WE BELONG TO DRAVIDIAN STOCK

May 22, 2021 • Viduthalai

 

திராவிட வல்லுநர் மன்றத்தின் (PDF) நிறுவனர் நிதி அமைச்சர் பி.டி.ஆர். பழனிவேல் தியாகராஜன், மன்றத்தின் பொறுப்பாளர்கள் புகழ்காந்தி, தரணீதரன், கருத்தரங்கில் கலந்து கொண்டு உரையாற்றும் நாடாளுமன்ற உறுப்பினர் டி.கே.எஸ். இளங்கோவன், சட்டமன்ற உறுப்பினர்மருத்துவர் எழிலன், இணைய வழியிலும், முகநூல் வழியிலும் கருத்துகளை செவி மடுத்துக் கொண்டிருக்கும் அருமை நண்பர்கள், அனைவருக்கும் என் அன்பு வணக்கம்!

கரோனா என்னும் பெருந்தொற்று பரவிக் கொண்டிருக்கின்ற இந்நேரத்தில், திராவிடம், ஆரியம், தமிழ்த் தேசியம் போன்ற விவாதங்கள் எல்லாம் தேவையா என்று தோன்றும். தேவையில்லைதான். எனினும், திராவிடம் என்று சொன்னவுடனேயே நம் மீது பாய்ந்து குதறும் சிலரைப்பார்க்கும் வேளையில், நாம் விடை சொல்லத்தான் வேண்டியுள்ளது. தி.மு. கழகத் தலைவர் அவர்கள், தமிழ்நாட்டின் முதலமைச் சராகப் பொறுப்பேற்றவுடன், தன் ட்விட்டர் பக்கத்தில், தன்னைப் பற்றிய ஓர் அறிமுகமாக, “தமிழக முதல்வர், தி.மு.க தலைவர், திராவிட மரபினத்தவர்’’ என்னும் குறிப்புகளைப் பதிவு செய்தார். அவ்வளவுதான்; உடனே திராவிட ஒவ்வாமையும், திராவிட எதிர்ப்பும் வெளிப்படத் தொடங்கிவிட்டன.

இருப்பினும் முதல்வர் எந்த எதிர்ப்புக்கும் எந்த விளக்கமும் சொல்லவில்லை. விளக்கம் சொல்லிக் கொண்டிருப்பதை விட, வேலை செய்து கொண்டிருப் பதே நாட்டிற்குத் தேவையானது என்பதை அவர் புரிந்து வைத்துள்ளார். சற்றுக்கவனித்துப் பார்ப்பவர் களுக்கு இன்னொன்றுபுரியும். கடந்த பத்து நாட்களா கவே, முதலமைச்சர் மிகக் குறைவாகவே பேசுகின்றார். தேவையானவைகளை மட்டுமே பேசுகின்றார். உலக மொழிகளிலேயே ஆகச்சிறந்த மொழி செயல்தான் என்பதை அவர் நமக்கெல்லாம் உணர்த்துகின்றார் என்றே கருதுகின்றேன்.

இருப்பினும் நம்மைப் போன்றவர்கள் சரியான சில விளக்கங்களைச் சொல்ல வேண்டியுள்ளது. இல்லை யேல் அவர்களின் பொய்யுரைகளே உண்மை என்றாகி விடும்!

“நான் திராவிட மரபைச் சேர்ந்தவன்” என்று நம் தலைவர் குறிப்பிட்டுள்ள அந்த வரி யாருடையது, எங்கிருந்து எடுக்கப்பட்டது என்பதை நம்மில் பலரும் அறிவோம். 1962 ஏப்ரல் மாதம், இந்திய நாடாளுமன்ற மாநிலங்களவையில் அறிஞர் அண்ணா ஆற்றிய கன்னிப்பேச்சில் அந்த வரி இடம்பெற்றுள்ளது. “I BELONG TO DRAVIDIAN STOCK. I AM PROUD TO CALL MYSELF A DRAVIDIAN”  என்றார் அண்ணா.

அறிஞர் அண்ணாவின் உரையை முழுமையாகப் படிக்கும் போது, இன்னும் ஆயிரம் செய்திகள் அதில் உள்ளடங்கி இருக்கின்றன என்பதை நாம் அறியலாம். அண்ணாவின் உரை பற்றி விரிவாகப் பார்ப்பதற்கு முன், இன்றைய சூழலில் எந்த அடிப்படையில் `திராவிடம்' எதிர்க்கப்படுகிறது என்பதை நாம் பார்த்து விட வேண்டும்.

நம்மை எதிர்ப்பவர்கள் என்ன சொல்லி எதிர்க் கிறார்கள் என்றால், “நீங்கள் ஏன் உங்களை திராவிடன் என்று சொல்லிக் கொள்கின்றீர்கள்? தமிழன் என்பது தானே சரி. திராவிடன் என்று சொல்லிச்சொல்லி, கடந்த ஒரு நூற்றாண்டாகத் தமிழை, தமிழ் முகத்தை, தமிழர் முகவரியை அழிக்கின்றீர்கள்” என்கிறனர்.

திராவிடன் என்று சொல்லிக் கொள்ளும் நாம், தமிழை, தமிழ் இனத்தை, தமிழ்ப் பண்பாட்டை மேம் படுத்தியிருக்கிறோமா அல்லது இழிவுபடுத்தி இருக் கிறோமா என்னும் கேள்விக்கு விடை சொல்ல வேண் டிய கடமை நமக்கு இருக்கிறது.

‘திராவிடம்’ என்ற சொல் எந்தெந்தக் காலகட்டங் களில், என்னென்ன பொருளில் ஆளப்பட்டுள்ளது; இன்று அதன் பொருள் என்னவாக இருக்கிறது என்பதை நாம் விளக்க வேண்டும். “திராவிடன் என்று சொல்லாதே, தமிழன் என்று சொல்’’ எனக் கூறுகின்ற வர்கள், ஏதோ திராவிடமும் தமிழும் எதிரெதிரானவை என்பது போலப் பேசுகின்றனர். உண்மையில் ‘ஆரியம்’ என்பது தான் ‘திராவிடத்தின் எதிர்ச்சொல்’ இவர்கள் ஆரியத்தை அகற்றிவிட்டு, அந்த இடத்தில் தமிழைக் கொண்டுவந்து வைக்கின்றனர்.

இதற்கு ஓர் உள்நோக்கம் இருக்கிறது. உண்மையான எதிரிக்குப் பதிலாக, அந்த இடத்தில், இணக்கமான ஒன்றைக் கொண்டு வருவதன் மூலம், எதிரி தப்பித்துச் செல்வதற்கு வழிவகுக்கின்றனர் என்றே இதனை நாம் புரிந்து கொள்ள வேண்டும்.

இப்போது நாம் `திராவிடம்’ என்ற சொல்லை வரலாற்று அடிப்படையில் நோக்குவோம்.

‘தமிழ்’ என்பது நம் மொழியின் பெயர், ‘தமிழர்’ என்பது நம் இனத்தின் பெயர், `தமிழ்நாடு’ என்பது நம் நிலத்தின் பெயர். நூற்றுக்கு நூறு உண்மை.

அப்படியானால், திராவிட மொழி, திராவிட இனம், திராவிட நாடு என்பன எங்கிருந்து வந்தன என்று கேள்வி சரியானதுதான். இனம் என்று எடுத்துக் கொண்டால், உலகம் முழுவதும், தொடக்கத்தில் மரபினங்கள்  (Ethnic Race)இருந்தன. பிறகு அவை தேசிய இனங்களாகப் (National Race) பரிணாம வளர்ச்சி பெற்றன. நம் பழைய மரபினத்தின் பெயர் ‘திராவிடர்’ என்பது. ஆனால் இன்று ‘திராவிடம்’ என்னும் சொல், மொழியை, இனத்தை, நாட்டைக் குறித்ததிலிருந்து விடுபட்டு, ஒரு கருத்தியலை, ஒரு சித்தாந்தத்தைக் குறிக்கும் சொல்லாக மாற்றம் பெற்றுள்ளது. அதற்கு வரலாற்றில் பலசான்றுகள் உள்ளன.

19 ஆம் நூற்றாண்டின் மத்தியில், கால்டுவெல், ‘திராவிட மொழிக் குடும்பங்களின் ஒப்பிலக்கணம்’ என்னும் நூலை வெளியிட்ட பின்பே, ‘திராவிடம்’ என்னும் சொல் பெருவழக்காயிற்று. ஆனால், 19 ஆம் நூற்றாண்டின் இறுதியில், அச்சொல் ஓர் அமைப்பின் பெயரில் இடம் பெற்றது.

ஆம், 1892 ஆம் ஆண்டு, அயோத்திதாசப் பண்டி தர், “ஆதிதிராவிட ஜனசபை” என்று தன் அமைப்பிற்குப் பெயர் சூட்டினார். அவரைத் தொடர்ந்து, 1894 இல், ரெட்டைமலை சீனிவாசனார், “திராவிட மகா ஜனசபை” என்னும் அமைப்பைத் தொடங்கினார். அங்குதான், திராவிடம் என்பது ஒரு சமூக அமைப்பின் பெயராகி, ஒரு கருத்தியல் வடிவத்தைப் பெறத் தொடங்கியது. தந்தை பெரியார் காலத்தில், அக்கருத்தியல் முழுமை பெற்றது.

அது என்ன கருத்தியல்? சமத்துவத்தை நோக்கிய சமூகநீதிக் கருத்தியல். ஜாதி ஒழிப்பும், பாலின சமத்துவமும் ‘பெரியாரியம்’ என்று பெயர் பெற்றன. அதனையே நாம் ‘திராவிடம்’ என்கிறோம்.

அயோத்திதாசர் ‘திராவிடம்’ என்ற பெயரில் அமைப்பைத் தொடங்கினாலும், 1906 இல் அவர் நடத்திய ஏட்டிற்கு “ஒரு பைசா ‘தமிழன்” என்று தானே பெயர் சூட்டினார். திராவிடத்தைக் கைவிட்டு விட்டாரே என்று கேட்கின்றனர். அவர் திராவிடம் என்னும் சொல்லையோ, அதன் கருத்தியலையோ இறுதிவரையில் கைவிட வில்லை என்பதுதான் உண்மை. 1914இல் அவர் இறந்து போகும் வரையில் அந்தச் சொல்லைப் பெருமையுடன் கையாண்டார்.

