பயணம் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
பயணம் லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

சனி, 8 ஆகஸ்ட், 2026

உலக நாத்திகர் மாநாடும் விஜயவாடா பயணமும் -செ.ர.பார்த்தசாரதி, திராவிடர் கழக தென் சென்னை இளைஞர் அணி பொருளாளர்

  உலக நாத்திகர் மாநாடும் விஜயவாடா பயணமும்


குண்டூரைச் சேர்ந்த வேஜன்லா சத்திய நாராயணா, ஷேக் அலிக் ஆகியோர் பொதுச்செயலாளரிடம் கடிதம் கொடுத்தபோது...


4 -வது உலக நாத்திகர் மாநாடு விஜயவாடாவில் (ஆந்திர மாநிலம்) 'பென்ஸ் 'சர்க்கிள்' என்ற இடத்தில் உள்ள 'நாத்திக மய்யத்தில்' 1996 ஜனவரி 4,5,6 ஆகிய தேதிகளில் சிறப்பாக நடைபெற்றது. 'கோரா' நாத்திக மய்யமும், திராவிடர் கழகமும் இணைந்து இம்மாநாட்டை நடத்தியது.


இம்மாநாட்டிற்கு தமிழ் நாட்டிலிருந்து 100 நாத்திக பேராளர்களுக்கு விஜயவாடா நாத்திக மய்யத்தின் அமைப்பாளர் டாக்டர் இலவணம் அழைப்பு விடுத்திருந்தார். தமிழ்நாட்டில் இருந்து 120 பேராளர்கள் வந்து கலந்துகொண்டனர். இம்மாநாட்டிற்கு வருகை தந்தோரில் பெரும்பான்மையினர் தமிழ்நாட்டைச் சேர்ந்தவர்களே என்பது குறிப்பிடத்தக்கது.


3.1.96 பிற்பகல் 3.10 மணிக்கு 'பினாகினி' விரைவு தொடர்வண்டி 108 தமிழ்நாடு நாத்திக பேராளர்களை சுமந் துகொண்டு விஜயவாடா நோக்கி புறப் பட்டுச் சென்றது. அதில் நானும் ஒருவராகச் சென்றேன். வண்டி இரவு 10 மணிக்கு விஜயவாடாவை சென்று அடைந்தது. எங்களை விஜயவாடா நாத்திக மய்யத்தில் 'கோரா' அவர்களின் துணைவி சரசுவதி கோரா மற்றும் அவரது மகன் இலவணம் அவர்களின் உடன்பிறப்பு டாக்டர் ஜி. விஜயம் அவர்கள் வரவேற்றார்.


மூன்று நாட்களுக்கும் தங்கும் வசதி மற்றும் உணவு ஏற்பாடுகளையும் சிறப்பாக செய்து கொடுத்தனர்.


பன்னாட்டு நாத்திகர்களும் பங்கேற்க 4.1.96 மாலை 4 மணிக்கு டாக்டர் விஜயம் அவர்களின் வாழ்த்துரையுடனும், தமிழர் தலைவர் கி. வீரமணி அவர்களின் சிறப்பானதொரு வரவேற்புரை யுடனும் மாநாடு துவங்கியது.


தமிழர் தலைவர் கி. வீரமணி அவர்கள் மாநாட்டுப் பேராளர்களுக்கு 10 சிந்தனைகளை எடுத்து வைத்து பேசினார். அனைவரின் கவனத்தையும் இந்த சிந்தனையும், பேச்சும் கவர்ந்தது.


மாநாட்டு மேடையில் 'நம்பிக்கையான எதிர்காலத்திற்கு பயனுள்ள நாத்திகம்' என்ற சொற்றொடர் எழுதப்பட்டிருந்தது.  தந்தை பெரியார் தொண்டர்களையும், பெரியார் இயக்கத்தையும், பெரியாரின் தொண்டையும் ஒவ்வொருவரிடமும் பன்னாட்டு நாத்திகர்கள் சிறப்பாக பாராட்டினர்.


