புதன், 3 மே, 2017

புரட்சிக் கவிஞரின் பகுத்தறிவு முழக்கம்!




அறிவியல் பூர்வமாக நிரூபிக்கப்படாத எதுவும், தனிநபருக்கோ, சமுதாயத்துக்கோ முட்டுக்கட்டையாக இருந்து முன்னேற்றத்தை - வளர்ச்சியைத் தடுக்கும் எதுவும், கேள்விக்கு உட்படுத்தாமல் கண்ணை மூடிக்கொண்டு அப்படியே ஏற்றுக்கொள்கிற எதுவும், பரிசீ லித்துப் பார்க்காமல், அலசி ஆராயாமல் அப் படியே ஒப்புக்கொள்ளும் எதுவும் மூடநம்பிக் கைகளே! மடமைச்செயல்களே! மட்டித்தனங் களே!

மனித சமுதாயம் மேதமையோடு வாழத் தானே பகுத்தறிவு! எதையும் ஏன்? எதற்காக? எப்படி? என்று கேள்விகேட்டு தெளிந்த பார்வையோடு ஒன்றை ஏற்றுக்கொள்வதுதானே அறிவுடைமை! அன்று தொட்டு இன்று வரை ஏன் மக்கள் மூடவியாபாரிகளிடம் சரணடை கிறார்கள்? முடைநாற்றம் வீசும் மடமைக் கருத் துக்கள் பால் தலைசாய்க்கிறார்கள்? மூடநம்பிக் கைகளை உற்பத்தி செய்யும் தொழிற்சாலையாக ‘கடவுள்’ என்னும் கருத்து இருப்பதால்தான். கடவுள் என்ற ஆணிவேரை வெட்டி அகற்றிப் போடாமல் மூடநம்பிக்கை ஒழிப்பு என்பது சாத்தியமாகாது. அதனால்தான் தத்துவப் பேராசான் ‘கடவுள் இல்லை’ ‘இல்லவே இல்லை’ என்றது.... மூடநம்பிக்கை கிளைகளை எத்தனை முறை வெட்டிவெட்டிப் போட்டாலும் மீண்டும் அவை துளிர்க்கவே செய்யும். மூடநம்பிக்கை களின் அடிப்படையான கடவுளை எதிர்த்து கடைசி காலம் வரை தந்தை பெரியார் சமர் செய்தது அதனால்தான்!

மூடநம்பிக்கை எனும் தொற்று நோயை பரவவிடாமல் அழித்தொழிக்க வேண்டும். மடமை இருளிலிருந்து மக்களை வெளிச்சத்துக்கு மடைமாற்றம் செய்தாக வேண்டும். மீண்டும் மதக்கருத்துகள் ஏற்படுத்தும் மூடப்புதைகுழியில் அப்பாவி மக்கள் புதைந்து போகாமல் பகுத்தறிவுப் பாதையில் பயணிக்கச் செய்ய வேண்டும். மானுடத்தின் மேன்மையை விரும்பும் மனிதர்கள் யாராக இருந்தாலும் அறிவுலக ஆசான் அய்யா பெரியாரின் அடியொற்றி நடைபயில வேண்டும். பாட்டாலே மடமைக்கு வேட்டு வைத்தப் பாவலனாம் புரட்சிக்கவிஞர் பாரதிதாசனின் கருத்துகளை பின் தொடர்ந்தால் பகுத்தறிவு ஓங்கும் - மனிதநேயம் தழைக்கும்.

சிந்திக்கும் தன்மையின் கூர்மையே பகுத்தறிவு. எதனையும் ஆராய்ந்து பார்த்து அறிவின் வழி விடை காண்பதே பகுத்தறிவு. பழமைக்கு விடை கொடுத்து புதுமைக்கு வழிகோலுவதே பகுத்தறிவு. பகுத்தறிவின் முன் மூடநம்பிக்கைகள் முனை மழுங்கி முறிபடும். மனிதகுல ஏற்றத்துக்கும் எழுச்சிக்கும் வித்திடுவது பகுத்தறிவு. பகுத்தறிவு பரவப்பரவ மூடநம்பிக் கைகள் அற்று வீழும் என்பதை புரட்சிக்கவிஞர் தமது பாடல்களில் பல்வேறு இடங்களில் சுட்டுகின்றார். ஒவ்வொரு மாந்தனும் அறிவுவழி நின்று அறிவு வினா தொடுக்கும் நாளை மடமை கிழிக்கும் நாளாக, அறிவை ஊட்டும் நாளாக, மானம் உணரும் நாளாக புரட்சிக்கவிஞர் குறிப்பிடுகின்றார். பகுத்தறிவுச்செயல் பரவுதல் வேண்டும் என்கிறார், மூடச்செயல்கள் முறிபடல் வேண்டும் என்கிறார்.

“பச்சை விளக்காகும் - உன்
பகுத்தறிவு தம்பி
பச்சை விளக்காலே - நல்ல
பாதை பிடி தம்பி” என்று பகுத்தறிவு எனும் பச்சை விளக்கை இளைய தலைமுறை ஏந்திட வேண்டும் என்கிறார்.
நாணு மூடவழக்கம் நாடுதல் பெரிதா?
நல்லறிவென்னும் வழிச்செல்லுதல் பெரிதா?
பாழ்படும் பழமை சூழ்வது திறமா?

பகுத்தறிவால் நலம் வகுப்பது திறமா? என கேள்வி மேல்  கேள்வி தொடுக்கும் புரட்சிக் கவிஞர் பகுத்தறிவுப் பான்மையைப் போற்று கின்றார். மேலும் கவிஞரின் பாடல் பேசும் பகுத்தறிவின் சிறப்பினைப் பார்க்கலாமா?

“இருட்டறையில் உள்ளதடா உலகம்! சாதி

இருக்கின்ற தென்பானும் இருக்கின்றானே!

மருட்டுகின்ற மதத்தலைவர் வாழ்கின்றாரே!

வாயடியும் கையடியும் மறைவதெந்நாள்?

சுருட்டுகின்றார் தம்கையில் கிடைத்தவற்றைச்

சொத்தெல்லாம் தமக்கென்று சொல்வார் தம்மை

வெருட்டுவது பகுத்தறிவே”

என்றும் பறைசாற்றுகின்றார்.

வீடின்றி மக்கள் தவிக்கின்றனர்; ஆடையின்றி அலைகின்றனர் பலர்; கல்வியைப் பெற முடியாமல் கலங்குகின்றனர் பலர்; தொழிலும், வாணிபமும் கெட்டு வதைகின்றனர் பலர்; நோய் நொடியால் நொடிகின்றனர் சிலர்; பசியால் பரிதவிக்கின்றனர் பலர். இப்படிப்பட்ட இல்லா மையை, கல்லாமையை, போதாமையை தடுத்து எல்லோர்க்கும் எல்லாமும் கிடைக்கச் செய்திட பக்தர்கள் ஏற்றியும் போற்றியும் தொழுதிடும் கோயிலும், கடவுளும், ஆத்திக வைதீகமும், மந்திரங்களும், குருமார்களும், அவர்தம் உச்சாடனங்களும் என்ன செய்து கிழித்தன என கேட்டு “கடவுள் என்பது இல்லாத ஒன்று” என்பதை நிலைநாட்டுகிறார் புரட்சிக் கவிஞர். தந்தை பெரியார் எழுப்பிய அறிவுக்கணை களையே பகுத்தறிவுப் பாவலரான பாரதிதாசன் தமது பாட்டால் இப்படி விளாசுகிறார்? பதில் சொல்ல அன்று தொட்டு இன்றுவரை பக்த பிரசங்கிகளால் இயலவில்லை என்பதே உண்மை.