1910 டிசம்பர் 14 அன்று, மக்கள்தொகைக் கணக் கெடுப்பு பற்றிய செய்தியில், அயோத்தி தாசர், “இத் தேசப் பூர்வச் சரித்திரங்களைக் கொண்டும், இத்தேசப் பூர்வச் சரித்திரங்கள் ஆதாரங்களைக் கொண்டும், பூர்வ குடிகளை, சாதி பேதமுள்ள இந்துக்களினின்று பிரித்து, சாதி பேதமற்ற திராவிடர்கள் என்றே எழுதும் படி யானஉத்தரவளிக்கவேண்டுகிறோம்” (ஞான அலோசியஸ் - “அயோத்திதாசர் சிந்தனைகள்’’ - தொகுதி 1 -பக்.307-08) என்று குறிப்பிடுகின்றார்.

எனவே ஜாதி பேதமற்ற இந்துக்களே திராவிடர்கள் என்பது தெளிவாகின்றது. திராவிடர்களும் தமிழர்களே. ஆனால் ஜாதி பேதமற்ற, பாலினசமத்துவத்தை ஏற்கும் தமிழர்கள் திராவிடர்கள் ஆகின்றனர்.

1913ஆம் ஆண்டு, மறைமலை அடிகளாரும், சென் னையில், “திராவிட நாகரிகம்” என்னும் தலைப்பில் இரண்டு நாட்கள் உரையாற்றியுள்ளார்.

இன்னொரு இடத்திலும் திராவிடர்கள் என்பதற்கான விளக்கம் கிடைக்கிறது.

நீதிக் கட்சியின் சார்பில், 01.06.1917 அன்று திராவிடன் என்று ஓர் ஏடு வெளியாகியது. அந்த ஏட்டிற்கு அந்தப் பெயரை எப்படித் தேர்ந்தெடுத்தோம் என்று அந்த ஆசிரியர் குழுவில் இருந்த எஸ்.எஸ். அருணகிரி என்பவர் ஒரு விளக்கம் சொல்லியுள்ளார். “ஏட்டின் ஆசிரியர் பக்தவத் சலம், டி.எம்.நாயர், நான் எல்லோரும் பத்திரிகை யின் பெயர்பற்றிப் பேசினோம். பார்ப்பனர் அல்லாத அனைவரையும் குறிக்கும் ஒரு சொல்லாக இருந்தால் நல்லது என்ற கருத்து பேசப்பட்டது. அந்த அடிப்படையில் தான் திராவிடன் என்ற பெயரைவைக்க முடிவு செய்தோம்’’ என்கிறார். (நீதிக்கட்சி நூற்றாண்டு விழா மலர்)

எனவே இங்கும் பார்ப்பனர் அல்லாதோரைக் குறிக்கும் கருத்தியலாகவே திராவிடம் உருப்பெற்றி ருப்பதை அறிய முடிகிறது.

எல்லாவற்றையும் தாண்டி, திராவிடர் கழகம் தொடங்கிய அதே 1944 ஆண்டின் இறுதியில் (டிசம்பர் 29-31) கான்பூரில் மூன்று நாள் நடைபெற்ற பிற்படுத்தப் பட்டோர் மாநாட்டில் தந்தை பெரியார் அவர்கள் ஆற்றியுள்ள உரையில் மேலும் தெளிவான விளக்கம் நமக்குக் கிடைக்கிறது. அந்த மாநாட்டில், “உங்களைத் தீண்டாமையும் ஜாதி இழிவும் அணுகாத வண்ணம் ஏதேனும் ஒரு மதத்திற்கு நீங்கள் மாறுவதாக இருந்தால் மாறிக்கொள்ளலாம். மதம் எதுவும் வேண்டாம், அதே நேரத்தில் தீண்டாமை, ஜாதி இழிவு எங்களை அணு கிடக் கூடாது என்று நீங்கள் சொல்வீர்களேயானால், உங் களை ‘திராவிடன்’ என்று அழைத்துக்கொள்ளுங்கள்” என்கிறார் பெரியார்.

இப்போது திராவிடக் கருத்தியல் தெள்ளத் தெளி வாக ஆகிவிட்டது. ஜாதி இழிவையும், தீண்டாமையை யும் ஏற்றுக் கொள்ளாத தமிழர்கள் `திராவிடர்கள்’ ஆகின்றனர்.

இத்தனை அடிப்படைகளையும் வைத்துக் கொண்டு தான் அறிஞர் அண்ணா, மாநிலங்களவையில், “நான் திராவிட மரபினத்தைச் சேர்ந்தவன்’’ என்கிறார். அவருடைய உரையின் அடுத்தடுத்த பகுதிகளையும் நாம் பார்க்கவேண்டும். தான் ஏன் தன்னை திராவிடன் என்று சொல்லிக் கொள்கிறார். என்பதையும் அண்ணா அவர்கள் விளக்குகின்றார். “உலகத்தவர்க்குக் கொடுப்ப தற்கு, மிக உறுதியான, மிகத் தெளிவான, மிக வேறு பட்டவை திராவிடரிடம் இருப்பதாலேயே நான் அப்படி அழைத்துக் கொள்கிறேன்” என்கிறார். (`....it's only because I consider Dravidian have got something concrete, something distinct, something different to offer to the world at large”).

ஆம்; திராவிடர்கள் மிகத் தொன்மையான இனத் தினர் என்பதனால் எல்லாம் இல்லை, அவர்களிடம் இவ்வுலகிற்குக் கொடுப்பதற்கு மிக உறுதியான சில கருத்தியல்கள் உள்ளன என்கிறார் அவர். அது மட்டுமல்லாமல், மத நம்பிக்கை, கடவுள் வழிபாடு ஆகியனவற்றைக் கொண்டு ஒரு தேசத்தை வரைய றுத்துவிட முடியாது என்றும் கூறுகிறார்.

“கன்னியாகுமரியிலிருந்து இமாலயம் வரையில் இங்கே ராமரையும் கிருஷ்ணரையும் வணங்குவதால் இதனை ஒரே தேசம் என்று சிலர் கூறுகின்றனர். அப்படிப் பார்க்க முடியாது. அவ்வாறாயின், அய்ரோப்பா முழுவதும் யேசுநாதரை வணங்குகின்றனர். அதனால் அது ஒரு தேசம் ஆகிவிடுமா?” என்றும் கேட்கிறார்.

அண்ணா அவர்கள் தன் பேச்சில் தொடர்ந்து, “நாங்கள் குறுகிய எண்ணம் கொண்டவர்கள் இல்லை. ஒரே உலகம், ஒரே அரசு என்பதைக் கூட நாங்கள் விரும்புகிறோம். ஆனால் அதற்காக எங்கள் தேசிய இன வரையறைகளை மறந்துவிட முடியாது”(we want one world, one government. But we don't forget our national frontiers)என்பதுதான் அண்ணாவின் கூற்று.

இவை அனைத்தையும் வைத்துக் கொண்டுதான்“belong to dravidian stock” என்னும் முதல்வரின் குறிப்பைக் காண வேண்டும்.

எல்லாம் தெரிந்திருந்தும், கற்றறிந்த சிலரே, இதில் உள்நுழைந்து குறுக்குச்சால் ஓட்டுகின்றனர். ஒருவர் ஒரு நேர்காணலில், அன்று அண்ணா சுய நிர்ணய உரிமை(Self determination)  என்பதையும் வலியுறுத் திப் பேசினாரே , அதனை ஏன் இன்றைய முதல்வர் குறிப்பிட வில்லை என்று கேட்கிறார்.

ஆம், அன்று அந்த உரையில் சுய நிர்ணய உரிமை - அதாவது, பிரிந்துபோகும் உரிமையுடன் கூடிய தன்னாட்சி - என்பதை வலியுறுத்தவே செய்துள்ளார். ஆனால் அதற்குப் பிறகு, அதே அறிஞர் அண்ணா தானே “மாநிலசுயாட்சி” என்னும் கொள்கையையும் நமக்கு வகுத்தளித்தார்! அந்த மாற்றத்திற்குப் பல காரணங்கள் உண்டு. அவற்றைத் தனியாக ஒரு கட்டுரையிலேதான் நாம் பார்க்க வேண்டும்.

 அதே நண்பர், அதே நேர்காணலில், “பொங்கு தமிழர்க்கு இன்னல் விளைத்தால்.....” என்றுதானே பாரதிதாசன் பாடியுள்ளார். பொங்கு திராவிடர்க்கு இன்னல் விளைத்தால் என்று பாடவில்லையே ஏன் என்று கேட்கிறார். இவையெல்லாம் இளைஞர்களைத் திசை திருப்ப வேண்டும் என்ற எண்ணத்தில் திட்டமிட்டுக் கேட்கப்படும் கேள்விகள்.

பாரதிதாசன் திராவிடம் பற்றியோ, திராவிடர் பற்றியோ பாடவே இல்லையா? “வாழ்க வாழ்கவே வளமார் எமது திராவிட நாடு” என்று திராவிடர் நாட்டுப் பண் ஒன்றையே பாடியவர் அவர். அது மட்டுமில்லை. இன்னொரு கவிதையில். “இனப்பெயர் என்னென்று பிறர் என்னைக் கேட்டால் / மனத்தினில் எனக்குச் சொல்லொணா மகிழ்ச்சி / நான்தான் திராவிடன் என்று நவில்கையில் / தேன்தான் நாவெல்லாம் வான் தான் என்புகழ்!” என்று பாடியவர் அல்லரோ அவர்!

வேறொரு கவிதையில், திராவிடக் கொள்கை என்பதையும் குறித்துள்ளார். அந்தக் கவிதையின் தொடக்க வரிகள், இன்றைய சூழலுக்கும் பொருந்தும். “கோட்டையில் நாற்காலி இன்றுண்டு நாளை / கொண்டுபோய் விடுவான் திராவிடக் காளை” என்று தொடங்கும் அந்தப் பாடலின் அடுத்த வரிகள், “கேட்டை விளைத்துத் திராவிடக் கொள்கையை / கிள்ள நினைப்பது மடமையின் செயலே” என்று அமைந்துள்ளன.

திராவிடர் கொள்கை என்று ஒன்று இருக்கிறது என்பதை இவ்வரிகள் உறுதிப்படுத்தவில்லையா?

எனவே திராவிடம் என்பது மொழியின், இனத்தின், நாட்டின் பெயரை ஒரு கட்டத்தில் குறித்திருக்கலாம் என்ற போதிலும், இன்று அது ஒரு கருத்தியலாக, சித்தாந்தமாக வளர்ந்து நிற்கிறது என்பதே உண்மை. அந்த உண்மையையும், அந்தக் கருத்தியலையும் ஏற்க விரும்பாதவர்களே, முதலமைச்சரின் அடிக்குறிப்பைக் கண்டு குமுறிக் கொந்தளிக்கின்றனர்.

“ஆரியம் என்னும் அடிமைக் கருத்தியலுக்கு நேர் எதிரான விடுதலைக் கருத்தியல், சமத்துவக் கருத்தியலே திராவிடம் என்பதை மக்களிடம் உரத்துச் சொல்வோம்! ஒவ்வொருவரும் தங்களின் சமூக வலைத்தளங்களில்தங்களைப் பற்றிய குறிப்பில், இப்படி அழுத்தமாக எழுதுவோம்

“WE BELONG TO DRAVIDIAN STOCK.”