லண்டனைச் சேர்ந்த பிரிட்டிஷ் ஹூ மணிஸ்டு அமைப்பின் துணைத் தலைவர் டாக்டர் 'ஹாரி ஸ்டேப்ஸ் ரோப்' என்பவர், எங்களை எந்த நாட்டுக்காரர்கள் என்று கேட்டார்; நான் தமிழ்நாட்டை சேர்ந்த பெரியாரிஸ்டுகள் என்றேன். உடனே அகமகிழ்ந்து என்னை கட்டித்தழுவி; தந்தை பெரியாரை 'மாமனிதர், அவர் பணி அரும்பணி' என்று மனந்திறந்து பாராட்டினார். அதனுடன் 'நான் 13 ஆண்டுகளுக்கு முன் தமிழ்நாட்டிற்கு வந்தேன். அப்போது தங்கள் இயக்கத்தின் நிகழ்ச்சி ஒன்றை பார்த்தேன், வியந்தேன்' என்று கூறினார். சென்னையில் நடை பெறவிருக்கும் மாநாட்டுக்கு வருமாறு கூறிய போது; கட்டாயம் வருவேன் என்று கூறினார். அதே போல் சென்னை பகுத்தறிவாளர் கழக மாநில

மாநாட்டிற்கு வருகை தந்தார். 


4-வது உலக நாத்திகர் மாநாட்டிற்கு அழைப்பு விடுத்து ஆயிரம் (1000) துண்டறிக்கைகளை தாம்பரம் மாவட் டம் மற்றும் தென் சென்னை மாவட்டம் சார்பில் விஜயவாடாவிலேயே தெலுங்கில் அச்சிட்டு பொதுமக்களுக்கு வழங் கினோம்.

தி.இரா. இரத்தினசாமி (தாம்பரம் மாவட்டத் தலைவர்) அவர்கள் விஜயவாடாவில் துண்டறிக்கையை வழங்கியபோது...


அந்த துண்டறிக்கையில் ‘தந்தை பெரியாரின் கடவுள் மறுப்பு, ஆத்மா மறுப்பு தத்துவம் மற்றும் 'சர்வ சக்தி சாமிக்கு தெலுங்கு - தமிழ் தெரியாதா?' என்ற முழக்கமும் அச்சிட்டோம். துண்டறிக்கையில் பின் பக்கத்தில் ஆங்கிலத்தில் கடவுள் மறுப்பு தத்துவத்தை அச்சிட் டோம். இத்துண்டறிக்கைகளை பெற் றுக் கொண்டபின் பொதுமக்கள் பரபரப்பாக காணப்பட்டனர். மாநாட்டைப் பற்றி தெரியாமல் இருந்த பொதுமக்கள். 'மாநாட்டின் காரணத்தைப் பற்றி தெரிந்து கொண்டனர். பலர் துண்டறிக்கைகளை வாங்கிப் படித்துவிட்டு, கேள்விகளைக் கேட்டனர். எங்களுக்குத் தெரிந்த தெலுங்கு சொற்களை வைத்து தமிழ் -தெலுங்கு ஆங்கிலம் என்று கலந்து கலந்து பதில்களை கூறி தெளிவுபடுத்தினோம்.


தாம்பரம் மாவட்ட அமைப்பாளர் வீரபத்திரன் அவர்களுக்கு தெலுங்கு எழுத படிக்க தெரியுமாதலால் பலருக்கு அவர் தெலுங்கில் விளக்கம் கொடுத்தார். 


இத்துண்டறிக்கையை அச்சிட அச்சுக் கூடங்களை அணுகியபோது, அச்சிட மறுத்தனர். நாத்திக மய்யத்திலே அச்சுக் கூடம் இருப்பதை அறிந்து அங்கேயே அச்சிட்டோம்.


இதைக் கேள்விப்பட்ட 'இலவணம்' அவர்கள் 'நாத்திக கருத்தை பரப்ப பணம் வாங்குவதா?' என்று கூறி, எங்களிடமிருந்து அச்சிட வாங்கிய பணத்தை திருப்பி கொடுத்து விடுமாறு கூறி விட்டார்.


நாத்திக மய்யத்தில் மருத்துவமனை, அச்சுக்கூடம், சமூக நலக் கூடம், நூலகம், புகைப்பட அரங்கு மற்றும் அறிவியல் மய்யம் முதலியவைகள் உள்ளன. இதே போன்று சிறிய அளவில் நமது பெரியார் திடலிலும் ஓர் அறிவியல் மய்யம் அமைத்தால் நன்றாயிருக்கும்.


மாநாட்டிற்கு பேராளர்கள் மட்டுமே வந்தார்களே தவிர, பொதுமக்கள் வர வில்லை. போதிய அளவு பிரச்சாரமும், விளம்பரமும் இல்லாததுதான் இதற்குக் காரணம்.


குழுக் கலந்துரையாடல் கூட்டத்தில் அ. அருள்மொழி அவர்கள் பேசியதை அனைவரும் பாராட்டினர்.


