுதந்திரத்தைத் தடைசெய்து வருகிறது எனும் கொள்கையைக் கொண்டவர். அறிவியல் கண்டுபிடிப்புகள் மட்டுமே அறநெறிகளையும் (ETHICS) மனித நாகரிகங் களையும் உருவாக்கி, மதங்கள் ஆக்ரமித்துள்ள இடத்தை அழித்திட வேண்டும் என்று வலியுறுத்தி கடவுள் பெரிதானதல்ல என்ற நூலை எழுதியிருக்கிறார்.

பிரிட்டன் கப்பல் படையில் பணிபுரிந்த தாய்க்கும் தந்தைக்கும் பிறந்தவர். இட்லரின் போர்க்கப்பல் ஒன்றினை வடமுனைப் போரில் மூழ்கடித்த பிரிட்டிஷ் ஜமைக்கா கப்பலின் தளபதியாக தந்தை எரிக் ஹிட்சென்ஸ் பணியாற்றிய போது, கப்பல் படையில் பெண் பிரிவின் அதிகாரியாக தாய் யுவோன் பணிபுரிந்தார்.

கேம்பிரிட்ஜ் பள்ளியிலும் ஆக்ஸ்போர்டு கல்லூரியிலும் படித்தவரான ஹிட்சென்ஸ் அமெரிக்காவின் வியட்நாம் நாட்டுக்கு எதிரான போர்ச் செயல்களைக் கண்டித்து 1960 களின் பிற்பகுதியில் எழுதத் தொடங்கினார். 1965 இல் தொழிற்கட்சியில் சேர்ந்தார். அதே வேகத்தில் 1967 இல் தொழிற்கட்சியில் இருந்து நீக்கப்பட்டார். வியட்நாம் போரில் அமெரிக்காவை ஆதரித்துச் செயல்பட்டவர் அப்போதைய இங்கிலாந்து தொழிற்கட்சிப் பிரதமர் ஹெரால்டு வில்சன் கட்சியின் நிலைக்கு எதிரான நிலைப்பாட்டைக் கொண்டிருந்த காரணத்தால் ஹிட்சென்ஸ் கட்சியிலிருந்து வெளியேற்றப்பட்டார். ஆனாலும் இதே நிலைப்பாட்டைத் தம் எழுத்துகளில் வெளிப்படுத்தித்தான் நியூ ஸ்டேட்ஸ்மேன் ஏட்டில் எழுதிக் கொண்டிருந்தார். அப்போதைய அமெரிக்க வெளியுறவு அமைச்சரான கிசிஞ்சர் என்பாரைத் தாக்கித்தான் எழுதினார்.

1981 இல் அமெரிக்காவுக்குப் போய் தி நேஷன் இதழில் அப்போதைய குடியரசுத் தலைவர்கள் ரீகன், ஜார்ஜ் புஷ் ஆகியோரின் அயல் உறவுக் கொள்கைகளைக் கண்டித்தே எழுதி வந்தார். சைப்ரஸ் நாட்டில் பத்திரிகை நிருபராக இருந்தபோது, எலனி மெலீக்கு என்பாரை மணம் செய்து கொண்டு இரண்டு குழந்தைகளுக்குத் தந்தையானார். 1989 இல் எழுத்தாளரான கரோல் ப்ளூ என்பாரை மணந்து அன்டோனியா எனும் மகளுக்குத் தந்தையானார்.

சீரான படைப்பு (INTELLIGENT DESIGN) எனும் கடவுள் நம்பிக்கையாளர்களின் புதிய படைப்புக் கொள்கையையும், அமெரிக்காவில் சில பள்ளிகளில் அது பாடமாக வைக்கப்பட்டிருப்பதையும் கடுமையாக எதிர்ப்பவர் ஹிட்சென்ஸ். இக்கொள்கையை ஆதரிக்கும் அதிபர் புஷ்சையும் கடுமையான சொற்களால் விமரிசனம் செய்து வந்தவர். ஈராக் போரில் அமெரிக்க ராணுவம் நடத்திய படுகொலைகளைக் கண்டித்தவர். புஷ் அரசு பிறப்பித்த வாரன்ட் இல்லாமல் யாரையும் உளவு பார்க்கும் உரிமைச் சட்டத்தை எதிர்த்து வழக்குப் போட்டவர். ஓர் எழுத்தாளனாக சமூகத்திற்கு எதிரான ஒடுக்கு முறைகளை எதிர்த்து எல்லா முனைகளிலும் போராடியவர் ஹிட்சென்ஸ் எனலாம்.