- "முரசொலி", 21.5.2021

விஜயவாடா-நாத்திக மய்ய கோ.விஜயம் முதலாம் ஆண்டு நினைவு நாளில் தமிழர் தலைவர் போற்றுதல் உரை

‘நாத்திகம் என்பது மனித நேயமே' விஜயவாடா-நாத்திக மய்ய கோ.விஜயம் முதலாம் ஆண்டு நினைவு நாளில் தமிழர் தலைவர் போற்றுதல் உரை

May 23, 2021 • Viduthalai

விஜயவாடா - நாத்திகர் மய்யத்தின் தலைவர் முனைவர் கோ.விஜயம் மறைந்து ஓராண்டு நிறைவு நாள் காணொலி நிகழ்ச்சியில் திராவிடர் கழகத்தின் தலைவர் தமிழர் தலைவர் ஆசிரியர் பங்கேற்று விஜயம் அவர்களின் நினைவுகளைப் போற்றி உரை ஆற்றினார். நாத்திக மய்யத்தின் நிறுவனர் கோரா வலியுறுத்திய நேர்மறை நாத்திகம் (Positive atheism) மனித நேயம் சார்ந்ததே என கருத்து விளக்கத்தினை தமதுரையில் வழங்கினார்.

22.5.2021 அன்று பிற்பகல் 3 மணிக்கு தொடங்கி நடை பெற்ற நினைவு நாள் நிகழ்ச்சியினை நாத்திக மய்யத்தினர் காணொலி மூலம் ஏற்பாடு செய்திருந்தனர். நாட்டின் பல மாநிலங்களிலிருந்தும் வெளிநாட்டிலிருந்தும் பல நாத்திகர் - மனிதநேயர் தலைவர்களும். செயல்பாட்டாளர் களும் பங்கேற்று விஜயம் அவர்களின் மனிதநேய பணிக்கு புகழாரம் சூட்டினர். தந்தை பெரியார் காலத்திலிருந்து - இராமச்சந்திரா கோரா நாத்திக மய்யத்தை நிறுவிய நாளிலிருந்து மூன்று தலைமுறைகளாக திராவிடர் கழகமும், விஜயவாடா-நாத்திக மய்யமும் இணைந்து நாத்திக நன்னெறியினை  தொடர்ந்து பிரச்சாரப் பணியினை மேற்கொண்டு வருவதை நினைவு கூர்ந்து தமிழர் தலைவர் உரையாற்றினார்.

நாத்திக நன்னெறி

நாத்திகக் கொள்கை உலகெங்கிலும் அந்தந்த பகுதி களில் நிலவிடும் சமூகச் சூழலுக்கு ஏற்றவாறு பரப்புரை செய்யப்படுகிறது. நாத்திகம் என்பது வறட்டு சித்தாந்த மல்ல; அது வாழ்வியல் நெறி. மனிதரை மனிதராக வாழ்ந்திட வழி ஏற்படுத்திடும் ஒரு நன்னெறி. ஆனால் பொதுவெளியில் ‘நாத்திகம்' என்பது கடவுள் மறுப்பு என கருதப்படுகிறது. இந்த விளக்கம் உண்மை என்றாலும், அதையும் தாண்டி உண்மை நிலை - அதன் அவசியம் இருக்கிறது.

‘கடவுள் மறுப்பு' பற்றிக் கூறிய தந்தை பெரியார் ‘கடவுளை மற' என்பதோடு நிறுத்திக் கொள்ளவில்லை. நிறுத்தியிருந்தால் ‘நாத்திகம்' என்பது ஒரு மறுப்புக் கொள்கையாக, எதிர்மறையாக இருந்திருக்கும். ஆனால் தந்தை பெரியார் கடவுள் மறுப்பையும் கடந்து ஆக்கரீதி யான, மனித குல மேம்பாட்டிற்கான நேர்மறை கருத்தாக ‘மனிதனை நினை' என மக்களிடம் பிரச்சாரம் செய்தார்.

தமது வாழ்நாள் காலத்திற்கு பின்பும் அந்தப் பிரச் சாரம் தொடர வேண்டும் என்று ஒரு அமைப்பினையும் உருவாக்கினார். இந்து மதம் என்று அழைக்கப்படத் தொங்கிய காலம் வரை பல்வேறு நம்பிக்கைகள் கொண்ட நிலைமை இருந்தது. அந்த நம்பிக்கைகள் பல ஒன்றுக்கொன்று முரணாக இருந்தது - இப்பொழுதும் தொடருகின்ற நிலைமைகள் உள்ளன.

அப்படிப்பட்ட பலவித நம்பிக்கை, வழிபாட்டு முறை களை உள்ளக்கிய கலவைதான் இந்து மதம். ‘நாத்திகர்' என அறியப்படுபவர்களையும், உள்ளடக்கியது. இந்து மதத்தைப் பொறுத்த அளவில் ‘நாத்திகம்' என்பது கடவுள் மறுப்பு அல்ல; வேத மறுப்புகள், வேதங்கள் கூறும் சடங்குகள் மறுப்புதான்.

இப்படி பலவித நம்பிக்கைகளின் கலவையாக உள்ளது, ஓர்மைத்தன்மை உள்ளதாக கருதப்படுகிறது. இவைகளை யெல்லாம் தாண்டி, பல்வேறு நம்பிக்கை களையும் தாண்டி மனிதரை, மனித குலத்தை நினைத்து சமுதாயப் பணியைத் தொடங்கினார் பெரியார். மனித நேயம் அற்ற சமத்துவமின்மையை நீக்கிட பாடுபட்டார். பெரியாரின் ‘நாத்திகம்' என்பது சமத்துவத்திற்கு எதிரான அத்துணை தடைகளையும் தகர்த்து மனித நேயம் நிறைந்த சமுதாயத்தைப் படைப்பதே.

மேற்கத்திய நாடுகளில் ‘நாத்திகம்' என்பது 'atheism' எனும் பெயரில் அறியப்படுகிறது. ‘Atheism' எனும் ஆங்கிலச் சொல்லாக்கம் எதிர்மறை அடிப்படையிலா னது. ‘Atheism' என்று சொல்லப்படும் ஆங்கிலச் சொல் லாக்கத்தின் எதிர்மறை நிலையே ‘atheism'. ஒரு நேர் மறையான கருத்து எதிர்மறை நிலையில் அறியப்படு கிறது. இதன் விளக்கமாக நாத்திகத்தை (atheism), நேர்மறை நாத்திகம் (positive atheism) என பரப்புரை செய்து வந்தார் நாத்திகர் மய்யத்தை நிறுவிய கோரா. அவர் கூறிய நேர்மறை நாத்திகம், மனித சமத்துவத்தை வலியுறுத்துவதே என விஜயம் அவர்களின் முதலாம் ஆண்டு நினைவு நாள் நிகழ்ச்சியில் உரையாற்றும் பொழுது தமிழர் தலைவர் குறிப்பிட்டுக் கூறினார்.

தந்தை பெரியார் பரப்புரை செய்த நாத்திகம் என்பது மனித சமத்துவம், மனிதநேயம் என்பதை மேற்கத்திய கொள்கை நிலைப்பாட்டைக் கொண்டு நேர்மறை நாத்திகம் (positive atheism) என விளக்கமளித்தார்.

கோரா பரப்புரை செய்த நேர்மறை நாத்திகம், தந்தை பெரியார் கூறிய மனித நேயத்தை மய்யப்படுத்திய நாத்திகமே என்பதை தமிழர் தலைவர் தமது 13 நிமிட உரையில் கூறினார்.

தமிழர் தலைவர் உரை

விஜயம் முதலாமாண்டு நினைவு நாள் நிகழ்ச்சியில் தமிழர் தலைவர் ஆற்றிய உரையின் சுருக்கம் வருமாறு:

கோ.விஜயம் அவர்களின் முதலாமாண்டு நினை வேந்தல் நிகழ்ச்சி  நினைவில் நிலைத்து நிற்கும் நிகழ்ச்சி ஆகும். துயரம் நிறைந்த நெஞ்சத்துடன், விஜயம் அவர் கள் ஆற்றிய பணியினை நினைத்துப் பார்க்கிறோம். விஜயவாடா நாத்திக மய்யத்தின் நிறுவனர் கோரா, பின்னர் அவரது துணைவியார் சரஸ்வதி கோரா, அவரது மூத்த சகோதரர் லவனம் ஆகியோருக்குப் பின் நாத்திக மய்யத்தின் செயல் இயக்குநராக பல்வேறு இன்னல்களுக்கிடையிலும் விஜயம் சிறப்பாகப் பணி ஆற்றி வந்தார். திராவிடர் கழகத் தோழர்களுக்கு மிகவும் அறிமுகமான, பழக்கமுள்ள நாத்திக மய்யத்தின் தலைவர் விஜயம் “நாமெல்லாம் சக போராளிகள்" (co-fighters) எனச் சொல்லுவார். அவர் ஆற்றிய பணி வெறும் சமூகச் செயல்பாடு மட்டுமல்ல, அதற்கும் மேலே சமூகப் போராட்டம் என்பதை மய்யப்படுத்தியதாக இருந்தது.

கரோனா தொற்று பரவி வரும் காலத்தில் நாம் இருக் கிறோம். தொற்றைத் தடுப்பதற்கு - கட்டுப்படுத்துவதற்கு மருத்துவ சூழலில் சார்ந்து பல்வேறு நடவடிக்கைகள் எடுக்கப்பட்டு வந்தாலும், ஆட்சியில் உள்ள பழமை வாதிகளால் அறிவியலுக்குப் புறம்பான பல செய்திகளும் பரப்பப்பட்டு வருகின்றன.

‘நாட்டு மாட்டு மூத்திரம்' குடித்து வந்தால் கரோனா தாக்காது என ஒரு நாடாளுமன்ற உறுப்பினர் பரப்புரை செய்து வருகிறார். அந்த உறுப்பினரே கரோனா தொற் றின் முதல் அலையில் பாதிக்கப்பட்டு, மருத்துவமனையில் அனுமதிக்கப்பட்டு சிகிச்சை பெற்றார் என்பதை மக்கள் மறந்திருப்பார்கள் என்ற நினைப்பில் பேசுகிறார்.

போலி அறிவியல் ஆட்சி அதிகார வலிமையோடு பரப்புரை செய்யப்பட்டு வருகிறது. இந்தச் சூழலில் அறிவியல் மனப்பான்மையினை வளர்க்கும் பணியில், பரப்புரை செய்யும் நிலையில் நாம் உள்ளோம். அத் தகைய பணிகளை ஆற்றி வந்தார் விஜயம்.