“உங்கள் ஆஸ்திகம் உங்கள் வைதீகம்
உங்கள் கடவுள் உங்கள் கோயில்
உங்கள் குருக்கள் உங்கள் அய்யர்
உங்கள் மந்திரம் உங்கள் வேதாந்தம்
உங்கள் யோகம் உங்கள் யாகம்
உங்கள் விரதம் உங்கள் பூசனை
உங்கள் சடங்குகள் உங்கள் மடங்கள்
இவைகள் இதுவரை என்ன செய்தன?
ஆயிரம் ஆண்டாய் அசைத்த தென்ன?
இலட்சம் ஆண்டாய் ஈந்த தென்ன?
ஓர்யுகமாக உருட்டிய தென்ன?
சதுர்யுகமாகச் சாய்த்ததென்ன?
பசியால் மக்கள் பறக்கின்றாரே
நோயால் மக்கள் நொடிகின்றாரே
தொழிலின்றி மக்கள் சோர்கின்றாரே
வாணிபம் கெட்டு வதைகின்றாரே
கல்வியின்றிக் கலங்குகின்றாரே
ஆடையின்றி அலைகின்றாரே
வீடின்றி மக்கள் வெளிக்கின்றாரே”
“கல்வியில்லாத பெண்கள்
களர்நிலம்! அந்நிலத்தில்
புல்விளைந் திடலாம்; நல்ல
புதல்வர்கள் விளைதல் இல்லை!
கல்வியை உடைய பெண்கள்
திருந்திய கழனி, அங்கே
நல்லறி வுடைய மக்கள்
விளைவது நவிலவோ நான்?
பெண்கட்கு கல்வி வேண்டும்
குடித்தனம் பேணுதற்கே!
பெண்கட்குக் கல்வி வேண்டும்
மக்களைப் பேணுதற்கே!
பெண்கட்குக் கல்வி வேண்டும்
உலகினைப் பேணுதற்கே!
பெண்கட்குக் கல்வி வேண்டும்
கல்வியை பேணுதற்கே!”

(குடும்ப விளக்கு - பாரதிதாசன்)

மானுடம் மேன்மையுற வேண்டுமெனில் பெண்கள் படித்தவர்களாக, விழிப்புணர்ச்சி உள்ளவர்களாக அமைதல் வேண்டும். பெண் ணடிமை ஒழிந்து பெண்ணுரிமை உள்ள சமுதாயமாக ஆக வேண்டும் என்று தான் தந்தை பெரியார் அரும்பாடுபட்டார். மகளிர் உரிமை எனும் தடத்தில் பெரியாரின் பங்களிப்பு மிக உயர்ந்தது. பெரியாரின் வழித்தடத்தில் பாடல்கள் புனைந்த பாவேந்தர் பெண்கல்வியை கொண் டாடினார். பெண்ணடிமை தீருமட்டும் நாட்டின் மண்ணடிமை தீருவது முயற்கொம்பே என்றார். நல்ல விழிப்புணர்ச்சி மிக்க தாயின் வயிற்றில்தான் நல்லறிவுடைய மக்கள் தோன்றுவர் என புரட்சிக் கவிஞர் சொல்லுவதில் மாற்றுக்கருத்து இருக்க முடியாது. கல்வியைப் பேணவும், உலகினைப் பேணவும், மக்களைப் பேணவும், குடித்தனம் பேணவும் கல்வி பெண்களுக்கு அவசியம் என்றார் கவிஞர்.

சாணியை எரிபொருளாக பார்ப்பது - பயன் படுத்துவது நல்ல நம்பிக்கை. அதே சாணியை சாமியாக ஏற்றுக்கொள்வது மூடநம்பிக்கை. சாணியை, பசுமூத்திரத்தை தயிரோடும், பாலோடும், நெய்யோடும் கலந்து பஞ்சகவ்யமாக பவ்வியத்தோடு சாப்பிடுவதும் மூடநம்பிக்கையே!

அதனால்தான் புரட்சிக்கவிஞர் பாரதிதாசன் “சாணிக்குப் பொட்டிட்டு சாமியென்பார் செய் கைக்கு நாணி கண்ணுறங்கு நகைத்து நீ கண் ணுறங்கு” என்கிறார். பகுத்தறிவு என்பது ஆதாரத் தைக் கொண்டு தெளிவடைவது; மூடநம்பிக்கை என்பது ஆராயாமல் அப்படியே ஏற்றுக்கொள் வது. மடமைத்தான் அச்சத்தின் வேர் என்கிறார் புரட்சிக்கவிஞர். அச்சமும் மடமையும் இல்லாத பெண்களே அழகிய தமிழ்நாட்டின் கண்கள் என்று பகர்கிறார் புரட்சிக் கவிஞர்.

“உச்சி இருட்டினில் பேய் வந்ததாக
உளறினால் அச்சமா? பேய் என்பதுண்டா?
முச்சந்தி காத்தானும் உண்டா? இதை 
முணுமுணுப்பது நேரில் கண்டா?
கள்ளுண்ணும் ஆத்தாளும் ஏது? - மிகு
கடிசாராய முனி ஏது?
விள்ளும் வைசூரிதான் மாரியாத் தாளாம்
வேளை தோறும் படையல் வேண்டும் என்பாளாம்!”

மடமைக்கு விடை கொடுக்கும் புரட்சிப் பெண்களாக, புதுமைப் பெண்களாக மகளிர்குலம் மாறிட வேண்டும் என்கிறார்.
“உருவிலா ஒன்றுக்குருவமைத்தது

பெரியதோர் மடமை” - என்றும்,
“மடமையை நாட்டில் மலிவு செய்தால்
உடமையை லேசாய் உறிஞ்சலாம் என்பது
பூசாரி எண்ணம்” - என்றும்
“பேடி வழக்கங்கள், மூடத்தனம் - இந்தப்

பீடைகளே இங்கு சாத்திரங்கள்” என்றும் சொன்னதுடன் வாடப்பல புரிந்து வாழ்வை விழலாக்கிடும் மூடப்பழக்கம் எனும் மாடுகளை சீர்திருத்தி வண்டியிலே பூட்டிட இளைய தலை முறைக்கு அழைப்பு விடுக்கும் புரட்சிக்கவிஞர் பெரியார் எனும் உரை நடையின் கவிதை வடிவம்தானே!