குண்டூரை (ஆந்திரா) சேர்ந்த வேஜன்லா சத்திய நாராயணா என்பவரும், ஷேக் அலிக் என்பவரும் அருள்மொழியின் பேச்சைக் கேட்டுவிட்டு இந்த மாதிரி ஒரு பேச்சை இதுவரையில் கேட்டதில்லை. தெலுங்கில் பேசி இருந்தால் இன்னும் நன்றாக புரிந்து கொண்டிருப்போம் என்று எங்களிடம் கூறினார்கள்.


அருள்மொழி அவர்களிடம் அவர்களை அறிமுகப்படுத்தினோம் அருள் மொழிக்கும் தெலுங்கு தெரியும் என்று கூறியவுடன் குண்டூருக்கு வந்து பிரச்சாரம்



டாக்டர் ஹாரிஸ்டேப்ஸ்-ரோப்

(இலண்டன்) உடன் செ.ர. பார்த்தசாரதி


செய்யும்படியும், அதற்கு ஏற்பாடு செய்து தருவதாகவும் கூறினார்கள்.


இருவரும் கழக பொதுச் செயலாளரிடம் ஆந்திராவில் திராவிடர் கழகம் பிரச்சாரம் செய்யும்படி கடிதம் கொடுத்தனர். அக்கடிதத்தில், 'இங்கே பிரச்சாரமே செய்யப்படுவதில்லை. வெளியே சென்று பிரச்சாரம் செய்ய வேண்டாம்' என்று கூறுகின்றனர். அறைக்குள்ளேயே கூட்டத்தை நடத்திவிடுகின்றனர். தாங்கள் இங்கே வந்து பிரச்சாரம் செய்ய வேண்டும். தந்தை பெரியாரின் பணியை பாராட்டுகிறோம். அவரின் பணி பெரும்பணி' என்று எழுதிக் கொடுத்தனர். அவர்களை சென்னை மாநாட்டிற்கு வருமாறு அழைத்தோம். அவர்களுள் ஷேக் அலிக் என்பவர் முன்கூட்டியே சென்னை மாநாட்டிற்கு வந்து பேரணியிலும் கலந்து கொண்டார். நமது பணிகளை நேரில் கண்டு வியந்து மாநாட்டு முடிவில் கழக பொதுச் செயலாளரிடம் 1000 ரூபாயை நன்கொடையாக வழங்கினார்.


தந்தை பெரியாரின் பணியும், மற்ற நாத்திகர்களின் பணியும் ஒன்றாக ஒப்பிட முடியாதது. தந்தை பெரியார் செய்த அரும் பணியால் தான் தமிழ்நாட்டில் நாத்திகம் வெற்றிகரமாக, மக்கள் இயக்கமாக நடைபெறுகிறது. இதே போல் மற்ற இடங்களில் நடைபெறாத தற்குக் காரணம் தந்தை பெரியாரின் வேலை திட்டங்கள் போல் இல்லாதது தான் காரணம்.


-செ.ர.பார்த்தசாரதி

திராவிடர் கழக தென் சென்னை இளைஞர் அணி பொருளாளர்


  • - விடுதலை நாளேடு, 19.01.1996

 

_______________________________________________________________________________

உலக நாத்திகர் மாநாடு (விஜயவாடா)

ஜனவரி 4,5,6 1996

4 -வது உலக நாத்திகர் மாநாடு விஜயவாடாவில் (ஆந்திர மாநிலம்) 'பென்ஸ் 'சர்க்கிள்' என்ற இடத்தில் உள்ள 'நாத்திக மய்யத்தில்' 1996 ஜனவரி 4,5,6 ஆகிய தேதிகளில் சிறப்பாக நடைபெற்றது. 'கோரா' நாத்திக மய்யமும், திராவிடர் கழகமும் இணைந்து இம்மாநாட்டை நடத்தியது.


இம்மாநாட்டிற்கு தமிழ் நாட்டிலிருந்து 100 நாத்திக பேராளர்களுக்கு விஜயவாடா நாத்திக மய்யத்தின் அமைப்பாளர் டாக்டர் இலவணம் அழைப்பு விடுத்திருந்தார். தமிழ்நாட்டில் இருந்து 120 பேராளர்கள் வந்து கலந்துகொண்டனர். இம்மாநாட்டிற்கு வருகை தந்தோரில் பெரும்பான்மையினர் தமிழ்நாட்டைச் சேர்ந்தவர்களே என்பது குறிப்பிடத்தக்கது.


பன்னாட்டு நாத்திகர்களும் பங்கேற்க 4.1.96 மாலை 4 மணிக்கு டாக்டர் விஜயம் அவர்களின் வாழ்த்துரையுடனும், தமிழர் தலைவர் கி. வீரமணி அவர்களின் சிறப்பானதொரு வரவேற்புரை யுடனும் மாநாடு துவங்கியது.