விஜயம் ஆற்றிவந்த நேர்மறை நாத்திகம் என்பது மனித குலத்தை, மனிதர் நலம் சார்ந்ததே. விஜயம் அவர் கள் தனது இறுதி மூச்சு வரை நாத்திகராக, மனிதநேய மாண்பாளராக வாழ்ந்தார். அப்படிப்பட்டவர்களுக்கு ‘மறைவு' என்பது இல்லை. இந்த நிகழ்ச்சியில் இளைய தலைமுறையினர், பிஞ்சுக் குழந்தைகள் நாத்திகம் பற்றிப் பேசியதன் மூலம் விஜயம் கொள்கை ரீதியாக வாழ்ந்து கொண்டிருக்கிறார்.

திராவிடர் கழகம் நடத்திய உலக நாத்திகர் மாநாட்டு ஏற்பாட்டில் உறுதுணையாக விளங்கியவர் விஜயம். வேண்டும் பொழுதெல்லாம் சென்னை - பெரியார் திடலுக்கு உடனே வருகை புரிவதை வழக்கமாகக் கொண்டவர்.

தற்போதைய நிர்வாகப் பொறுப்பில் உள்ளோர் விஜயம் அவர்கள் விட்டுச் சென்ற பணிகளைச் சிறப் பாகச் செய்து வருகின்றனர்.

நாத்திகம் என்பது உண்மை நிலை. அதை உரக்கச் சொல்லி, சமத்துவ, மதச்சார்பற்ற மனிதநேயம் நிறைந்த சமுதாயத்தைப் படைக்க பணியாற்றுவதே நாம் விஜயம் அவர்களுக்கு செய்திடும் போற்றுதல் ஆகும் நாத்திக, மனிதநேயப் பணியில் தொடர்ந்து பயணிப்போம்.

இவ்வாறு தமிழர் தலைவர் தமதுரையில் குறிப் பிட்டார்.

நிகழ்ச்சியில் பங்கேற்றோர்

விஜயம் நினைவுநாள் நிகழ்ச்சியில் சோன்ஜா எக் கெரிக்ஸ், (சுவிட்சர்லாந்து, மேனாள் தலைவர், பன் னாட்டு மனிதநேய நாத்திகர் ஒன்றியம் - International Humanist and Ethical Union) வோக்ஸ் முல்லர், ஜெர்மனி பகுத்தறிவாளர் கழகம், பேராசிரியர் தானே சுவர் சாகு (தலைவர், ஒடிசா பகுத்தறிவாளர் மன்றம்), கே.நந்தேசு சேனாபதி, ரமணமூர்த்தி, கோரா குடும்பத் தினர், டாக்டர் சமரம், நியாயந்தா, டிமாஸ் கோரா, அரிசுப்பிரமணியம், ஜசுதி கோரா மழலையர் சன்ஜால் கோரா, ஏலோஸ் கோரா மற்றும் ஷரிப் கோரா பங் கேற்றனர்.

பார்வையாளர்களாக திராவிடர் கழகப் பொருளாளர் வீ.குமரேசன், திராவிட மாணவர் கழக மாநில செயலாளர் பிரின்சு என்னாரெசு பெரியார், மாநில பகுத்தறிவு எழுத்தாளர் மன்றத் தலைவர் முனைவர் வா.நேரு, பெங்களூரு முல்லைகோ மற்றும் பல தோழர்கள் கலந்து கொண்டனர்.

நிகழ்ச்சியினை விஜயம் அவர்களின் புதல்வர் விகாஸ் கோரா ஒருங்கிணைத்து நடத்தினார்.

தொகுப்பு: வீ.குமரேசன்

ஏரியன் ஷெரீன் - 2 கெட்ட சேதி - நல்ல சேதி

Home -> 2011 உண்மை இதழ்கள் -> செப்டம்பர் 16-30 -> உலகப் பகுத்தறிவாளர் - ஏரியன் ஸெரீன் - 2

உலகப் பகுத்தறிவாளர் - ஏரியன் ஸெரீன் - 2

- சு. அறிவுக்கரசு

அமெரிக்காவில் கடவுள் மறுப்பு

இங்கிலாந்தின் பேருந்து விளம்பரம் பற்றிக் கேள்விப்பட்ட அமெரிக்க மனிதநேய அமைப்பினர் தம் நாட்டிலும் நடத்தினர். ஏன் கடவுளை நம்புகிறீர்கள்? நன்மைக்காகவே நல்லவர்களாகவே இருங்களேன்! என்ற வாசகத்தை 2008 டிசம்பரில் வாஷிங்டனில் நடத்தினர். 2009 மார்ச் மாதம் முடியவும் இப்பிரச்சார இயக்கம் அமெரிக்காவில் நடந்தது.

கடவுள் இல்லாமலே நல்லவராக வாழலாம் எனும் விளம்பர இயக்கம் இன்டியானா மாநிலம் புலூமிங்டன் எனும் நகரில் 2009 பிப்ரவரியில் நடந்தது.
கனடாவில்...

தாராளச் சிந்தனையாளர் கழகத்தின் சார்பில் கனடா நாட்டில் பிரெஞ்ச் மொழியில் (லண்டனைப் போலவே வாசகங்கள்) விளம்பர வாசகங்கள் எழுதப்பட்டு அனுமதி கோரப்பட்டன. கனடாவின் தலைநகரமான ஒட்டாவா நகரில் அனுமதி முதலில் மறுக்கப்பட்டது. பின்னர் ஒட்டாவா நகரமன்றம் அனுமதி அளித்தது.

நியுசிலாந்தில்...

நியுசிலாந்து நாட்டின் பெருநகரங்களான ஆக்லாண்டு, வெல்லிங்டன், கிறிஸ்ட்சர்ச் ஆகியவற்றில் பெரும் பெரும் விளம்பரத் தட்டிகள் லண்டன் விளம்பர வாசகங்களுடன் அமைக்கப்பட்டன. இதற்கென 20 ஆயிரம் டாலர் தொகை இரண்டே நாளில் வசூலிக்கப்பட்டது எனும்போது மக்கள் ஆதரவை அறிந்து கொள்ளலாம்.

இத்தாலியில்...

இத்தாலி நாட்டின் ஜெனோவா நகரில் ஒரு கெட்ட சேதி - கடவுள் இல்லை! நல்ல சேதி - கடவுள் உங்களுக்குத் தேவை இல்லை என்ற வாசகங்கள் விளம்பரப்படுத்திட அனுமதி கோரப்பட்டது. அனுமதிக்கான தயக்கமும் புதிய வழக்கொன்று தாக்குதலான காரணத்தால் வாசகங்கள் மாற்றி அமைக்கப்பட்டன. ஒரு நற்செய்தி - இத்தாலியில் பத்து லட்சக்கணக்கான நாத்திகர்கள் இருக்கின்றனர். மிகமிக நல்ல செய்தி - அவர்கள் கருத்துச் சுதந்திரத்தை விரும்புகின்றனர் என்ற வாசகம் விதிமுறைக்குட்பட்டு விளம்பரப்படுத்தப் பட்டது.

அய்ரோப்பா முழுவதிலும்...

ஸ்பெயின் நாட்டின் பார்க்லோனா, மாட்ரிட், ஸாலன்சியா நகரங்களில் லண்டன் பேருந்து வாசகங்கள் ஸ்பானிஷ் மொழியில் மொழிபெயர்க்கப்பட்டு விளம்பரம் செய்யப்பட்டது. கத்தோலிக்கர்களின் எதிர்ப்பை மீறி விளம்பரம் செய்யப்பட்டது.

ஃபின்லாந்தில் தலைநகர் ஹெல்சிங்கி, தாம்பரே நகரங்களில் இதேமாதிரி விளம்பரம் செய்யப்பட்டது.

அயர்லாந்து நாட்டில் தொடர்வண்டி களில் விளம்பரம் செய்யப்பட்டது. இந்நாட்டில் இது மிகவும் அவசியத் தேவை எனக் கருதப்பட்டது. காரணம் நீதிபதிகளும், ஊர்க்குழுத் தலைவர்களும் மத உறுதிமொழி (RELIGIOUS OATH) எடுக்கவேண்டும். இதற்குச் சம்மதம் இல்லாத இரண்டரை லட்சம் பேர் இம்மாதிரிப் பதவிகளில் அமராமல் இருக்கும் அவலம் அயர்லாந்தில் உள்ளது.

சுவீடன் நாட்டில் ஸ்டாக்ஹோம் மெட்ரோ ரயில்களில் லண்டன் நகரைப் போன்றே விளம்பர வாசகங்கள் விளம்பரப்படுத்தப்பட்டன.

ரஷ்ய கோமாளித்தனம்

லண்டன் நகர விளம்பர வாசகங்கள் ரஷ்ய மொழியில் மாற்றம் செய்யப்பட்டு விளம்பரம் செய்ய அனுமதி கோரப்பட்டபோது  அதிகாரத்திலிருக்கும் மதவாதிகள் மறுத்து விட்டனர். ரஷிய அரசமைப்புச் சட்டத்தின் 14ஆம் பிரிவு ரஷியக் கூட்டரசு மதச் சார்பற்றது எனும் வாசகத்தையும்கூட விளம்பரம் செய்ய அனுமதிக்கவில்லை. எந்தவித விளம்பரத்தையும் அனுமதிக்க முடியாது என பெரிய, சிறிய விளம்பர நிறுவனங்கள் மறுத்துவிட்டன. என்ன கம்யூனிசமோ? என்ன பொருள்முதல் வாதமோ? என்ன நவம்பர் புரட்சியோ, புடலங்காய்! மாகாளி பராசக்தி கடைக்கண் வைத்ததால் வந்த புரட்சி எனப் பாரதி பாடியதுபோல், பக்திப் புரட்சியோ?

டாப் 10 விளம்பரம்

நேர்மாறாக, லண்டன் மாநகரில் செய்யப்பட்ட விளம்பரத்திற்குச் சிறுசிறு எதிர்ப்புகள் வந்தாலும், அது டாப் 10 விளம்பரங்களில் ஒன்றாக இருந்தது என்பது பெருமைப்பட வேண்டியது!

நிச்சயமாக கடவுள் இருக்கிறது என்று கிறித்துவ அமைப்புகள் போட்டிக்குச் செய்த விளம்பரம் மக்களின் பலத்த வெறுப்புக்கும் கண்டனத்திற்கும் ஆளானது. ஆயிரத்திற்கும் மேற்பட்ட கண்டனங்கள் குவிந்தன. மக்கள் எந்தப் பக்கம் என்பதை இதுவே காட்டிடும்.

இன்றைய லண்டனில்...