பிரிட்டனின் அரச வம்சம் நீக்கப்பட வேண்டும் என்பதற்காகக் குரல் கொடுத்த எழுத்தாளராகவும் விளங்குகிறார்.

ஆப்ரகாம் மதங்கள் எனப்படும் மூன்று பெரிய மதங்களையும் கண்டித்தவர். ஏக இறைவன் எனும் கொள்கையுடைய யூத, கிறித்துவ, இசுலாமிய மதங்களை ஒருசேரக் கண்டிப்பவர்; எல்லாக் கேடுகளுக்கும் அச்சாக விளங்குபவை இம்மூன்று மதங்களே என்று ஆணி அறைந்தாற்போலக் கூறுபவர். மேற்கத்திய பகுத்தறிவாளர்கள் இம்மூன்று மதங்களைத் தாக்குவதோடு நிறுத்திக் கொள்வர். இவரோ, மற்றவர்கள் தொடாத மதங்களான இந்து மதம், துக்கடா மதங்கள் போன்றவை பற்றியும் விமரிசனம் செய்து கண்டனக் குரல் எழுப்பிய பகுத்தறிவு எழுத்தாளராவார்.

எந்த மதத்தைச் சேர்ந்த யாராக இருந்தாலும், அவர்களோடு வாதிடத் தயார் எனப் பகிரங்கமாக அறிவித்துள்ளவர். அதன்படி கிறித்துவப் பாதிரியாரான டக்ளஸ் வில்சன் என்பவருடன் வாதிட்டார். இதன் விவரங்கள் இன்றைய கிறித்துவம் (CHRISTIANITY TODAY) எனும் இதழில் வெளியிடப்பட்டன. “IS CHRISTIANITY GOOD FOR THE WORLD?” (கிறித்துவம் உலகிற்கு நன்மையானதா?) எனும் தலைப்பில் இவரது வாதம் 2008 இல் நூலாகவே வெளியிடப் பட்டுள்ளது. இந்நூலைப் பிரபலப்படுத்து வதற்காக பலநாடுகளுக்கும் அவர் சென்றார்.

சினிமாப்படத் தயாரிப்பாளரான டாரன் டோன் என்பவர் தம் படப்பிடிப்புக் குழுவினரை அவருடன் அனுப்பி “COLLISION: IS CHRISTIANITY GOOD FOR THE WORLD” என்ற திரைப்பட மாகவே தயாரித்துள்ளார். 27-10-2009 இல் திரைப்படம் வெளிவந்தது.

கிறிஸ்டோஃபர் ஹிட்சென்சின் வாதத்திறமை உலகப் புகழ் பெற்றது என்பதற்கு இன்னுமோர் நிகழ்ச்சி. பிரிட்டனின் பிரதமராக இருந்தவர் டோனி பிளேர் என்பவர். தொழிற்கட்சிக்காரர். நம்மூர் கம்யூனிஸ்ட் களைப் போலவே அவரும் மதம், கடவுள் ஆகியவற்றில் நம்பிக்கை கொண்டவர். அவர் புரொடஸ்டன்ட் (மறுப்பியல்) கிறித்துவப் பிரிவைச் சார்ந்தவர், அவரது மனைவி கத்தோலிக்கக் கிறித்துவர். எந்தப் பிரிவின்படி திருமணம் செய்து கொண்டனர், எந்தப் பிரிவின்படி ஜெபம் செய்து குடும்பம் நடத்தினர் என்பதற்கான விவரங்கள் (என்னிடம்) இல்லை.
டோனி பிளேர் பிரதமராக இருந்த போது அமெரிக்கா அடாவடியாக ஈடுபட்ட ஈராக் போரை ஆதரித்தவர். போர் முடிந்து, பதவி இழந்து போனவர் புஷ்சைப் போலவே! இதன் காரணமாக ஹிட்சென்ஸ் இவரை எதிர்த்தது ஒரு முனை. மற்றொரு முனை என்னவென்றால், பதவி இல்லாத பிளேர் தம் மனைவியின் கத்தோலிக்க மதத்திற்கு மாறிவிட்டவர், இதனாலும் கண்டனம் செய்யப்பட்டவர்.