“பார்ப்பனன் உயர்வு என்கிறீர்கள், சத்திரி யனை இரண்டாம் என்கிறீர்கள், வைசியர் அவன் அண்டைபடி என்கிறீர்கள், சூத்திரன் கடைசி என்கிறீர்கள். “பஞ்சமன்” என்கிறீர்கள் இன்றைக்கு மாத்திரம் இன்றி இவைகளை உண்டாக்கியதாய்ச் சொல்லும் பிரமன் ஒருவன் இருந்தால் அவன் காலத்திலேயே இவை சுத்தப்பொய் என்பதை சிந்திக்க மறுக்கிறீர்கள். இந்த நிலையில் சுதந்திரம், சமத்துவம், சகோதரத்துவம் இவைகள் உமது இதயத்தில் இடம் பெறுவது எப்படி? என வினா தொடுக்கும் புரட்சிக்கவிஞர் பிரம்மனின் முகத் தில், தோளில், தொடையில், காலில் முறையே பிராமணர், சத்திரியர், வைசியர் மற்றும் சூத்திரர் எனும் நால்வரும் உருவானதாகக் கூறும் ஆரிய கற்பனையையும் சாடுகிறார்”.

“முகத்தில் பிறப்பதும் உண்டோ முட்டாளே
தோளில் பிறப்பதுவும் உண்டோ தொழும் பனே
இடையில் பிறப்பதுவும் உண்டோ எருமையே
காலில் பிறப்பதுவும் உண்டோ கழுதையே
நான்முகன் என்பான் உளனோ நாயே
புளுகடா புகன்றவையெலாம் போக்கிலியே”

என்ற புரட்சிக்கவிஞர் தம் பாடலில் இருக்கும் சூட்டை, கோபத்தை, வேகத்தை என்னவென்று சொல்லுவது? சமுதாயத்தின் மீது கவிஞருக்கு இருந்த பற்றுதலே இப்படி அவரை கோபப்பட வைத்தது. பெரியாரின் கொள்கை சாரமே இதற்கு அடிப்படை. தாலாட்டுப்பாடும்போதும் தளரா கொள்கைப் பேசும் புரட்சிக்கவிஞர் - சாதியை, மதத்தை, கடவுளை, தொப்பை வளர்க்கும் பார்ப்பனர் கூட்டத்தை கூட்டி அந்த பொல்லாங்குகளை தவிர்த்திட அறிவுறுத்தும் அழகியலை, பகுத்தறிவு சீர்மையை பாருங்கள்:

“மூடத்தனத்தின் முடை நாற்றம் வீசுகின்ற
காடு மணக்க வரும் கற்பூரப் பெட்டகமே!
வேண்டாத சாதி இருட்டு வெளுப்பதற்குத்
தூண்டா விளக்காய்த் துலங்கும் பெருமாட்டி!
புண்ணிற் சரம் விடுவிக்கும் பொய்மதத்தின் கூட்டத்தைக்
கண்ணில் கனல் சிந்திக் கட்டழிக்க வந்தவளே!
தெய்வீகத்தை நம்பும் திருந்தாத பெண் குலத்தை
உய்விக்க வந்த உவப்பே! பகுத்தறிவே!
எல்லாம் கடவுள் செயல் என்று தொடை நடுங்கும்
பொல்லாங்குத் தீர்த்துப் புதுமை செய வந்தவளே!
வாயில் இட்டுத் தொப்பை வளர்க்கும் சதிக்கிடங்கைக்
கோயில் என்று காசு தரும் கொள்கை தவிர்ப்பவளே!”

அடடா... அய்யாவின் கருத்தின் பிரதிபலிப்பே புரட்சிக் கவிஞர் என்பதை புலப்படுத்துகிறார். தந்தை பெரியாரின் கொள்கைச் செழிப்பால் எப்படிப்பட்ட நிலைமைகள் ஏற்பட்டுள்ளன என்பதையும் பட்டியலிடுகிறார் கவிஞர்.

“வந்தேறிகளால் வாழ்நாள் எல்லாம்
அறியாமை இருட்டில் ஆழ்ந்திய தமிழர்க்கு 
அறிவொளி கூட்டிய அன்புடை பெரியார்
சீர்த்திருத்தத்தால் செம்மை நெறியினை
ஆர்வத்தோடும் மக்கள் அணைக்கையில்
சாதி என்னும் சழக்கு தகர்ந்தது.
சமயம் என்னும் தடைச்சுவர் இடிந்தது
மதத்தின் நரித்தனம் மடிந்தொழிந்தது
இவற்றைத் தாங்கிய என்றும் இலாத
கடவுள் என்னும் கயமையும் மறைந்தது”

பெரியாரின் சுயமரியாதை இயக்கத்தில், பகுத்தறிவுப் பேரியக்கத்தில், திராவிடர் கழகத்தில் தன்னை இணைத்துக் கொண்டு, அறிவுலக ஆசானின் அறிவார்ந்த லட்சியங்களை, புரட்சிகர கருத்துகளை, மனித சமத்துவ கருத்துகளை பாடுவதையே - எழுத்தாக்கி பறை சாற்றுவதையே நோக்கமாகக் கொண்டு வாழ்ந்திட்ட புரட்சிக் கவிஞர் வாழ்க! அவர் எண்ணம் ஈடேற உழைப்போமாக!



,விடுதலை,29.4.17

செவ்வாய், 2 மே, 2017

அம்பேத்கர் இந்திய தொழிலாளி வர்க்கத்திற்கு செய்த பணிகள்

அம்பேத்கர் பிறந்த நாளோ, நினைவு நாளோ இல்லையே. மேதினத்திற்கு எதற்கு அம்பேத்கர் படத்தை பதிவிட்டு வாழ்த்து சொல்லவேண்டும் என்று சிலர் கேட்கலாம். அவர்களுக்காகவே, அம்பேத்கர் இந்திய தொழிலாளி வர்க்கத்திற்கு செய்த பணிகளை பட்டியலிடுகின்றோம். கொஞ்சம் கேளுங்கள்...

1. பிரிட்டீஷ் இந்தியாவிலேயே 8 மணிநேர வேலையை முதலில் அரசாணை வர காரணமானவர்.
2. பெண் தொழிலாளர்களுக்கான பேருகால விடுப்பிற்கு காரணமானவர்.
3. இந்தய தொழிலாளர்களுக்கான பி.எஃப். முறைக்கு காரணமானவர்.
4. தொழிலாளர்களுக்கான ESI திட்டத்தை வடிவமைத்துக்கொடுதவர்.
5. தொழிலாளர்கள் பிரச்சனை குறித்து பேச இரு தரப்பு பேச்சுவார்த்தையாக இல்லாமல், முத்தரப்பு பேச்சுவார்த்தையாக (அரசையும் உள்ளடிக்கிய) மாற்றியவர்.
6. இன்றைக்கு இந்திய தொழிலாளி வர்க்கம் அனுபவிக்கும் சட்டப்பாதுகாப்புகளுக்கு காரணமானவர்.
7. இந்திய விடுதலைக்கு முன்பே "சுதந்திர தொழிலாளர் கட்சி" என்று தொழிலாளர்களுக்காகவே கட்சி தொடங்கியவர்
என்று இன்னும் ஏராளமாக அம்பேத்கர் குறித்து சொல்லலாம்.