ஆனாலும் என்ன? லண்டனில் பல இடங்களில் இசுலாமியர்கள் எச்சரிக்கைப் பலகைகள் வைத்து விளம்பரம் செய்கிறார்கள் என்பது இந்த வாரச் செய்தி. அவர்கள் பத்துப்பேர் வசிக்கும் பகுதியில் இது ஷரியத் சட்டம்  அமலில் உள்ள பகுதி என எழுதி இதைச் சாப்பிடாதே, அதைக் குடிக்காதே என்று கட்டுத்திட்டங்களை எழுதி வைத்திருக்கிறார்கள். ஷரியத் சட்டப்படி தண்டனையும் தருவார்களோ? இங்கிலாந்து நாட்டின் சட்டம் என்ன ஆயிற்றாம்? மதவெறி என்னென்ன செய்கிறது பாருங்கள்.

சோமாலியாவில்...

சோமாலியா ஆப்பிரிக்க நாடு. உலகிலேயே பஞ்சம், பசி, பட்டினிச் சாவு என்று சொல்லொணாக் கொடுமைகள் மலிந்த நாடு. மக்களை மீட்க அரசும் ஒன்றும் செய்ய முடியவில்லை. அவர்கள் நம்பி வணங்கும் கடவுளும் ஒன்றும் செய்ய முடியவில்லை. திருடிக் கொள்ளையடித்துத்தான் வாழ முடியும் என்ற நிலை. சோமாலியக் கடற்கொள்ளையர்கள் பற்றி சமீபகாலச் செய்திகள் நிறைய. வரலாற்றில் பதிந்த கரீபியன் கடற்கொள்ளைக்காரர்களைக் காணோம். அந்த இடத்தை இவர்கள் பிடித்துக் கொண்டார்கள். இந்த நிலையில் அந்த நாட்டில் சமோசா சாப்பிடத் தடை! இந்தியத்தின் பண்டமான சமோசா மலிவானது என்பதால் மட்டுமல்லாமல் அதன் ருசியாலும் அங்கே பிரபலம். ஏன் தடை? அதன் முக்கோண வடிவம் - கத்தோலிக்கர்களின் முக்கடவுள் (TRINITY) கொள்கையை நினைவுபடுத்துகிறதாம். ஆகவே, சாப்பிடக்கூடாது என்கிறார்கள் சோமாலிய முசுலிம்கள். எப்படி இருக்கிறது மதவெறி!

சவுதியில்...

சவுதி அரேபியாதான் இசுலாத்தின் தாயகம். மெக்கா, மதினா அங்கேதான். கருப்புக்கல் கட்டடமான காஃபா அங்கேதான். முசுலிம்களின் 5 முக்கியக் கடமைகளில் ஒன்றாகிய ஹஜ் நிறைவேற்ற யாத்திரை போகுமிடமும் அங்கேதான். இந்தப் புனித இடங்களின் காப்பாளர் அந்நாட்டு மன்னர்தான். அந்த மன்னரையும் அவர்தம் மகனையும் தீர்த்துக் கட்ட வேண்டும் என்று அல்கய்தா அமைப்பின் போர்த்தலைவர் (ஏமன் நாட்டில் இருப்பவர்) அறிவித்திருக்கிறார். என்ன கொடுமையை அவர்கள் செய்தார்களாம்? அவர்கள் இருவரும் மத நெறிக்குப் புறம்பானவற்றைக் கடைப்பிடிக்கிறார்களாம்! (APOSTATES) எனக் குற்றம் சுமத்திக் கொன்றுவிடக் கட்டளையாம்! ஒரே மதத்திற்குள்ளேயே இத்தகைய வேறுபாடு, முரண்பாடு! இதில் தீர்வு காணும் அதிகாரம் யாருக்கு?

ஒரு மதமும் வேண்டாம் - தம்பி

உண்மை உடையார்க்கே - என்ற புரட்சிக் கவிஞரின் கருத்தை ஏற்று பெருமதங்கள் எனும் பீடை பிடியாதிருக்க வேண்டும் எனும் நிலை உலக மக்கள் அனைவருக்கும் வரவேண்டும். இதற்குப் பகுத்தறிவு வளர வேண்டும், அதனை வளர்க்க வேண்டும். மதவாதிகளைப் போலவே எல்லா வகையிலும் சேவை மனப்பான்மையுடன் பணி செய்து பரப்ப வேண்டும்.

எப்படிப் பரப்புவது?

பகுத்தறிவு என்பது படித்தவர்கள் சப்ஜெக்ட் என்ற மனோபாவம் மாறவேண்டும். மனிதர்கள் அனைவருக்கும் உரிய, இயல்பான பகுத்தறிவை எல்லா நிலையிலும் அனைவரும் பயன்படுத்திட வேண்டும் என்கிற விழிப்புணர்வைப் பரப்பிட வேண்டும். அந்த வகையில் பரப்புரை மேற்கொண்ட ஏரியன் ஷெரீன் மிகவும் பாராட்டத்தக்கவர்.

தொடக்கப் பாடம் (ALPHA COURSE) என்ற பெயரில் லண்டனில் விளம்பரங்கள் வருகின்றன. மீண்டும் அரிச்சுவடிதான், பாலபாடம்தான்! கர்த்தரை நம்பு, கிறித்துவனாகு, இல்லையேல் கடைசி வரை கடும் நரகம்தான். இந்தக் காடியேறிய கள், புதிய மொந்தையில் புதிய பெயரில் வழங்கப்படுகிறது. இப்படிப் புதுப்புது அவதாரங்கள் எடுத்து மதவாதிகள் பிரச்சாரம் செய்கிறார்கள்.

அவர்களை முறியடிக்கும் பரப்புரை முறைகளைப் பகுத்தறிவாளர்கள் பயன்படுத்து கிறார்கள். இதற்கென வலைத்தளத்தை (WEBSITE) உருவாக்கியுள்ளனர். தனிநபர் தொடங்கி நடத்தும் முகநூல் (FACE BOOK) குழுக்கள் அமைக்கப்பட்டு பகுத்தறிவாளர்கள் தம் கருத்தைப் பதிவு செய்கிறார்கள். மற்றவர்களைத் தூண்டுகிறார்கள் தாமும் பதிவு செய்ய! இதன்மூலம் மற்றவர்களைச் சிந்திக்கத் தூண்டுகிறார்கள். சிந்திப்பதே மதத்திற்கு எதிரான குற்றம்தானே! பாபம்தானே! அந்தப் பாபத்தைச் செய்யும்படித் தூண்டினாலே பரிகாரம் கண்டிட முடியுமே!

ஒரு விமர்சகர் எழுதியதைப் போல, பேருந்து விளம்பரப் பெண்மணியான ஏரியன் ஷெரீன் மென்மையாகப் பேசினாலும் ரிச்சர்டு டாகின்ஸ், கிறிஸ்டபர் ஹிட்சன்ஸ் போன்றோரைக் காட்டிலும் உறுதியானவர். அவருடைய நாத்திகம் தவறானது என அவருடைய உறவினர்கள் பலபேர் கூறியபோதுகூட, அமைதியாக நான் நீங்கள் அல்லவே! நான் நானாகத்தானே இருக்க முடியும்? நான் எப்படி இருக்க வேண்டும் என நீங்கள் எப்படி எனக்குக் கூறமுடியும்? எனப் பதில் கேள்விகள் கேட்டு மடக்கியவர்.

ஆத்திக நம்பிக்கையை வளர்க்கும் பள்ளிகள் ஒழிக்கப்பட வேண்டும் என்கிறார். இசுலாமியப் பள்ளிகளில் அய்ரோப்பியக் கிறித்துவக் குழந்தைகளையும், கிறித்துவப் பள்ளிகளில் ஆசிய முஸ்லிம் குழந்தைகளையும் சேர்த்துக் கற்பித்தால் மதங்கள் பற்றிய தவறான கருத்துகள் மறையும் என்கிறார்.

ரிச்சர்டு டாகின்ஸ் கூறியதைப்போல முசுலிம் பிள்ளை, கிறித்துவப் பிள்ளை எனக் கூறாமல் முசுலிம் பெற்றோருக்குப் பிறந்தது, கிறித்துவப் பெற்றோருக்குப் பிறந்தது எனக் கூறுவதோடு நிறுத்திக் கொள்ள வேண்டும்; எந்த மதம் என்பதை அந்தப் பிள்ளை வளர்ந்தபின் முடிவு செய்யட்டும் என்கிற கருத்தைக் கொண்டிருக்கிறார்.

அவர் வசிக்கும் ஸ்காட்லாந்து பகுதியில் 65 விழுக்காடுப் பேர் கிறித்துவர் என்றாலும் 28 விழுக்காடுப் பேர் மதம் இல்லை என்போராக 2001 மக்கள் தொகைக் கணக்கெடுப்பில் பதிவு செய்துள்ளனர்.

புத்தக அலமாரிகளில் மட்டுமே இருந்த பகுத்தறிவு, நாத்திகக் கருத்துகளைப் பொது இடத்திற்குக் கொண்டு விவாதித்திடும் நிலையை இவரது பேருந்துப் பரப்புரை செய்திருக்கிறது. பாராட்டுவோம்!

மாநிலப் பகுத்தறிவாளர் கழக மாநாடு, சென்னை பெரியார் திடல் 10.1.1996

உலக நாத்திகர் மாநாட்டில்கலந்து கொண்ட சிறப்பு அழைப்பாளர்களுடன் ஆசிரியர்

பன்னாட்டு நாத்திக பகுத்தறிவாளர்கள் மாநாட்டில் கலந்து கொண்ட வெளிநாட்டு அழைப்பாளர்களுடன் ஆசிரியர்

மாநிலப் பகுத்தறிவாளர் கழக மாநாடு சென்னை பெரியார் திடலில் 10.1.1996 அன்று வெகு சிறப்புடன் நடைபெற்றது. மாநாட்டையொட்டி மூடநம்பிக்கை ஒழிப்பு ஊர்வலம், பெரியார் பிஞ்சுகள், இளைஞரணி, மகளிரணியினர், மாணவரணி, தொழிலாளரணி, பகுத்தறிவாளர்கள் என அனைவரும் கழகக் கொடியினை உயர்த்திப் பிடித்தவண்ணம் கலந்துகொண்டனர். ‘தீ மிதி’ நிகழ்வும், மாநாட்டு மேடையில் நடைபெற்றது. திராவிடர் கழக அமைப்பாளர் பேபி சமரசத்தின் மகன் செல்வன் எழிலனுக்கும், ஒசூர் மாணிக்கவாசகம் தனலட்சுமி ஆகியோரின் செல்வி செந்துவுக்கும் வாழ்க்கைத் துணை நல ஒப்பந்தத்தை கூறச் செய்து திருமணம் நடத்தி வைத்தேன்.