நண்டு கொழுத்தால் வளையில் இருக்காது என்று நம் ஊரில் சொல்வது போல, இந்தப் புதிய கத்தோலிக்கர், நம் ஹிட்சென்சை வாதத்திற்கு அழைத்து வாங்கிக் கட்டிக் கொண்டார். கனடா நாட்டின் டொரோன்டோ (TORONTO) நகரில் 26_10_2010 இல் வாதப்போர் நடந்தது. மங்க் அறக்கட்டளை சார்பில் ஏற்பாடு செய்யப்பட்ட வாதப்போரில் ஹிட்சென்ஸ் வழக்குத் தொடுத்தார், டோனி பிளேர் வழக்கை மறுத்தார். வாதத்திற்கு முன்னதாகவே மக்களின் மத்தியில் பரபரப்பு தொற்றி, மக்களின் வாதப்பிரதிவாதங்கள் மங்க் அறக் கட்டளையின் வலைப்பதிவில் பதிவு செய்யப்பட்டன. அதன்படி ஹிட்சென்சின் வழக்குக்கு ஆதரவாக 56 விழுக்காடு வாக்குகள், எதிர்ப்பாக (டோனி பிளேருக்கு ஆதரவாக) 22 விழுக்காடும் பதிவானது. 21 விழுக்காடு முடிவெடுக்க முடியாதவர்களின் விகிதாச்சாரம்.

வாதப்போர் முடிந்தபிறகு, ஹிட்சென்ஸ் தரப்புக்கு 68 விழுக்காடு ஆதரவு பெருகியது. 32 விழுக்காடு ஆதரவை மட்டுமே டோனி பிளேர் பெற முடிந்தது. அதாவது, கிறித்துவம் உலகிற்கு நல்லதல்ல எனும் முடிவுக்கு மூன்றில் இரண்டு பங்கினர் வந்துள்ளனர். மூன்றில் ஒரு பங்கு ஆதரவை மட்டுமே கிறித்துவ மதம் பெற முடிந்தது. மதம் என்றுமே வென்றதில்லை; என்றும் வெல்லாது.

- தொடரும்

- சு.அறிவுக்கரசு

உலகப் பகுத்தறிவாளர்

கிறிஸ்டோஃபர் ஹிட்சென்ஸ்

- சு.அறிவுக்கரசு

எல்லா மத நம்பிக்கைகளுமே, கெட்டவையாகவும் வளர்ச்சி பெறாத தன்மையிலுமே உள்ளன என்றார் ஹிட்சென்ஸ். நம் ஊர் இந்து முன்னணிக்காரர்கள் போலவே, சிலர் அவரைக் கேட்டார்கள், கத்தோலிக்கர்கள் என்றாலே உங்களுக்கு வெறுப்புபோல என்று! அதற்குத்தான் அவர் மேற்காணும் பதிலைக் கூறினார். நெருப்புத் துண்டங்களில் முன் துண்டம் என்றாலும் பின் துண்டம் என்றாலும் நெருப்புதானே!

ஹிட்சென்ஸ், கிறித்துவராகவே வளர்க்கப்பட்டவர். கிறித்துவ போர்டிங் பள்ளிகளில் படித்தவர். ஆனாலும்கூட, சிறுவயதிலிருந்தே பிரார்த்தனை செய்யாதவராக இருந்தார். அவர் பாதி யூதர் என்பது அவரின் தம்பி திருமணம் செய்து கொண்டபோதுதான் இவருக்குத் தெரிய வந்தது. தன்னுடைய 90 வயதுப் பாட்டியிடம் தம் மனைவியை அறிமுகப்படுத்திய இவரின் தம்பியிடம் பாட்டி இவள் யூதப் பெண் அல்லவா? என்று கேட்டாராம். உங்களுக்கெல்லாம் ஒரு சேதி சொல்லப் போகிறேன் என்று கூறிய பாட்டி, தாம் யூத வம்சம் என்றும், தம் குடும்பப் பெயர் LYNN அல்ல; LEVIN என்பதாகும் எனக் கூறிவிட்டு, தம்முடைய கொள்ளுப் பாட்டி யூத மதத்திற்கு மாறி கொள்ளுத் தாத்தாவைக் கல்யாணம் செய்து கொண்டதாகக் கூறினார். அதன்படி, தாய் வழியில், ஹிட்சென்ஸ் யூத மதம் சார்ந்தவர் எனும் ரகசியத்தை உடைத்தார்.