ஆங்கிலேய ஆட்சியாளர்களால், அம்பேத்கருக்கு அப்போதிருந்த வைஸ்ராய் கவுன்சிலில் ‘தொழிலாளர் நலத்துறை உறுப்பினராக’ 1942ம் ஆண்டு பதவி வழங்கப்பட்டது. இந்தப் பதவியானது நாடாளுமன்ற அமைச்சருக்குச் சமமான அதிகாரமுள்ள பதவியாகும். இதை பயன்படுத்தி முழுக்க முழுக்க தொழிலாளர் நலன்களுக்காகவே செயல்பட்டார் அம்பேத்கர்.

தொழிலாளர்களுக்கான சட்டங்கள் ஒரே சீராக அமைவதன் அவசியம், காகித கட்டுப்பாட்டு ஆணை, இந்திய தேயிலை கட்டுப்பாடு மசோதா, தேர்ச்சிபெற்ற மற்றும் பகுதி தேர்ச்சிபெற்ற பணியாளர்களுக்கான வேலைவாய்ப்பு நிலையங்கள், தொழிலாளர்களுக்கு கிராக்கிப்படி வழங்கப்படுவது பற்றிய அறிவிப்பு, தொழிலாளர் சட்டங்கள், தொழிலாளர் நலன்கள் பற்றிய திட்டத்தில் சமூக பாதுகாப்பு, சம்பளம், வாழ்க்கை நலம், மோட்டார் வாகனங்கள் (ஓட்டுனர்) மசோதா, சுரங்க மகப்பேறு நல உதவி (திருத்த) மசோதா, இந்திய தொழிற்சங்கங்கள் (திருத்த) மசோதா, தொழிற்சாலைகள் (திருத்த) மசோதா, ஆலைத் தொழிலாளர்களுக்கு ஊதியத்துடன் கூடிய விடுமுறைகள், ஊதிய வழங்கீடு (திருத்த) மசோதா சுரங்க தொழிலாளர் மகப்பேறு நல உதவி (திருத்த) மசோதா, தொழிற்சாலைப் பணியாளார் நலக் காப்பீடு இந்திய தொழிற்சாலைப் பணியாளார்களுக்கான வீட்டு வசதித் திட்டம், தொழிலாளர் இழப்பீடு (திருத்த) மசோதா, தொழிலாளர்கள் மறுவாழ்வுத் திட்டம் என்பது உள்ளிட்ட பல்வேறு சட்டங்கள் தொடர்பான விவாதங்களை மத்திய சட்டமன்றத்தில் (தற்போதைய நாடாளுமன்றம்) அன்றே கொண்டு வந்தவர் அம்பேத்கர்.

மேலும் தொழிலாளர்களோடு நெருங்கிய தொடர்பை மேற்கொள்ள, அவர்களது குறைகளைக் கேட்டறிய எவ்வளவு விரைவாக முடியுமோ அவ்வளவு வேகமாக தீர்வுகளைப் பெற, தொழிற்சாலைகளில் தொழிலாளர் நல அதிகாரிகள் நியமிக்கப்படுவது விரும்பத்தக்கது என்று அன்றே மத்திய அமைச்சரவையை பொதுவாக ஒப்புக்கொள்ள வைத்தவர்.

இவர் படத்தை மேதின கொண்டாட்டத்தில் இணைப்பதே தொழிலாளி வர்க்கத்தின் தற்போதைய புரட்சிகர செயலாகும். இதுவே அம்பேத்கரை, "தாழ்த்தப்பட்ட மக்களின் தலைவர்" என்று குறுக்கிப்பார்க்கும் அதிகார வர்க்கத்திற்கு தொழிலாளி வர்க்கம் கொடுக்கும் மேதின பரிசாகும்.

புதன், 15 மார்ச், 2017

சதியை ஒழித்த பகுத்தறிவாளர் - மரகதமணி




மனிதன் இவ்வுலகத்தில் அனுபவிக்கும் வாழ்க்கை இன்ப துன்பங்கள் அனைத்தும் தான் இறந்த பிறகு மேல் உலகத்தில் தேவைப்படுகின்றன என்று கருதினர் பழங்குடி மக்கள். இத்தகைய நம்பிக்கையின் காரணமாக மன்னன் இறந்தால் அவன் மனைவிமார்கள், வைப்பாட்டிகள், மந்திரிகள் அவனுக்கு பணவிடை செய்த ஆட்கள், மன்னன் பயன்படுத்திய குதிரை, படைக்கலங்கள் முதலியவைகளையும் அவனுடன் சேர்த்து எரித்தோ அல்லது புதைத்தோ வந்தனர். இத்தகைய செயலுக்கு (ஹரா_கிரி) என்று பெயர்.

இவற்றின் சாயலாகச் சதி என்று தோன்றி கணவன் இறந்தால் மனைவியையும் சேர்த்து நெருப்பில் தள்ளி எரித்தால் அவர் கற்புடையவள் என்று கூறினர். சூடு பொறுக்காமல் அந்த பெண் அலறும் சப்தம் கொஞ்சம்கூடக் கேட்காமல் இருக்க தாரை, தப்பட்டை போன்றவை அடித்துக் கொண்டே இருந்தனர். விருப்பம் இல்லாத மனைவிமார்களை நெருப்பில் தள்ளி சாம்பலாக்கினர். இந்தக் கொடிய வழக்கத்தை முஸ்லீம் மன்னர்களும் தடுக்க முயன்றிருக்கிறார்கள். முகமது பின் துக்ளக், சிக்கந்தர், அக்பர், ஜகாங்கீர், அவுரங்கசீப் போன்ற பல இஸ்லாமிய மன்னர்கள் உடன்கட்டை ஏறுதலையும், குழந்தை மணம், பலதார மணம், வரதட்சனை வாங்குதல் போன்றவற்றிற்கு தடை விதிக்க முயன்றனர்.

இதுபோன்ற கொடுமையான செயல்களைக் கண்டு ஆங்கிலேயர்கள் வருத்தமும் அருவருப்பும் கொண்டனர். இந்தியாவில் இருக்கின்ற காட்டு-மிராண்டித் தன்மைகளை அவ்வப்போது அரசாங்கத்திற்குச் சொல்லி தீர்வு காண முயன்றனர். ஆனால், இந்துக்கள் மனது புண்பட்டு குழப்பம் ஏற்படுமோ என்று அஞ்சி பணியாட்களை வைத்து பிரச்சாரம் செய்தனர்.

இந்தக் காலகட்டத்தில் இங்கிலாந்து நாட்டில் தீவிர சிந்தனையாளர் அல்லது பகுத்தறிவாளர் குழு ஒன்று உருவானது. பெந்தாமும், ஜேம்ஸ்மில்லும் இப்பகுத்தறிவு இயக்கத்தின் தலைசிறந்த தலைவர்களாக இருந்தனர். இவர்களின் கொள்கை-களை விளக்கும் மாணவர்களாக மெக்காலே, வில்லியம் பெண்டிங், சார்லஸ் டிரெவெலின் இருந்தனர். இவர்களில் வில்லியம் பெண்டிங் 1828 முதல் 1835 வரை கவர்னர் ஜெனரலாக இருந்தார். இந்தியாவின் எல்லா முன்னேற்றத்திற்கும் ஆங்கில மொழியே திறவுகோல் என்று எண்ணி இந்தியாவில் சமூக சீர்திருத்தம், அறிவு வளர்ச்சிக்கான காரியங்களிலும் தீவிரமாக செயல்பட்டார்.