மாநாட்டு மேடையில் 'நம்பிக்கையான எதிர்காலத்திற்கு பயனுள்ள நாத்திகம்' என்ற சொற்றொடர் எழுதப்பட்டிருந்தது. 

மாநாட்டில் கலந்து கொண்ட திராவிடர் கழக தென் சென்னை, தாம்பரம் மாவட்ட தோழர்கள்








செவ்வாய், 16 டிசம்பர், 2025

கண்டோம் பெரியார் திடலை! கலங்கிய கண்களுடன் அய்யாவின் நினைவிடத்தில் மரியாதை செலுத்தினோம்! -பஞ்சாபிலிருந்து...

 


பஞ்சாபிலிருந்து பெரியார் திடல் வந்த தோழர்களின் உருக்கமான மடல்:

இந்திய ஆயுள் காப்பீட்டுக் கழகத்தின்  மண்டலத் தலைவர்கள் மாநாடு (Chairman Club Convention) ஆண்டுதோறும் நடத்தப்படும் நிகழ்வாகும். கரோனா தாக்கத்தால் பல ஆண்டுகளாக நிறுத்தி வைக்கப்பட்டிருந்த இந்த மாநாடு, இம்முறை வட இந்திய முகவர்களுக்காகத் தமிழ்நாட்டின் தலைநகரான சென்னை வடபழனியில் நடைபெற்றது.

எங்கள் கிளையில் இருந்து நானும், அரவிந்தர் சிங் மற்றும் தலீர் சந்த் ஆகியோரும், ஜலந்தர் கிளையில் இருந்து குல்வீர் சிங் என்பவரும் இணைந்து இந்தப் பயணத்தைத் திட்டமிட்டோம்.

மாநாடு நவம்பர் 24 அன்று இருந்தாலும், எங்கள் வேண்டுகோளின்படி எல்.அய்.சி நிறுவனம் நவம்பர் 22-ஆம் தேதிக்கே பயணச் சீட்டுகளை உறுதி செய்தது. காரணம் எங்களுக்கு வாழ்நாள் ஏக்கமான பெ்ரியார் வாழ்ந்த மண்ணைப் பார்க்கவேண்டும் என்பதே!

சென்னையை நோக்கிப் பயணம்

நவம்பர் 22 அன்று காலை 7:20 மணிக்குச் சண்டிகரில் விமானம் ஏறிய நாங்கள், சரியாக 10:30 மணிக்குச் சென்னை விமான நிலையத்தை அடைந்தோம். விமான நிலையத்தில் எங்களுக்கான விடுதிக்குச் சென்றோம்.

அங்கு சிலரிடம் பெரியார் வாழ்ந்த இடங்கள் குறித்து கேட்டோம் சிலர் திருச்சி என்றார்கள். சிலர் ஈரோடு என்றார்கள். அது எல்லாம் சென்னையில் இருந்து பல கிலோமீட்டர் தூரம் அங்கு செல்ல முடியாத நிலையில் பீகாரைச் சேர்ந்த எங்கள் விடுதித் தோழர் பெரியார் திடல் குறித்துக் கூறினார்.

பெரியார் இல்லத்தை நோக்கி…

மிகவும் மகிழ்ச்சி அடைந்த நாங்கள், நவம்பர் 23 எங்கள் பயணத்தின் நோக்கமான மாநாட்டுக்கு அப்பால், தமிழ்நாட்டின் தந்தை என்று போற்றப்படும் பெரியார் ஈ.வெ.ராமசாமி அவர்களின் இல்லம் மற்றும் நினைவுச் சின்னத்தைப் பார்க்கத் தீர்மானித்தோம்.

நவம்பர் 24-ஆம் தேதி காலையில் மாநாடு சிறப்பாக நடைபெற்றது. மதியம் சுமார் 2 மணியளவில் மாநாடு முடிந்ததும், உடனடியாக ஒரு வாடகை வண்டியைப் பிடித்து, பெரியார் அவர்களின் இல்லத்தை நோக்கிப் புறப்பட்டோம். மாநாட்டு முடிவால் ஏற்பட்ட அதிகப் போக்குவரத்து நெரிசலின் காரணமாக, நாங்கள் குறிப்பிட்ட இடத்தைச் சுமார் 5:30 மணிக்குத்தான் அடைந்தோம்.