மாநாட்டில் தமிழக நிதி அமைச்சர் டாக்டர் நாவலர் இரா.நெடுஞ்செழியன் அவர்கள் கலந்துகொண்டு சிறப்புரையாற்றினார். நடிகர் இனமுரசு சத்யராஜ், எம்.டி.கோபால கிருட்டினன், ஆந்திர மாநிலம் விஜயவாடா, கோரா நாத்திக மய்யத்தின் அமைப்பாளர் இலவணம், ஆஸ்திரேலியாவைச் சேர்ந்த நாத்திக அமைப்பின் அதிகாரப் பூர்வப் பங்கேற்பாளரான நார்மன் டெய்லர், அமெரிக்காவைச் சேர்ந்த திருமதி பார்பராஸ் டாக்கர், ஜெர்மனியைச் சேர்ந்த ஃப்ராங்க் ஷீட், லண்டனைச் சேர்ந்த பிரிட்டீஷ் ஹுமனிஸ்ட் அமைப்பின் துணைத் தலைவர் டாக்டர் ஹாரி ஸ்டோப்ஸ் ரோப் ஆகியோர் உரையாற்றினார்கள். முக்கிய தீர்மானங்களும் நிறைவேற்றப்பட்டன.

மாநாட்டுத் தலைமை உரையாற்றுகையில், “ஒரு காலத்தில் ரசல், இங்கர்சால் போன்றவர்களை நாம் இங்குக் கொண்டு வந்தோம். இன்று தந்தை பெரியாரை பிற நாட்டவர்கள் கொண்டு செல்கிறார்கள். இது ஒரு மகிழ்ச்சிக்குரிய திருப்பம்! தந்தை பெரியாரின் தத்துவம். தலைமுறை இடைவெளி யில்லாமல் வளர்ந்து கொண்டிருக்கிறது. நம்முடைய இயக்கம், தமிழகத்தைத் தாண்டி, எல்லைகளைக் கடந்து உலக மானிட இயக்கமாக வளர்ந்து கொண்டிருக்கிறது’’ என்பன போன்ற தந்தை பெரியாரின் பல கருத்துகளை எடுத்துக் கூறினேன்.

மாநிலப் பகுத்தறிவாளர் கழக மாநாட்டினைத் தொடர்ந்து, 11.1.1996 அன்று தஞ்சை வல்லத்தில் பன்னாட்டு நாத்திக பகுத்தறிவாளர்கள் Lasse Siren (Finland), Harie Bols (Holland), Robyn Johannes (Belgium), Robert Morgan (U.S.), Pertti Holopa Nien (Sweedish), Herma Mittendorff (Holland), Eric Jacob (Germany), Norman Taylor (Australia), G.Lavanam (Vijayawada), Everelt Cross ஆகியோர் ஒன்றிணைந்து கூட்டாகத் தந்தை பெரியார் முழு உருவச் சிலையினைத் திறந்து வைத்தனர். அறிஞர்களின் ஆங்கில உரையினை பகுத்தறிவாளர் கழகத் தலைவர் கு.வெ.கி.ஆசான் அவர்கள் மொழிபெயர்த்துக் கூறினார். நிகழ்வில் நிறைவுரையாற்றுகையில், “சிலை அமைப்புக் குழுவினருக்கும், கழகத் தோழர்களும், சிலையினை அன்பளிப்பாக வழங்கிய சட்டமன்ற உறுப்பினர் கு.தங்கமுத்து, ஏணிப்படி அமைத்துத் தந்த கல்வி வள்ளல் ‘வீகேயென் கண்ணப்பன், சிலையின் அடிபீடத்தை சிறப்பாக உருவாக்கித் தந்த ஈஸ்வரனார், வேழவேந்தன் ஆகியோருக்கு பாராட்டையும், நன்றியையும் தெரிவித்தேன். நமது அழைப்பின் பேரில் கலந்துகொண்ட பன்னாட்டு நாத்திகர்களுக்கு நினைவுப் பரிசளித்து, பாராட்டையும் தெரிவித்து, பெரியாரின் பகுத்தறிவுக் கருத்துகள் காலத்தைக் கடந்து என்றும் நாட்டிற்குத் தேவை’’ என பல கருத்துகளை கூறினேன். பன்னாட்டு நாத்திகர்களை வழி நெடுக கழகத் தோழர்கள் உற்சாகம் பொங்க வரவேற்றனர்.

- அய்யாவின் அடிச்சுவட்டில் கட்டுரையின் ஒரு பகுதி

- உண்மை இதழ், ஏப்ரல் 16- 30 .21

நான்காவது நான்காவது உலக நாத்திகர் மாநாடு!

உலக நாத்திகர் மாநாட்டில்கலந்து கொண்ட சிறப்பு அழைப்பாளர்களுடன் ஆசிரியர்

நான்காவது உலக நாத்திகர் மாநாடு ஆந்திரப்பிரதேசம் விஜயவாடாவில் உள்ள பென்ஸ் சர்க்கிளில் நாத்திக கேந்திரத்தில் 4.1.1996 அன்று துவங்கியது. மாநாட்டிற்கு உலகின் பல்வேறு பகுதிகளிலிருந்து நாத்திகர்களும், அறிஞர்களும் வந்திருந்தனர். தமிழ்நாட்டிலிருந்து நம் கழகத் தோழர்கள் உள்பட 108 நாத்திகர்களுடன் கலந்து கொண்டோம். முதல் நாள் நிகழ்வில் வரவேற்புரையாற்றுகையில், “தந்தை பெரியாரின் நாத்திகப் பிரச்சாரத்தை விரிவாக எடுத்துரைத்தேன். மனித நேயத்தை வலியுறுத்தி பெரியார் ஆற்றிய தொண்டினை விளக்கிப் பேசினேன். இன்றைய சூழ்நிலையில் விஞ்ஞான சாதனங்களை தமக்குச் சாதகமாக்கி அஞ்ஞானத்தைப் பரப்புவதற்கு எதிராக தீவிரப் பிரச்சாரத்தைச் செய்ய வேண்டியதன் அவசியத்தை முன்னிறுத்திப் பேசினேன். அந்த வரவேற்பு உரையோடு மாநாட்டுப் பிரதிநிதிகளின் கவனத்திற்கு மாநாட்டில் முக்கிய விவாதமாக எடுத்துக்கொள்ள பத்து யோசனைகளையும் முன்வைத்து அதனை இரண்டு நாள் நிகழ்ச்சிகளிலும் விவாதத்திற்கு எடுத்துக் கொள்ள வேண்டும் என கோரிக்கை விடுத்தேன்.’’ அதனைத் தொடர்ந்து மாநாட்டிற்கு வந்திருந்த இங்கிலாந்து மனிதநேய சங்கத்தின் தலைவர் சர்.ஹெர்மன் பான்டி தலைமை உரையாற்றினார். நாடாளுமன்ற உறுப்பினரும், சிறந்த கார்ட்டூனிஸ்ட் மற்றும் பத்திரிகையாளர் அபு ஆபிரகாம், வி.சோபனதிரீஸ்வரராவ், சரசுவதி கோரா, கே.சுப்பாராஜு, விஜயவாடா நகர மேயர் டி.வெங்கடேசுவரராவ், பன்னாட்டு மனிதநேய கழகத்தின் தலைவர் ஜேன் லைன் வில்சன், அமெரிக்காவின் நாத்திகத் தலைவர் லீபேக்கர், ஆஸ்திரேலிய நாத்திக சங்கத்தின் பிரதிநிதி நார்மன் டைலர், அய்ரோப்பிய நாத்திக சங்கத்தின் உபதலைவர் ராபின் ஜோகன்னஸ் எனப் பல முக்கியமானோர் வந்திருந்தனர். அவர்களிடையே கருத்துப் பரிமாற்றத்தையும் செய்துகொண்டோம்.

இரண்டாம் நாள் மாநாட்டில் பல்வேறு நாடுகளிலிருந்து வந்திருந்த நாத்திக அறிஞர்கள் சிறப்புரையாற்றினார்கள். மாநாட்டின் குறிக்கோளாக, “நம்பிக்கையான எதிர்காலத்திற்குப் பயனுள்ள நாத்திகம்’’“Positive Atheism for a Positive Future” என்கிற குறிக்கோளை முன்வைத்து மாநாடு நடைபெற்றது. கழகத்தின் சார்பில் வந்திருந்த ராஜதுரை, அருள்மொழி, சுனந்தா சேத், டாக்டர் நடராசன் ஆகியோர் உரை நிகழ்த்தினார்கள். ஒரிசாவிலிருந்து வந்து உரையாற்றிய பேராசிரியர் ந.ராமச்சந்திரா தந்தை பெரியாரின் கருத்துகளால் நாத்திகவாதி ஆனதைச் சுட்டிக்காட்டினார். தந்தை பெரியாரின் சுயமரியாதைத் திருமணத்தை, தான் மேற்கொண்டதாகக் கூறினார்.

மாநாட்டின் இறுதி நாளில் நிறைவுரையாற்றுகையில், “மாநாட்டில் பங்கு கொண்டு உரையாற்றுவதிலே மிகுந்த மகிழ்ச்சி அடைகிறேன். தந்தை பெரியார் வாழ்ந்த காலத்தில் அமெரிக்காவிலிருந்து வந்த செய்தியைப் படித்து மிகவும் வியந்து அதனை பெரியாரின் கவனத்திற்குக் கொண்டு சென்றேன். தந்தை பெரியார் அந்தச் செய்தியைப் படித்துவிட்டு மிகவும் நிதானமாக, “மூடநம்பிக்கை என்பது இந்திய நாட்டிற்கு மட்டுமே உரித்தானது அல்ல; அது அமெரிக்கா மட்டுமின்றி அனைத்து நாடுகளிலும் பரவியுள்ளது’’ என என்னிடம் குறிப்பிட்டார். ஆகவே, இந்த மாநாட்டின் தத்துவமாக, மனித நேயத்தை, நாத்திகத்தைப் பரப்புகின்ற ஒளிவிளக்குகளாக நாம் செல்ல வேண்டும். சுயமரியாதை கொண்ட வாழ்க்கையை அமைத்திட நாம் அனைவரும் கூட்டுப் போராளிகளாக இருப்போம். என்னிடம் பல வெளிநாட்டு நண்பர்கள், திராவிடர் கழகத்தினர் கருப்புச் சட்டை அணிந்துள்ளதற்கான காரணத்தைக் கேட்டனர். இந்தச் சமுதாயம் இன்றும் இருளில் உள்ளதை உலகுக்குத் தெரிவிக்கின்ற வகையில் நாங்கள் கருஞ்சட்டை அணிகிறோம் என்றேன். நாம் ஒரு அமைதியான புரட்சியைச் செய்கிறோம். பெரியார், கோரா, எம்.என்.ராய் ஆகியோரது கருத்துகளே நம்மை வழிநடத்துகின்றன.