இராஜாராம்மோகன்ராய் தன் அண்ணன் இறந்தபோது அண்ணிக்கு ஏற்பட்ட கொடுமை-களைக் கண்டு அவற்றை உடனடியாக அகற்ற வேண்டும் என்று எண்ணினார். அங்குள்ள விதவைகள் அவருக்கு உறுதுணையாக இருந்தனர். சதி என்பதைப் பற்றிப் புத்தகம் எழுதினார். இந்தக் காலகட்டத்தில்தான் தீவிர முற்போக்குவாதியும் பென்தாம், ஜேஸ்மில் ஆகியவர்களின் பயன் மதிப்புக் கொள்கையை பின்பற்றுபவருமான வில்லியம் பெண்டிங் துணிந்து செயலில் ஈடுபட்டார்.

பிரிட்டிஷ் அரசாங்கமும் சதியை படிப்படி-யாகவும் விரைவாகவும் ஒழிக்க நடவடிக்கைகளை மேற்கொள்ள வேண்டுமாய் கட்டளை இட்டு இருந்தது. ஆனால், பகுத்தறிவாளரான வில்லியம் பெண்டிங் பிரபுவோ காலம் தாழ்த்தாமல் உடனடியாக செயல்பட்டார்.

1829 டிசம்பர் 4ஆம் தேதி ஒழுங்குமுறை சட்டம் இயற்றினார். இச்சட்டத்தின்படி சதிக்கு உதவி புரிந்தவர்களுக்கு தண்டனை அளிக்க வேண்டும். இந்துப் பெண்களை உயிரோடு எரிப்பது, புதைப்பது தண்டனைக்குரிய பெருங்குற்றம் என்று கைவிடச் செய்தார்.

1830 சென்னை, பம்பாய் போன்ற சமஸ்தானங்-களில் பெண்டிங் செயலை ஆதரித்து சதியை ஒழித்தனர்.

இந்தியாவின் மதப் பழக்கவழக்கங்களில் தலையிடாமல் மற்ற ஆங்கிலேய ஆட்சியர்கள் அனைவரும் அஞ்சிய நேரத்தில் பகுத்தறிவாளர் வில்லியம் பெண்டிங் அதைத் துணிந்து செய்தார்.

“எனது சொந்த நலனையே நோக்குமிடத்து இந்துக்களின் பழக்கவழக்கங்களில் தலையிடாமல் இருப்பதே சிறந்தது என்பதை நான் நன்கு அறிவேன். ஆயினும் நாகரிகம், கருணை ஆகியவற்றினை கருதும்போது உடன்கட்டை ஏறும் வழக்கத்தினை சட்டத்தின் மூலம் ஒழிப்பதே சிறப்பு’’ என்று 1830, ஜனவரி 2ஆம் தேதி பெண்டிங் தன் கருத்தை வெளியிட்டார். ஸீ

-உண்மை,1-15.3.17

திங்கள், 20 பிப்ரவரி, 2017

*அம்பேத்கர்...* பெயர்க்காரணம் ...

சிலர் அம்பேத்கர் என்பது பீமாராவ் அவர்களுக்குப் பாடம் நடத்திய ஒரு பிராமண ஆசிரியர் பெயர் எனக் குறிப்பிடுகின்றனர்.

நன்றியால் அவர் பெயரை அம்பேத்கர் வைத்துக்கொண்டதாகத் தொடர்ந்து எழுதுகின்றனர்.

சமீபத்தில் சல்லிக்கட்டிற்கு எதிராக நான் முகநூலில் எழுதியமைக்காக என்னிடத்தில் ஒரு பார்ப்பனன் வலியவந்து வம்பிழுத்தான்...

அப்பொழுது நீண்ட விவாதத்தில் அம்பேத்கர் என்பதுகூட ஒரு பார்ப்பனனின் பெயர்தான் என அண்ணலின் வரலாற்றை இழிவுபடுத்த முயற்சித்தான்...

அத்தகைய
ஈனப் பிறவிகளுக்காகவே இப்பதிவு.

// மராட்டிய கொங்கணி வட்டாரத்தில், இரத்தனகிரி மாவட்டத்தில், *அம்பாவடே* என்னும் கிராமத்தில்,

மோவ் என்னும் இடத்தில் அம்பேத்கர் பிறந்தார்.

அது இராணுவக் குடியிருப்பு. ஆதலால் Military Head Quarters of War -MHQW- என அந்த இடம் பெயர் பெற்றது!

அம்பேத்கரின் தந்தையார் இராணுவ சுபேதார், ராம்ஜி மாலேர்ஜி சக்பாலுக்கும் பீமாபாய் அம்மையாருக்கும் பதினான்காவது பிள்ளையாக, 1891 ஆம் ஆண்டு ஏப்ரல் 14 இல் பிறந்தார்.

‘பீம்’ என்றும், ‘பீமாராவ்’ என்றும் இயற்பெயர் பெற்றவரின் ஆதிக் குடும்பப் பெயர் சக்பால்.

ஆனால் பீமின் *குடும்பப் பெயர், ‘அம்பவடேகர்’* என்பது ஆகும்.

‘அம்பவடேக’ என்பது இவருடைய சொந்த ஊர் என்பதால், அம்பவடேகர் என்ற குடும்பப் பெயர்கள் முன்னோர்களின் சொந்த ஊரையே அடிப்படையாகக் கொண்டு இருக்கும்.

இப்பெயரே பின்னாளில் *அம்பேத்கர்*
என மாறியது. //

அம்பேத்கர் என்பது பார்ப்பனரின் பெயர் ; அதனை பாபாசாகேப் அண்ணல் அம்பேத்கர் நன்றியுணர்ச்சியின் அடையாளமாக வைத்துக் கொண்டுவிட்டார் ; அதனால் பார்ப்பனர்கள் நல்லவர்கள் என்ற பரப்புரையினை ஆர்எஸ்எஸ் கும்பல் செய்து கொண்டிருக்கிறது.

*அண்ணல் அம்பேத்கரை இப்பொழுது ஆர்எஸ்எஸ் கும்பல் கபளீகரம் செய்யத் துடித்துக்கொண்டிருக்கிறது.*

அதற்காக எத்தகைய பொய்யையும் அவிழ்த்து விட அவர்கள் தயாராக இருக்கிறார்கள்.

அண்ணல் அம்பேத்கர் வாழ்க்கை வரலாற்றை தனஞ்செய் கீர் என்பவர் எழுதியிருக்கிறார். அவர் ஒரு பார்ப்பனர். அத்துடன் இந்துமகாசபா ஆதரவாளர்.

அவர் வீர சவர்க்கருடைய வாழ்க்கை வரலாற்றையும் எழுதியுள்ளார்.