(இதில் நாம் கவனிக்க வேண்டியது ஒன்றுண்டு. பெயர்களையும், குடும்பப் பெயர்களையும் வைத்து ஒருவரின் மதம், நாடு, மொழி போன்றவற்றைத் தெரிந்துகொள்ளும் வாய்ப்பு அங்கே இருக்கிறது. பிரதீப், பிரகாஷ், ரமேஷ் உமேத் என்றெல்லாம் பெயர்கள் வைத்துக் கொள்ளும் இங்கே அத்தகைய வாய்ப்பு உண்டா?)

இதுபற்றி ஹிட்சென்ஸ் கூறும்போது, நான் யூதத்தை எதிர்ப்பவன். பாலஸ்தீனம் என ஒன்று இல்லாமலும் பாலஸ்தீனியர்கள் என்போர் இல்லாமல் இருந்தாலும்கூட, யூதர்களின் வழித்தோன்றலாக இருப்பது தவறுதான் என்றே கூறி, தம் யூத எதிர்ப்பை உறுதிப்படுத்தினார்.

2006இல் பெனிசில்வேனியாவில் நடைபெற்ற வாதப் போரில் யூத வாழ்வு முறைகள்பற்றி மார்ட்டின் அமிஸ் என்பவருடன் வாதிடும்போது (யூதரான) கார்ல்மார்க்சின் பொருள்முதல்வாதம் உண்மையானது, முதலாளித்துவத்தின் உண்மையான முகத்தைப் புரிந்து கொள்ளவில்லை எனக் குறிப்பிட்டார்.

சேகுவாராவின் செயல்பாடுகள் அவரைக் கவர்ந்தன. அவருக்கு ஏற்பட்ட கொடிய முடிவு அவரை மிகவும் பாதித்தது. நான் இப்போது சமதர்மவாதி (சோஷலிஸ்ட்) அல்ல என்றாலும் நான் மார்க்சிஸ்ட் எனக் கூறிக்கொண்டார்.

சோவியத் நாட்டின் வி.அய். லெனின், லியோன் ட்ராட்ஸ்கி ஆகிய இருவருமே சிறப்பானவர்கள் எனக் குறிப்பிட்ட அவர், மதநீக்கம் செய்யப்பட்ட (SECULAR) ரஷ்யாவை உருவாக்கியதற்காக லெனினைப் பாராட்டினார். அதே வேகத்தில், ரஷ்ய பழமை வாத சர்ச்களை செல்வாக் கிழக்கச் செய்ததற்காகவும் லெனினைப் புகழ்ந்தார். அவை பிற்போக்குத்தனம், கேடு கெட்ட மூடநம்பிக் கைகளின் உறைவிடமாக விளங்கின எனக் காரணம் கூறினார். உண்மை தானே!

கடவுள் ஒன்றும் பெரிதல்ல எனும் நூல் நாட்டளவில் சிறந்த நூல் என்கின்ற விருதுக்கு 2007 இல் பரிந்துரைக்கப்பட்ட பெருமையைப் பெற்றது. உலகம் முழுக்க விற்பனையில் சாதனை படைத்த நூலாகும். தேசிய மதவிலக்கு (செக்யுலர்) சங்கத்தின் முக்கியமான நான்குபேர்களில் ஒருவராக இவர் ஆக்கப்படுவதற்குக் காரணமான நூலாகவும் இது அமைந்துள்ளது. சுமார் 300 பக்கங்கள் கொண்ட இந்நூல் மதங்களின் மாய்மாலங்களை, முரண்பாடுகளை, பொய்க்கருத்துகளை அக்குவேறாக ஆணி வேறாக அலசி ஆய்ந்து பிய்த்துப்போட்டுவிட்டது.