நினைவிடத்தைப் பார்வையிடல்

பெரியார் இல்லத்தை அடைந்ததும், முழு உருவச் சிலை வடிவத்தில் இருந்த பெரியார் எங்களை வரவேற்றார். அந்தச் சிலையைப் பார்த்தபோது, எனது சிந்தனை 1879-ஆம் ஆண்டிற்குச் சென்றது. மூடநம்பிக்கைகள் மற்றும் சமூக இருள் சூழ்ந்திருந்த காலகட்டத்தில், ”புரட்சிகரமான மற்றும் அறிவியல் சிந்தனை, சமத்துவம்” குறித்து அவர் பேசிய தொலைநோக்குப் பார்வையை எண்ணி நான் வியந்துபோனேன்.

தந்தை பெரியார் அவர்களின் சிலைக்கு வணக்கம் செலுத்திய பிறகு, வளாகத்தில் உள்ள தந்தை பெரியார், அன்னை மணியம்மையார் நினைவிடங்களுக்கு மலர் வைத்து மரியாதை செலுத்திக் கவுரவித்தோம். அதற்குப் பின்னால் உள்ள இயக்கப் பணிகளுக்கான உயிர்த்தியாகம் செய்தவர்களின் நினைவிடத்திலும் நின்று அஞ்சலி செலுத்தினோம்.

எங்கள் உள்ளம் தந்தை பெரியார் காலத்திற்குச் சென்றது. எத்தகைய சமூகச் சூழலில் அவர் தனது வாழ்நாளை சாமானிய மக்களின் சுயமரியாதைக்காகவும் அனைத்துத் தரப்பு மக்களின் உரிமைகளை மீட்கவும் சுய மரியாதை இயக்கத்தை உருவாக்கி அதனை வழிநடத்தி, 100 ஆண்டுகள் கழித்து இன்று பெரும் அறிவுச் சமூகத்தை உருவாக அவர் பட்ட பாடுகளை அறிந்துகொண்டோம்.

அதன் பிறகு, அங்கே அமைந்திருக்கும் அருங்காட்சியகத்தைப் பார்வையிட்டோம். அங்கு வைத்திருந்த காட்சிப் பொருட் களைக் கண்டு கண்கலங்கி நின்றோம். தன்னுடைய உடல் நலம் சீர் கெட்டதைக் கூட துச்சமெனக் கருதி மூத்திரவாளியைச் சுமந்து கொண்டு தன்னுடைய இறுதி மூச்சு விடும் நாளில் கூட நீண்ட உரையாற்றினார்.

“இனி யாரொருவர் இவர் போல் பிறப்பார்கள்?” என்று என்னுடன் வந்தவர்களோடு நானும் கண்ணீர் வழிய நின்றோம். அருங்காட்சியகத்தை விட்டு வெளியே வந்தபோது கனத்த இதயத்தோடு வெளியே வந்தோம்.

எங்களுக்கு எங்கள் தாய்மொழியான பஞ்சாபியிலேயே சரவணா ராஜேந்திரன் அவர்கள், தந்தை பெரியார் அவர்களைப் பற்றி எங்களுக்கு விளக்கிக் கூறிய விதம், அவர் பெரியார் அவர்களை எங்களுடன் அழைத்து வந்தது போலிருந்தது. அவரிடம் “அய்யா, உங்களைக் காண ஆயிரக்கணக்கான மைல்களுக்கு அப்பால் இருந்து சில தொண்டர்கள் வந்துள்ளனர்” என்று நாங்கள் சொல்வது போன்ற ஒரு உணர்வை அளித்தது.

இத்தகைய புரட்சிகரமான சிந்தனைகளை அடுத்த தலைமுறைக்குக் கொண்டு செல்லும் இயக்கத் தோழர்களுக்கு எனது சிரம் தாழ்ந்த வணக்கங்கள்!

எங்கள் பயணத்தின் முதன்மை நோக்கம் மாநாட்டில் கலந்துகொள்வதாக இருந்தாலும், அங்கு சென்று தந்தை பெரியாருக்கு அவர்கள் வணக்கம் செலுத்திய அந்த அனுபவம், எங்கள் நினைவில் என்றென்றும் நீங்காமல் நிலைத்திருக்கும்.

– மோகன்லால் பிக்கா சிங்,

சஹித் பகத்சிங் நகர்,

பஞ்சாப்  972039444

(குறிப்பு: ‘மார்டன் ரேசனலிஸ்ட்’ ஓராண்டு சந்தா அளித்ததுடன் பஞ்சாப் சென்று மடலும் அனுப்பினார்கள். அதன் தமிழாக்கம்தான் இது.)

 - விடுதலை ஞாயிறு மலர்,6.12.25