வீர சவர்க்கருக்கு ஆதரவாகவும் அந்த நூலில் பல இடங்களில் எழுதியுள்ளார்.

அம்பேத்கரை விமர்சனம் செய்தும் அந்த நூலில் சில இடங்கள் வரும்.

அம்பேத்கருடைய வரலாற்றில் சில விசமத்தனங்களையும் அவர் புகுத்தியுள்ளார்.

அதில் ஒன்றுதான் அம்பேத்கருடைய பெயர் ...
அவருடைய ஆசிரியர் பெயர். அதனை அம்பேத்கர் தன்னுடைய பெயராக ஏற்றுக் கொண்டார் என்று எழுதியுள்ளார்.

அதனை இப்பொழுது ஆர்எஸ்எஸ் காரர்கள் கெட்டியாகப் பிடித்துக் கொண்டுள்ளனர். அம்பேத்கரது

*இளமைக்காலத்தில் பார்ப்பனர்கள் பல்வேறு இடையூறுகளைச் செய்து வந்துள்ளனர்.*

இவர் ஒரு தீண்டத்தகாவர் என்பதால் இவரைத் தொட்டு அடித்தால் தீட்டாகிவிடும் என்பதால் அம்பேத்கரை அடிக்க மாட்டார்களாம்.

பல ஆசிரியர்கள் அம்பேத்கருக்குப் பாடம் நடத்துவதையே விரும்ப மாட்டார்களாம்.

அம்பேத்கரும் அவரது அண்ணனும் பள்ளி செல்லுகின்றபொழுது கூடவே ஒரு கோணிப்பையையும் எடுத்துச் சென்று அதில்தான் அமர வேண்டும் என்று கட்டாயப்படுத்தப்பட்டனர்.

ஒரு பார்ப்பன ஆசிரியர் நீயெல்லாம் எதற்குப் படிக்க வருகிறாய்? என்று கேட்டாராம்.

அதற்கு அம்பேத்கர் உங்கள் வேலையைப் பார்த்துக்கொண்டு போங்கள் என்று பதில் சொன்னாராம்.

அதுபோல் அம்பேத்கர் மெட்ரிகுலேசன் வகுப்பில் படித்தபோது மொழிப்பாடமாக சமஸ்கிருதத்தை எடுத்துப் படிக்க நினைத்தாராம்.

பார்ப்பன ஆசிரியர்கள் சூத்திரனான உனக்கு சமஸ்கிருதத்தை சொல்லித் தரமாட்டோம் என்று கூறி விட்டார்களாம். அதனால் தனக்கு விருப்பமில்லாத பார்சி மொழியை எடுத்துப் படித்தார் அம்பேத்கர்.

பார்ப்பனர்கள் இவ்வளவு இடையூறு செய்துள்ளார்கள் என்பதனை மக்களுக்குத் தெரியப்படுத்தினால் தாழ்த்தப்பட்ட மக்களின் ஆதரவு கிட்டாது என்பதால் இப்பொழுது அவரது பெயர்ப் பிரச்சினையைக் கெட்டியாகப் பிடித்துள்ளார்கள்.

அதாவது அம்பேத்கர் என்ற பார்ப்பன ஆசிரியர் பாபாசாகேப் அம்பேத்கர் அவர்களிடம் மிகவும் பிரியமாக இருந்ததால் அதன் நன்றி உணர்ச்சியாக அம்பேத்கர் அவர்களே தனக்கு அந்த ஆசிரியரின் பெயரை வைத்துக் கொண்டுள்ளார் என்று பொய்யான பரப்புரை செய்கிறார்கள்.

உண்மையில் தனஞ்செய்கீர் அவர்களது நூலிலுள்ள தகவலே அதன் புரட்டை வெளிப்படுத்துகிறது.

அதாவது பாபாசாகேப் அம்பேத்கர் அவர்களின் இயற்பெயர் பீமாராவ் ராம்ஜி அம்பாவடேகர் என்பதாகும்.

அம்பாவடே என்பது அவரது ஊரின் பெயர்.

அதனால் அதை அம்பாவடேகர் என்று பெயரை பள்ளியில் சேர்க்கும்போது பதிவு செய்துள்ளார்கள்.

பணியில் ஒழுங்கில்லாத சோம்பேறியான பார்ப்பன ஆசிரியர் அந்தப் பெயரைப் பள்ளி பதிவேட்டில் அம்பேத்கர் என்று எழுதிவிட்டார்.

இப்படித்தான் அண்ணல் அம்பேத்கருக்கு அந்தப் பெயர் வந்தது.

இதனை அப்படியே தலைகீழாகப் புரட்டி அம்பேத்கரே நன்றியுணர்ச்சியின் காரணமாக அம்பேத்கர் என்ற தனது ஆசிரியரின் பெயரை வைத்துக் கொண்டார் என்று எழுதி பார்ப்பன ஆசிரியர்கள் அம்பேத்கரின் கல்விக்கு செய்துவந்த இடையூறுகளை மறைக்கப் பார்க்கிறார்கள். அதை உண்மை என்றே வைத்துக் கொள்வோம். அமபேத்கருக்கு உதவி செய்ததாகச் சொல்லும் அந்த ஆசிரியரின் வாரிசுகள் இன்றைக்கு இருப்பார்கள் அல்லவா? அல்லது அம்பேத்கர் என்பது பார்ப்பன இனத்தவர் வைத்துக் கொள்ளுகின்ற பெயராக இருந்தால் மற்றவர் யாராவது அந்தப் பெயரில் இருப்பார்கள் அல்லவா?

தமிழகத்தில்தான் தந்தை பெரியார் இயக்கத்தின் சாதனையாக எவரும் தன்னுடைய பெயருக்குப் பின்னால் ஜாதியைப் போடுவதில்லை. ஆனால் மற்ற மாநிலங்களில் எல்லாம் ஒவ்வொருவரும் தங்களுடைய பெயருக்குப் பின்னால் வால் மாதிரி தங்கள் ஜாதியை ஒட்ட வைத்திருப்பார்கள். அந்த வாலை வைத்து அவர்கள் என்ன ஜாதி என்பதனைக் கண்டு பிடித்து விடலாம்.

ஆனால் மகாராஷ்டிராவில் ஒரு பார்ப்பனர் கூட அம்பேத்கர் என்ற பெயரில் இல்லையே ஏன்?