சுயமரியாதை, மனிதநேயம், பகுத்தறிவுச் சிந்தனைகள் ஆகிய இவையே உலகுக்கு வழிகாட்டக்கூடியவை! புதிய உலகை உருவாக்குவோம். இந்தப் பணியில் திராவிடர் கழகம் தனது முழு ஈடுபாட்டையும் செலுத்தும். வாழ்க பெரியார்!’’ என்பன போன்ற பல கருத்துகளை மாநாட்டில் தெரிவித்து நிறைவு செய்தேன்.

- அய்யாவின் அடிச்சுவட்டில் கட்டுரையின் ஒரு பகுதி

- உண்மை இதழ், ஏப்ரல் 16-30.21

சார்லஸ்_பிராட்லா பிரிட்டனில் மிகவும் போற்றத்தக்க நாத்திகர்.

.நாத்திகம் பேசியதால் 

பதவியேற்பு நிறுத்தப்பட்டு 

நான்கு முறை நடந்த 

மறுதேர்தல்களிலும் வென்ற

#பிடிவாத_பிராட்லா 

இவரின் பிடிவாதத்தால் பிரிட்டனின் அரசியல் சட்டமே திருத்தப்பட்டது தெரியமா...??*

சார்லஸ்_பிராட்லா பிரிட்டனில் மிகவும் போற்றத்தக்க நாத்திகர்.

அவர் பிரிட்டன் நாடாளுமன்றத்திற்குத்

தேர்வு செய்யப்பட்டார். அவருக்குப் பதவிப் பிரமாணம் செய்துவைக்கப் பட்டபோது, #கடவுளின்_சாட்சியாக என்று சொல்லிப் பதவி ஏற்குமாறு கூறினார்கள்.  ஆனால் அவரோ,

"இல்லாத கடவுளை நான்

சாட்சிக்கு அழைத்துவர முடியாது" 

என்று கூறி, கடவுளின் பெயரால் பதவிப்பிரமாணம் செய்துகொள்ள உறுதியாக மறுத்துவிட்டார்.

"உங்களுக்கு நம்பிக்கை இருக்கிறதா இல்லையா என்பதைப்பற்றி எங்களுக்கு கவலையில்லை; இந்தப் பேரவை நம்புகிறது, இந்த நாட்டின் அரசியல்சாசனம் நம்புகிறது, அதற்குக் கட்டுப்பட்டவர் நீங்கள்; எனவே, 'கடவுள் சாட்சியாக' என்று கூறித்தான் நீங்கள் பதவிப்பிரமாணம் எடுத்துக்கொள்ள வேண்டும்; அதற்கு நீங்கள் மறுப்பீர் களேயானால் உங்கள் தேர்வு ரத்து செய்யப்படும்" 

என்றார்கள். அதற்கு சார்லஸ் பிராட்லா,

"இந்த அவையின் ஆயுள்காலம் ஐந்து

ஆண்டுகள்தான்; இந்த ஐந்து ஆண்டுக ளுக்காக என் ஆயுள்முழுவதும் நான் கட்டிக்காத்துவரும் என்கொள்கைகளை

விட்டுவிடமுடியாது; என் தேர்வை நீங்கள் ரத்துசெய்ய விரும்பினால், தாராளமாக நீங்கள் ரத்து செய்து

கொள்ளுங்கள்" 

என்று கூறிவிட்டார். கொஞ்சமும் தயவுதாட்சண்யம் இல்லாமல், மக்களால் நேரடியாகத் தேர்ந்தெடுக்கப் பட்ட  அவரது தேர்வை ரத்து செய்தார்கள். அவருடைய தொகுதிக்கு மீண்டும் தேர்தல் நடந்தது; மீண்டும் பிராட்லா போட்டியிட்டார்; மீண்டும் வெற்றிபெற்றார்; மீண்டும் அதே பிரச்சனை!

"எனக்கென்று ஒரு கொள்கை - ஒரு நம்பிக்கை இருக்கிறது அதை எந்தக்

காரணத்திற்காகவும் என்னால் விட்டுத்தர இயலாது"

என்று திட்டவட்டமாக மறுத்துவிட்டார் பிராட்லா. மீண்டும் அவர்தேர்வு ரத்து செய்யப்பட்டது.

மீண்டும் அவர்

தொகுதிக்குத் தேர்தல் நடந்தது; மூன்றாவது முறையும் பிராட்லா போட்டியிட்டார்; இந்த முறை முந்தைய இரண்டுமுறை வாங்கிய வாக்குகளைவிட 

அதிகவாக்குகள் வித்தியாசத்தில் வெற்றிபெற்றார் பிராட்லா!

இம்முறை கெஞ்ச ஆரம்பித்தார்கள்: 

"தயவுசெய்து பிடிவாதம் பிடிக்காமல் இந்த அவையின் வேண்டுகோளை ஏற்றுக்கொள்ளுங்கள்"

என்றார்கள்; பிராட்லா மிகவும் உறுதியாகச் சொன்னார், 

"நான் யார், என் கொள்கைகள் என்ன என்பதைத் தெரிந்துகொண்டுதான் என்

தொகுதிமக்கள் என்னை மீண்டும் மீண்டும் தேர்ந்தெடுக்கிறார்கள்; என் தேர்வை ரத்துசெய்வதன் மூலமாக என்னை தேர்ந்தெடுத்த மக்களை நீங்கள் அவமதிக்கிறீர்கள்;

அவர்களுடைய ஜனநாயக உரிமைகளை இழிவு செய்கிறீர்கள்; அவர்களுடைய தன்மானத்திற்கே சவால் விடுகிறீர்கள்"

என்று கடுமை காட்டிய பிராட்லா, "இதற்குமேல் பேச என்னிடம் எதுவுமில்லை"  

என்று கூறி அமர்ந்துவிட்டார். இந்தமுறை பிரிட்டன் பாராளுமன்றம் பணிந்தது. 

"தேர்ந்தெடுக்கப்பட்ட உறுப்பினர்கள், கடவுளின் பெயரால் மட்டுமன்றி மனசாட்சியின் பெயராலும் பதவிஏற்கலாம்" 

என்று பிரிட்டனின் அரசியல் சட்டமே திருத்தப்பட்டது. இன்று பகுத்தறிவுவாதிகள் மனசாட்சியின் பெயரால் பதவி ஏற்பதற்கு சாரலஸ் பிராட்லாதான் காரணம். 

🌿🌾🌿🌾🌿🌾🌿🌾🌿🌾🌿🌾

-வெற்றிவேந்தன் முகநூல் பக்கம், 21.4.20

Home -> 2011 இதழ்கள் -> செப்டம்பர் 01-15 -> 

2011 உண்மை இதழ்கள் -> செப்டம்பர் 01-15 -> 

உலகப் பகுத்தறிவாளர் - ஏரியன் ஸெரீன்

லண்டன் பேருந்து விளம்பரப் புகழ்  ஏரியன் ஸெரீன்

உலகப் பகுத்தறிவாளர்களிலேயே தனித்த சிறப்பான இடம் தந்தை பெரியாருக்கு உண்டு. ஏனைய நாட்டுப் பகுத்தறிவாளர்கள் அனைவருமே தங்களின் கருத்துகளை ஏடுகளில் எழுதினர். நூல்களில் பதிவு செய்தனர். மண்டபங்களில் கூட்டப்பட்ட சிறு கூட்டத்தினர் மத்தியில் விளக்கினர். இவை அத்தனையையும் செய்த பெரியார், தம் கொள்கைகளை விளக்கி ஆயிரக்கணக்கில் கூடிய மக்கள் மத்தியில் பேசினார். கொள்கைகளைப் பரப்புவதற்கான இயக்கத்தைத் தோற்றுவித்தார். தம் காலத்திற்குப் பிறகும் கொள்கைப் பரப்பல் நடைபெற்றிடும் வகையில் சிறப்பான ஏற்பாடுகள் செய்தார்.

அதன் விளைவாக அவர் மக்கள் மனதில் நீங்காத இடம் பெற்றிருக்கிறார். அவரின் கருத்துகள் இன்றளவும் புதிய புதிய பற்றாளர்களையும் பின்பற்றுவோர்களையும் கொண்டிருக்கிறது. இந்நிலை அமெரிக்காவின் இங்கர்சாலுக்குக் கிடைக்காதது. இங்கிலாந்தின் சார்லஸ் பிராட்லாவும், பெர்ட்ரண்ட் ரசலும் பெறாதது.

மற்ற மற்ற பகுத்தறிவாளர்களுக்கும் கிட்டாத நிலை. ஆனாலும்கூட, அந்நாட்டு மக்கள் படித்தவர்களாகவும், சிந்திப்பவர் களாகவும் இருக்கின்ற காரணத்தால் பகுத்தறிவின் பயனை உணர்ந்தும் செயல்பட்டும் வருகின்றனர். ஆனாலும்-கூட, மவுடிகப்போக்கு மதப்பற்றும் வெறியும் வெகுவாக மண்டிக் கிடக்கிறது என்பதை மறுப்பதற்கில்லை.

மேலை நாடுகளில்...

கிறித்துவர்களாக இருந்தால்தான் கதிமோட்சம், இல்லையேல் கடும் நரகம்தான், கடைசிவரை எரியும் நெருப்பில் எரிந்து கொண்டேதான் இருக்க வேண்டும் என்கிற பரப்புரை கிறித்துவ மத நிறுவனங்களால் செய்யப்படுகிறது. யேசு இருக்கிறார், யேசு ஜீவிக்கிறார், யேசு அழைக்கிறார், யேசு குணப்படுத்துகிறார் என்று புளுகும் மதப் பிரச்சாரகர்கள் பில்லி கிரகாம் போன்றவர்கள் அங்கும் வளர்ந்து கொழித்துக் கொண்டிருக்கிறார்கள். நம்மூர் டிஜிஎஸ் தினகரன் கோடிகோடியாகப் புளுகியே சம்பாதித்ததைப்போல சம்பாதித்துக் கொண்டிருக்கிறார்கள். அதற்கான விளம்பரங்கள், பரப்புரைகள் ஏராளம். அவற்றோடு ஒப்பிட்டால் பகுத்தறிவுப் பரப்புரையோ, விளம்பரமோ ஒன்றுமே நடைபெறுவதில்லை என்றே கூறலாம். அதனைச் செய்திடும் ஆர்வமுள்ள அமைப்பு இருந்தாலும் எடுத்துச் செய்திடும் தொண்டர்கள் இல்லை என்பது மிகவும் கசப்பான உண்மையாகும்.