கொடுமைகளின், கேடுகளின் உச்சத்திற்கே மனிதர்களை மதங்கள் துரத்தி அடித்திருக் கின்றன என வருணிக்கும் ஹிட்சென்ஸ், ஆதாரங்களை அடுக்கடுக்காகத் தந்துள்ளார். ஆண் - பெண் சேர்க்கையின்றி கடவுள்கள் பிறந்துள்ளன என்பதற்குக் கிறித்துவக் கதையைப் போலவே, பிற மதக் கதைகளை எடுத்துக் கூறுகிறார். கிரேக்கக் கடவுள் ஜூபிடர் கண்ணிப் பெண்ணானடானே மீது தங்கத்தால் குளிப்பாட்டியபோது குழந்தை பிறந்த கதை, காட்லிகஸ் என்பவள் இறகுப்பந்து ஒன்றைத் தன் மார்போடு அணைத்தபோது கருத்தரித்தது, மாதுளம் பழம் ஒன்றை மரத்திலிருந்து பறித்து மார்பில் அடக்கிய நானா, குழந்தைக் கடவுள் அட்டிசைப் பெற்றெடுத்த கதை, மங்கோலிய மன்னனின் மணமாகாத மகள் பெருத்த வெளிச்சம் தன்மீது பட்ட காரணத்தால் செங்கிஸ்கானைப் பெற்ற கதை, இகிசுக்குப் பிறந்த ஹோரஸ், கன்னிப்பெண் மையாவுக்கு மெர்க்குரி பிறந்தது என பல கதைகளை எடுத்துக் காட்டிக் கிண்டல் செய்துள்ளார்.

பைபிளின் பழைய ஏற்பாடு செய்த கேடுகளைவிட புதிய ஏற்பாடு அதிகக் கேடுகளைச் செய்துள்ளது என்பதை எண்பித்துள்ளார். யூத, கிறித்துவ மத நூல்களின் செய்திகளை எடுத்துப்போட்டு எழுதப்பட்டது குர்ஆன் என ஆதாரங்களோடு மெய்ப்பிக்கிறார்.

கத்தோலிக்க மதத்தில் சிலரைப் புனிதர் என்றாக்கும் சடங்கு ஒன்று உண்டு. யேசுவுடன் தொடக்கத்தில் சீடர்களாக இருந்தவர்களை இம்மாதிரி புனிதர்கள் (SAINT) என அழைப்பது உண்டு.

12 புனிதர்களோடு நின்றுவிடக் கூடாது என்பதற்காகவோ என்னவோ, கத்தோலிக்கம் இப்பட்டத்தைப் பலருக்கும் தந்து வருகிறது. இதற்கான தகுதி என அவர்கள் வைத்திருப்பது அற்புதங்கள் நிகழ்த்தியிருக்க வேண்டும் என்பதுதான். அற்புதங்களைச் செய்யாவிட்டால் மதங்களே கிடையாது. மதங்களை யாரும் நம்ப மாட்டார்கள். குறிப்பாக கிறித்துவம் அற்புதங்களின் அடித்தளத்தில் எழுப்பப்பட்டு வளர்க்கப்பட்ட மதம்தான். அந்நிலை இன்றளவும் தொடர்கிறது.

இதற்காக போப் ஒரு விசாரணை நடத்துவார். அற்புதங்களுக்கு எதிரானவர்கள் கூட அழைக்கப்பட்டு அனுமதிக்கப்படுவார்கள். இந்தமாதிரி ஆள்கள் சாத்தானின் வக்கீல்கள் (DEVIL’S ADVOCATES) என்று அழைக்கப்படுவார்கள். (இந்தத் தலைப்பில் புதுடெல்லி தொலைக்காட்சியில் கரண்தாப்பர் நடத்தும் நிகழ்ச்சி உண்டு) அப்படி சாத்தானின் வக்கீலாக அழைக்கப்பட்ட பெருமையும் ஹிட்சென்சுக்கு உண்டு.