மகாராஷ்டிராவில் உள்ள பார்ப்பனர்களின் பெயர்கள் சில:

1) பட்னவிஸ் (தேவேந்திர பட்னவிஸ்)

2) கட்கரி (நிதின் கட்கரி)

3) மகாஜன் (பிரமோத் மகாஜன்)

4) தேசாய் (மொரார்ஜி தேசாய்)

5) ஹெட்கேவர் ( ஆர்எஸ்எஸ் தலைவர்)

6) கோல்வால்கர் (குருஜி கோல்வால்கர்)

7) சவர்க்கர் (வீரசவர்க்கர்)

8) கோட்ஷே (நாதுராம் கோட்ஷே)

9) திலக் (பாலகங்காதர திலகர்)

10) ரானடே

11) டென்டுல்கர்

12) மங்கேஸ்கர்

13) ஜோஷி

14) குல்கர்னி

15) பட்

16) நட்கர்னி

17) ஷர்போத்தார்

18) ஆப்தே

19) ஷர்தேசாய்

20) பட்கே

21) தேஷ்பான்டே

22) தேவ்ரஸ்

23) தாக்கரே

இவையெல்லாம் உதாரணம். இதுபோல் நூற்றுக் கணக்கான பெயர்களில் பார்ப்பனர்கள் அழைக்கப்படுகிறார்கள். ஆனால் அந்த நூற்றுக் கணக்கான பெயர்களில் ஒருவர் கூட அம்பேத்கர் என்ற பெயரில் இல்லை என்பது கவனிக்கத் தக்கது. அம்பேத்கர் என்பது பார்ப்பனரின் பெயர். அதனை பாபாசாகேப் அண்ணல் அம்பேத்கர் நன்றியுணர்ச்சியின் அடையாளமாக வைத்துக் கொண்டுவிட்டார். அதனால் பார்ப்பனர்கள் நல்லவர்கள் என்ற பரப்புரையினை ஆர்எஸ்எஸ் கும்பல் செய்து வருமேயானால்... *இந்தக் கேள்விக்கு விடையளித்து விட்டு அதற்குப் பிறகு அந்தப் பரப்புரையைச் செய்யட்டும்..*

ஞாயிறு, 12 பிப்ரவரி, 2017

புவியில் கடவுள் இல்லாத பகுதியாக கிழக்கு ஜெர்மனி இருப்பது ஏன்?