தூண்டிவிட்ட சிறு பொறி

கிறித்துவ மதத்தின் பெருமை பேசும், மிரட்டல் தொனியில் அமைந்த வாசகங்களை விளம்பரம் செய்த ஒரு மதத் தொண்டர் அமைப்பின் செயல் லண்டன் நகரின் பகுத்தறிவாளர்களிடையே சிறு பொறியைக் கிளப்பியது. மக்கள் நாள்தோறும் பயன்படுத்தும் பேருந்துகளில் விளம்பரப் பதாகைகளை வைத்தது. கிறித்துவராக இல்லாதவர்கள் நரகத்தில்தான் உழல வேண்டும், எரியும் நெருப்பு ஏரியில் கடைசிவரை எரிந்து கொண்டுதான் கிடக்க வேண்டும் என்கிற வாசகங்களை அதில் எழுதி வைத்தது.

சொர்க்கலோகங்களைப் பட்டியலிட்டுத் தத்தம் மதங்களைப் பின்பற்றுமாறு தூண்டில் போடுவதென்பது உலகம் முழுக்க எல்லா மதங்களுக்குமே வாடிக்கை. இந்துவாக இல்லாவிட்டால் வைகுந்தம் இல்லை, கிறித்துவராக இல்லாவிட்டால் சொர்க்கம் இல்லை, இசுலாமியனாக இல்லாவிட்டால் சுவனம் இல்லை என்ற வகையில் ஆசை காட்டல்கள் ஒரு பக்கம். மறு பக்கத்தில் அப்படி இல்லாவிட்டால் நரகத்தீதான் என எல்லா மதங்களுமே மிரட்டல்கள்தான், பிளாக் மெயில்கள்தான். இத்தகைய பிளாக் மெயிலை விளம்பரம் செய்த காரணத்தால்தான் அதே லண்டன் நகரப் பேருந்துகளில் பகுத்தறிவு வாசகங்களை எழுதி விளம்பரம் செய்ய வேண்டும் என்கிற எண்ணம் ஏற்பட்டது.

இத்தகைய சிந்தனைப் பொறியில் தூண்டப்பட்டுச் செயலாற்றியவர் 23 வயதே ஆன ஏரியன் ஷெரீன் எனும் இளம்பெண். கிறித்துவத்தின் நூற்றுக்கணக்கான பிரிவுகளில் ஒன்றான UNITARIAN UNIVERSALIST எனும் மதத்தைச் சார்ந்த தந்தைக்கும் பார்சி மதத் தாய்க்கும் பிறந்த பெண். 03-.07.1980இல் இங்கிலாந்தில் பிறந்து தம் 21 வயதில் இதழாளராகப் பணியைத் தொடங்கி நகைச்சுவை எழுத்தாளராக விளங்கி வருபவர். பேருந்துகளில் பகுத்தறிவுக் கருத்துகளை விளம்பரம் செய்த பெரும் காரியத்தின் கர்த்தா. அதன்மூலம் அய்ரோப்பிய நாடுகளில் அதிர்ச்சி அலைகளை எழும்பச் செய்தவர். வானொலி, தொலைக்காட்சிகளில் நிகழ்ச்சி நடத்துபவர். கடவுள் ஒரு பொய் நம்பிக்கை எழுதிய ரிச்சர்டு டாகின்ஸ் நடத்திய தொலைக்காட்சி நிகழ்ச்சி போலவே, இவரது நிகழ்ச்சிகளும் வரவேற்பைப் பெற்றன என்பது இளவயதுக்காரரான இவரது பெரும் சாதனைதான்.

எதிர்வினைக் கடவுள் மறுப்பு

ஒவ்வொரு வினைக்கும் எதிர்வினை உண்டு எனும் இயற்கை விதிக்கேற்ப, மதப்பிரச்சாரகர் வைத்த விளம்பரப் பதாகை - பகுத்தறிவுப் பிரச்சாரப் பதாகை வைத்திடும் எண்ணத்தை இவருக்குள் ஏற்படுத்தியது. சும்மா கிடந்த சங்கை ஊதிக் கெடுத்த கதையாக ஆகிவிட்டது. லண்டன் மாநகரில் பயணிக்கும் பேருந்துகளில் 30 பேருந்துகளில் மட்டும் விளம்பரம் செய்து நான்கு வாரங்கள் மட்டும் விளம்பரம் செய்வதற்கு 5,500 பவுண்ட் பணம் தேவைப்படும் என மதிப்பிட்டார். இத்தொகையை வசூலிப்பதற்கு பிரிட்டிஷ் மனித நேயச் சங்கம் (BRITISH HUMANIST ASSOCIATION) உதவியது. இந்த அளவுக்குத் தொகையை வசூலித்துவிட்டால், அதே அளவு தொகையைத் தனிப்பட்ட முறையில் தாம் நன்கொடையாகத் தருவதாக ரிச்சர்டு டாகின்ஸ் அறிவித்து ஊக்கப்படுத்தினார்.

அமோகமாக ஆதரவு

நன்கொடை வசூல் தொடங்கிய சில நாள்களிலேயே (21-_10_2008) 11,000 பவுண்ட்கள் வசூலாகிவிட்டது. அதன்பிறகு மூன்றே நாள்களில் அதாவது 24_10-_2008இல் வசூலான தொகை ஒரு லட்சம் பவுண்ட்கள் ஆகும். வசூலுக்கான இறுதிநாளான 11-04-2009 முடிவில் வசூலாகியிருந்த தொகை 1,53,516 பவுண்ட்கள் என்றால் பிரிட்டன் மக்கள் இதன் அவசியத்தை எந்த அளவுக்கு உணர்ந்தார்கள் என்பதைப் புரிந்து கொள்ளலாம்.

800 பேருந்துகளில் கடவுள் மறுப்பு

30 பேருந்து போதும் எனத் திட்டமிடப்பட்ட தனது, 6-1-2009 இல் தொடக்க நாளன்று லண்டன் மாநகரத்தில் மட்டுமல்லாது பிரிட்டன் முழுவதுமாக 800 பேருந்துகளில் எனச் செயல்படுத்தப்பட்டது. அத்தோடு, புகழ்பெற்ற நாத்திகர்களின் கருத்துகளை பதாகைகளில் எழுதி பாதாள ரயில் நிலையங்களில் வைத்தனர். லண்டன் நகரின் ஆக்ஸ்போர்டு தெருவிலும் மத்திய லண்டனிலும் மிகப் பிரம்மாண்டமான LCD திரைகள் அமைத்து இவ்வாசகங்களை ஒளிபரப்பிக் கொண்டே இருந்தனர்.

பெரும்பாலும், கடவுள் இல்லை. எனவே கவலையை விடு; வாழ்க்கையை அனுபவி (THERE’S PROBABLY NO GOD. NOW STOP WORRYING AND ENJOY YOUR LIFE) என்பவைதான் வாசகங்கள். வாசகங்கள் படித்தவர்களின் மனதில் பெரும்மாற்றத்தை ஏற்படுத்தியது என்றாலும் 326 பேர்கள் வாசகங்களைப் பற்றிப் புகார்கள் கூறியிருந்தனர். விதிமுறைகளுக்கு முரணானது எனும் கருத்துப்பட கிறித்துவர் குரல் (CHRISTIAN VOICE) எனும் அமைப்பின் புகார் இருந்தது. ஆனால், விதிமீறல் எதுவும் இல்லை என்று தொடர்புடைய துறை அறிவித்துவிட்டது.

பிஷப் எதிர்ப்பு

வழக்கமாக எதிர்பார்த்ததைப் போலவே. கான்டர்பரி ஆர்ச் பிஷப் ஆக இருந்த ஜியார்ஜ் காரி என்பவரும் பீட்டர் பிரைஸ் எனும் BISHOP OF BATH AND WELLS பிரிவின் பிஷப்பும் எதிர்ப்புத் தெரிவித்தனர். வாசகங்கள் எழுதப்பட்ட பேருந்தை ஓட்டவேண்டிய ஓட்டுநர் ஒருவர் மறுத்துவிட்ட நிகழ்ச்சியும் நடந்தது. வேறு ஓட்டுநர் பேருந்தை ஓட்டிச் சென்றாரே தவிர, வாசகம் அகற்றப்படவில்லை. நிச்சயமாக கடவுள் இல்லை என்றே போட்டிருக்கலாம் என்று நாத்திகர்கள் கூறினர். என்றாலும், பெரும்பாலும்  எனும் சொல் சேர்க்கப்பட்ட காரணத்தால் விளம்பர விதிமுறைகள் எதுவும் மீறப்படவில்லை என்பதால் நாடு முழுவதும் அது அனுமதிக்கப்பட்டது என்பதைப் புரிந்துகொள்ள வேண்டும்.

மறுப்புக்கு எதிர்ப்பு மடத்தனம்

மதவெறியர்கள் சும்மா இருப்பார்களா? எதிர் விளம்பரம் போட்டார்கள். நிச்சயமாகக் கடவுள் உண்டு. கிறித்துவக் கட்சியில் சேருவீர்! வாழ்க்கையை அனுபவிப்பீர் என்று ஒரு விளம்பரம். பைபிளில் வரும் முட்டாள்கள் தம் மனதுக்குள் கடவுள் இல்லை என்று சொல்லிக் கொள்வர் என்பது மற்றொரு விளம்பரம். கடவுள் உண்டு, நம்புங்கள். கவலைப்படாமல் வாழ்க்கையை அனுபவியுங்கள் என்பது இன்னொரு விளம்பரம். தந்தை பெரியார் 1967 இல் கடவுள் மறுப்பு வாசகங்களைத் தந்து அதனைப் பொதுஇடத்தில் கல்வெட்டாகப் பதிவு செய்த சம்பவம் திருச்சி தேவர்ஹால் அருகில் நடந்தது.

எதிர்வினை என்ற பெயரில் பக்தர்கள் இல்லை என்பதற்குப் பதில் உண்டு என்று எழுதினார்கள். கடவுளைக் கற்பித்தவன் முட்டாள் என்ற பெரியாரின் வாசகத்திற்குப் பதில், கடவுளைக் கற்பித்தவன்அறிவாளி என்று எழுதி வைத்தனர். அந்த இடத்தில் கூட்டம் போட்டுப் பேசிய தந்தை பெரியார் கூறினார், கடவுள் தானாகத் தோன்றியதல்ல, முட்டாள் மனிதனால் கற்பிக்கப்பட்டது என்று நான் கூறினால், இல்லை, இல்லை அறிவாளி மனிதனால் கற்பிக்கப்பட்டது எனக் கூறிகிறீர்களே! அட முட்டாள்களே, கடவுள் கற்பிக்கப்பட்ட கற்பனையான ஒன்று என்பதை நீங்களே ஒத்துக் கொண்டுவிட்டீர்களே! எனக் கூறினார். அதேபோலத்தான் 40 ஆண்டுகளுக்குப் பிறகும் பக்தர்கள் பாமரத்தனமாகவே இருக்கின்றார்கள்.

- தொடரும்...