அவர் கலந்துகொண்ட நிகழ்ச்சி, ஒரு கன்னியாஸ்திரிக்குப் புனிதர் பட்டம் கொடுப்பது பற்றியது. அல்பேனியா நாட்டைச் சேர்ந்த ஆக்னஸ் போஜக்ஜியு என்பவர் தொடர்புடையது. இயற்பெயரால் அறியப்பெறாமல் சூட்டிக் கொண்ட பெயரால் உலகம் முழுக்கத் தெரிந்தவரான மதர் தெரசாதான் அவர். மால்கம் முகரிட்ஜ் எனும் சுவிசேஷப் பிரசங்கி இப்பெண்மணி அற்புதங்கள் செய்ததாகக் கதை கட்டிவிட்டவர். பி.பி.சி. தொலைக்காட்சியில் இவர் எடுத்த விவரணப்படத்தின் மூலம் செய்தி உலகுக்குப் பரப்பப்பட்டது. தெரசா செய்த அற்புதம் ஒன்றும் பிரமாதமானதல்ல. அவர் நடத்திய மரண இல்லம் (HOUSE OF THE DYING) கட்டடத்தில் படப்பிடிப்புக்குப் போனபோது, அது போதுமான இயற்கை வெளிச்சமோ, ஒளி விளக்குகளோ இல்லாமல் இருந்தது. படம் பிடித்தால் சரியாக வருமா எனும் அய்யம் இயக்குநருக்கு ஏற்பட்டது காமெராமேன் கென் மாக்மில்லன் என்பார் மிகவும் நம்பிக்கையுடன், புத்தம்புதிய கோடக் (KODAK) ஃபிலிம் வைத்திருக்கிறேன், அதில் படம் எடுத்துப் பார்க்கலாம் என்று நம்பிக்கையுடன் கூறிப் படம் எடுத்து முடித்தார். பிறகு கட்டடத்திற்கு வெளியேயும் படம் எடுத்தார்கள்.

இரண்டு மாதங்கள் கழித்து படம் எடுத்தவரையில் ரஷ் போட்டுப் பார்த்தபோது, கட்டடத்தின் உள்ளே எடுத்தவை மிகப் பிரமாதமான ஒளி அமைப்பில் படம் எடுக்கப்பட்டிருந்தது. வெளியே எடுத்த படம் அவ்வளவு தெளிவாக வரவில்லையாம். ரஷ் பார்த்த மால்கம் முகரிட்ஜ் ஆ! இதுதான் தெய்வீக ஒளி! அதுதான் மதர் தெரசா! அதுதான் அவருடைய தெய்வீக ஒளி என்று கூச்சல் போட்டார். அந்தக் கூச்சல்தான் மதர் தெரசாவின் அற்புதத்தை உலகுக்கு அறிவித்தது.

இன்னொரு கதையும் அன்னை தெரசா நிகழ்த்திய அற்புதமாகக் கூறப்பட்டது. 1997 இல் தெரசா இறந்தார். அவர் அணிந்திருந்த ஓர் அலுமினிய மெடலைத் தன் அடிவயிற்றில் வைத்துக் கொண்டிருந்த மோனிகா பெஸ்ரா எனும் பெண்ணுக்கு, நீர்த்தாரையில் ஏற்பட்டு இருந்த கட்டி குணமாகிவிட்டதாம். தெரசாவின் உடலில் இருந்த மெடலுக்கே இந்தச் சக்தி இருந்தது என்று அவர் இறந்து ஒரு ஆண்டுக்குப் பிறகு கதை பரப்பப்பட்டது. இதனை மோனிகா பெஸ்ராவின் கணவர் செல்கு முர்முவும் நம்பவில்லை. மோனிகாவுக்கு மருத்துவம் பார்த்த மருத்துவர்கள் மஞ்சு முர்ஷத், டி.கே. பிஸ்வாஸ், ரஞ்சன் முஸ்டாபி ஆகிய யாருமே ஒப்புக் கொள்ளவில்லை என்றாலும் கத்தோலிக்கக் கிறித்துவர்கள் அவர்களின் தலைவர் போப் போன்ற மோசடிக் கும்பல் நம்புவதாகக் கூறி புனிதர் பட்டம் வழங்கப் போகிறார்கள்.

மிகச் சிறந்த நாத்திகரான ஹிட்சென்ஸ் புகைப்பிடிக்கும் பழக்கத்திற்கு ஆள்பட்டுப்போய் புற்றுநோயால் பாதிக்கப்பட்டுவிட்டார். தொண்டையிலிருந்து வயிறுவரை இருக்கும் உணவுக் குழாயில் புற்றுநோய்ப் பாதிப்பு ஏற்பட்டு அதன் விளைவாக, பேச இயலாமல் சிரமப்படுகிறார். அதன் விளைவாக இந்த ஆண்டு (2011) அமெரிக்க நாத்திக அமைப்பின் மாநாட்டில் கலந்து கொள்ளவில்லை. மாநாட்டுக்கு அனுப்பிய வாழ்த்துச் செய்தியில் என்னுடைய பேச்சுக் குரலை எழுப்ப இயலாத நிலை ஒன்றுதான் நான் உங்களோடு இருக்கமுடியாத நிலையை உண்டாக்கிவிட்டது. அதுவும்கூட, காலின் கொடுங்கோலுடன் நான் வாதம் செய்துவருவதால் ஏற்பட்ட விளைவுதான் என்றே நகைச்சுவையுடன் குறிப்பிட்டுள்ளார்.

கடந்த காலங்களில், கடவுள் உண்டா? எனும் தலைப்பில் இவருடன் வாதிட்டவரான அறிவியல் அறிஞர் ஃபிரான்சிஸ் காலின்ஸ் என்பவர் தேசிய நலவாழ்வு மய்யத்தின் இயக்குநராக இருக்கிறார். அவர்தான் இவருக்கு மருத்துவம் செய்கிறார். எதிர் எதிரான கொள்கைகள் இருந்தாலும் இருவரும் இனிய நண்பர்கள். காலின்ஸ் தம் நண்பரான ஹிட்சென்சுக்காகப் பிரார்த்தனை செய்வதாகவும் அது தெய்வீக சக்தியின் உதவியை நாடுவதற்காக அல்ல என்றும் மருத்துவமுறைகளின் மூலம் அற்புதங்கள் ஏதும் நிகழாதா எனும் எதிர்பார்ப்புக்காக மட்டுமே என்றும் வாஷிங்டன் போஸ்ட் ஏட்டில் எழுதியுள்ளார்.

மதவாதியால் நேசிக்கப்படும் உறுதியான நாத்திகரான ஹிட்சென்ஸ், தாம் மரணத்துடன் போராடி வருவதாகவும், இப்போராட்டத்தில் இதுவரை யாரும் வென்றது கிடையாது என்பதைத் தாம் உணர்ந்திருந்தாலும் போராட்டம் தொடரும் எனவும் குறிப்பிட்டிருக்கிறார். நாத்திகர்கள் அனைவரும் அரசையும் மதத்தையும் பிரிப்பதற்கும் அரசு விசயங்களில் மதங்களின் தலையீட்டைத் தடுத்திடவும், மத, கடவுள் நம்பிக்கைகளை விட்டுவிடச் செய்வதற்கு உழைக்குமாறும் வேண்டுகோள் விடுத்துள்ளார்.

இறப்பது என்பது இயற்கையானது. அதனைத் தடுத்திட முடியாது. அதனை எதிர்கொள்ள வேண்டும். இறுதிக் காலத்தில் சங்கரா, சங்கரா எனக் கூப்பாடு போட்டுப் பிழைத்துக் கொள்ளலாம் என்பதோ, செய்த தவற்றிற்காகப் பிராயச்சித்தம் தேடிக் கொள்ளலாம் என்பதோ முட்டாள்தனமானது என்பதைத் தெளிவாகத் தெரிவித்துள்ள ஹிட்சென்ஸ் இன்னும் 5 ஆண்டுக் காலம் வாழலாம் என மருத்துவர்கள் கூறியிருப்பதால், மருந்துகளால் நோய் தீருமா? எனும் எதிர்பார்ப் புடன் மட்டுமே இருந்து வருகிறார்.

உலகப் பகுத்தறிவாளர் - கிரெக் எப்ஸ்டீன் (2)

திருமணம் தேவையில்லை

- சு. அறிவுக்கரசு

யாருக்கு சரியாகத் தெரியும்?

யாரால் உறுதியாகக் கூறமுடியும்?

எப்போது இப்பிறப்பு நிகழ்ந்தது?

எப்போது இதன் படைப்பு நிகழ்ந்தது?

இந்த உலகம் படைக்கப்பட்டபின் கடவுளர்களின் பிறப்பு நடந்தது.

அப்படியெனில் இது எப்போது நடந்தது

என்று யார் அறிவார்?

எவருக்கும் இது தெரியாதே!

அவன் படைத்தானா?

உலகின் மதங்கள் எல்லாமே ஒன்றை மட்டுமே வலியுறுத்துவதாக அவர் எழுதுகிறார்.