ஒரே நாடாக இருந்த ஜெர்மனி பெர்லின் சுவரால்  பிரிக்கப்பட்டு கிழக்கு ஜெர்மனி, மேற்கு ஜெர்மனி என்று இருந்தன. பின்னர் அரசியல்ரீதியில் மீண்டும் ஒன்றாக இணைந்து இருபதாண்டுகள் கடந்த பின்னரும் ஜெர்மனி மதக்கூறுகளால் பிரிந்தே உள்ளன. இன்னமும் மேற்கு ஜெர்மனி யில் கிறித்தவம்  ஓரளவுக்கு ஆதிக்கம் செலுத்தும் படியாகவே நிலை கொண் டுள்ளது. அந்த அளவில் கிழக்கு ஜெர் மனியில் இல்லை. கிழக்கு ஜெர்மனியில் மக்கட்தொகையில் மூன்றில் இரண்டு பங்கினர் இளைஞர்கள் மற்றும் முதியவர்கள் தங்களை நாத்திகர்கள் என்று பகிரங்கமாகப்  பதிவு செய்து கொண்டுள்ளனர்.
ஜெர்மானிய சனநாயக குடியரசு நாட்டில் மீண்டும் கிறித்தவம் திரும்பும் என்று எண்ணுபவர்களின் எண்ணம் ஈடேறாது என்றே நினைவுக்கு எட்டியவரையில் தோன்றுகிறது. புதிதாக எடுக்கப்பட்டுள்ள புள்ளி விவரங்களின் படி, நாத்திகம் கிழக்கு ஜெர்மனியில் நன்றாகவே வளர்ந்து வருகிறது. கிழக்கு ஜெர்மனியில் 28 வயதுக்குட்பட்டவர் களில் 71 விழுக்காட்டினர் எப்போதுமே மேலான சக்தி என்று ஒன்றை நம்பிய தில்லை என்கின்றனர். 38லிருந்து 47 வயதினரில் 72.6 விழுக்காட்டினர் எவ் வித கடவுள் நம்பிக்கையும் இல்லாத வர்களாக உள்ளனர்.
கடவுள்மீதான நம்பிக்கை என்று வரும்போது இளம்தலைமுறையினர், நடுத்தர வயதினரைப் போலவே நாத்திகர்களாகத் தங்கள் சிந்தனையில் ஒரே அலைநீளத்தில் உள்ளனர். முன்பு பிரிந்திருந்தநிலையில் கிழக்கு ஜெர்மனி யில் அரசியல் மாற்றங்களில், இன்னும சொல்லப்போனால் மக்கள் எண்ணங் களிலேயேகூட  மதம் இருக்கவில்லை. அந்தக் காலகட்டத்தில் வெகுசிலர் நாத்திகர்களாக இருந்துள்ளனர். 28 வயதிலிருந்து 37 வயதினராக இருந்த வர்கள் 63.6விழுக்காட்டினர் ஒருபோதும் கடவுளை நம்பாத முழுமையான நாத்திகர்களாகவே இருந்துள்ளனர். அவர்களைத் தொடர்ந்து இருக்கின்ற அடுத்த தலைமுறையினர் மதமற்ற பெற்றோர்களைக் கொண்டவர்களாக இருக்கின்றனர்.
சிகாகோ பல்கலைக்கழகத்தின் சமூகவியலாளர் டாம் டபிள்யூ.ஸ்மித் என்பவர் நாடுதோறும், காலந்தோறும் கடவுள் நம்பிக்கையின் நிலைகுறித்து ஆராய்ச்சி மேற்கொண்டு அண்மையில் ஆராய்ச்சியின் அறிக்கையை வெளி யிட்டுள்ளார். அந்த அறிக்கையில் காலத்துக்கேற்ப கடவுள்நம்பிக்கை மாற்றம் அடைந்துள்ளதைக் குறிப்பிட் டுள்ளார். ஆய்வாளர்கள் அவர்களு டைய சொந்தக் கருத்துகளை கூறுவ தில்லை. சர்வதேச சமூகவியல் புள்ளி விவரத்திட்டங்கள் அளிக்கும் விவரங் களைச் சார்ந்தே ஆய்வுகளை அளிக் கின்றனர். 1991, 1998 மற்றும் மீண்டும் 2008இல் உலகம்முழுவதும் மதங்களின் விகிதம் குறிப்பாக கிறித்துவம் உள்ள நாடுகளான ஆஸ்திரேலியாவிலிருந்து இஸ்ரேல் வரை, ருஷ்யாவிலிருந்து சைப்ரஸ்வரை என்று உலகம் முழுவதும் புள்ளிவிவரங்களுக்கான ஆய்வு மேற்கொள்ளப்பட்டது.
அதனாலேயே ஜெர்மனி என்று வரும்போது, இரண்டாக கிழக்கு மேற்கு என்று புள்ளிவிவர முடிவுகள் பெறப் பட்டுள்ளன. புவியில் நீண்டகால மாகவே அதிக அளவில் நாத்திகர்கள் உள்ள நாடாக கிழக்கு ஜெர்மனி இருந்துவந்துள்ளது. கிழக்கு ஜெர்மனியில் 52.1விழுக்காட்டினர்  கடவுள்மீது நம்பிக்கை இல்லை என்று கூறி உள்ளனர். அதேநேரத்தில் முற்றிலும் வேறுபட்டு 10.3 விழுக்காட்டினர்  மேற்கு ஜெர்மனியில் நாத்திகர்களாக அடை யாளப்படுத்திக் கொண்டுள்ளனர். ருஷ்யாவில் 6.8விழுக்காட்டினரும், அமெரிக்க அய்க்கிய நாடுகளில் 3விழுக்காட்டினரும், பிலிப்பைன்சில் 0.7விழுக்காட்டினரும் நாத்திகர்களாக உள்ளனர். கிழக்கு ஜெர்மனியில் தோராய மாக 46விழுக்காட்டினர் புள்ளி விவரங் களின்படி தங்களை நாத்திகர்களாகக் குறிப்பிட்டுள்ளனர். அதேபோல், டச்சு நாட்டினர் 15.3விழுக்காட்டினரும், மேற்கு ஜெர்மனியில் 4.9 விழுக்காட்டினரும், இத் தாலியில் 1.7 விழுக்காட்டினரும் நாத்திகர்களாகக் குறிப்பிட்டுள்ளனர். 1991 முதல் 2008வரையிலான காலங்களில் நாத்திகர்களின் விகிதம் 3.4விழுக்காட்டு அளவில் வலிமையான அளவில் அதிகமாகி உள்ளனர். அதேநேரத்தில் ருஷ்யாவில் 11.7விழுக்காடாக சுருங்கி உள்ளது.
நவீனத்துவத்தின் அடையாளத்தின்  குறியீடு
உலக அளவில் தலை முறைகளுக் கிடையே ஒப்பிடும்போது, பெரும்பாலும் இளைஞர்கள்தான் 55 வயதைக்கடந்த முதியவர்களைக் காட்டிலும், மத நம்பிக்கைளைக்கடந்து நவீனத்துவத்தில் ஆர்வம் உள்ளவர்களாக கருதப்படு கிறார்கள். உதாரணமாக போலந்தில் 79.3 விழுக்காட்டினரில் 68 வயதைக் கடந்தவர்கள் கடவுள் நம்பிக்கையாளர் களாகவும் 28 வயதிலிருந்து 37 வயதி னராக உள்ளவர்கள் 58.4 விழுக்காட் டினர் நாத்திகர்களாகவும் உள்ளனர்.  இதற்கு விதிவிலக்காக இஸ்ரேல் உள்ளது. மத சார்பற்ற யூதர்களின் இசுரேலை நோக்கிய இடப்பெயர்வால் இசுரேலில் உள்ள இளைஞர்கள் இறைநம்பிக்கையாளர்களாக உள்ளதாகக் கூறப்படுகிறது. இதையே வேறுவிதமாக, யூதர்களின் இடப்பெயர்வு மட்டுமின்றி யூதர்கள், இசுலாமியர்களை மதரீதியில் வேறுபடுத்திப் பார்ப்பதாலும் அவ்வாறு உள்ளதாக புள்ளிவிவர ஆய்வாளர்கள் கருதுகின்றனர். மதரீதியான  பிரிவாலும், போட்டியாலுமே மத நம்பிக்கைகளை அடையாளப்படுத்தும் நிலை ஏற்பட்டுள்ளதாகக் கருதுகின்றனர். மத நம்பிக்கை என்பது ஒருவரின் எண் ணத்தில் தனிப்பட்ட அடையாளத்துக் காகவே அதிக அளவில் மத அடை யாளங்கள் உள்ளதாக ஆய்வு கூறுகிறது. கிழக்கு ஜெர்மனியில் மதரீதியான போட்டிகள் இல்லால் இருப்பதற்கு அங்கு இசுலாமியர் குறைந்த அளவில் இருப்பதுதான். ஆய்வாளர்கள் இதை மட்டுமே காரணமாகக் கூறாமல், நாத்திகர்கள் எண்ணிக்கை அதிகமாக உள்ளதற்கான காரணங்களை விரிவாக அலசி ஆராய்ந்து உள்ளனர். கிழக்கு ஜெர்மனியில் நாத்திகம் பரவி உள்ளதன் காரணத்தை ஆய்வாளர் ஆராயும்போது தேசிய சமூகவியலாளர் கள், பொதுவுடைமைவாதிகள் விட்டுச் சென்ற ஆழமான தடங்கள்தான் காரண மாக உள்ளதாக ஆய்வாளர்கள் கூறு கின்றனர். ஏராளமானோர் அடிமை களாக நடத்தப்பட்டதன் காரண மாகவும், இடைப்பட்ட காலத்தில் மதச் சடங்குகளின்மீது பிடிப்பில்லாதவர்கள் இருந்த காரணங்களாலும், மதமற்றவர் களாகவே இருந்துள்ளனர். 1918லிருந்து 1933 காலம்வரையிலான வெய்மர் குடியரசாக இருந்தபோது மதசார்பற்ற இயக்கங்கள் இயங்கி உள்ளன. குறிப்பாக துறிங்ஜியா, சக்சோனி ஆகிய பகுதிகளில் வசிப்பவர்கள் கடவுள், மத மறுப்பாளர் களாகவே இருந்துள்ளனர். அந்தப் பகுதிகளில் சர்ச் கிறித்தவ ஆலயம் என்று எதுவுமே இருக்கவில்லை. போலந்தி லிருந்து கத்தோலிக்கர்கள் நுழைவை அடுத்து, அவர்களால் மதபோதனைகள் நடைபெற்றன.
தற்போதைய ஆய்வின் முடிவு களின்படி, ஜெர்மனி முழுவதும் நாத்திகக் கருத்தில் நடுநிலை வகிப்பதாக தெரிகிறது. மேற்கு ஜெர்மனியில் அதன் அண்மை நாடுகளான செக் குடியரசு, பிரான்சு நாடுகளைவிடவும் மத நம்பிக்கையில் வலுவாக உள்ளதாக தெரிகிறது. அய்ரோப்பாவில் நம்பிக்கைமீதான கருத்தானது தனி நபருக்குரியதாகவும், பெரிதான நம்பிக்கை என்பதன் வீரியத் தில் குறைந்துவிட்டதாகவும், மதம் என்பது பொதுவாக கவுரவத்துக்காகவும், மற்றபடி கடவுள், மத மறுப்புகளே உள்ளதாக ஆய்வு கூறுகிறது. அய் ரோப்பா முழுவதும் நாத்திகக்கருத்து முதன்மையான சவாலாகவே உள்ளது.
ஜெர்மனியில் உள்ள  கிறித்தவ ஆலயத்தின் துணைத்தலைவர் குண்ட் லாச் வெல்ட் இணையத்தில் கூறும் போது, கிழக்கு மற்றும மேற்கு ஜெர் மனிகளை ஒன்றோடொன்று ஒப்பிடு வதே பொருத்தமற்றது. அய்ரோப்பாவில் உள்ள அனைத்து தேவாலயங்களிலும் கடவுள் நம்பிக்கை என்பது பெரும் சவாலாக உள்ளதை ஒப்புக் கொள் கிறோம் என்றார். எர்ஃபர்ட் பல்கலைக்கழகத்தின் ஆன்மீகப் பேராசிரியர் எபெர்ஹர்ட் டைஃபென்சீ கூறும்போது, கிழக்கு ஜெர்மனி மிஷனரி நாடாக இருந்தால் கிறித்தவ பயிற்சிகுறித்தோ, மற்ற மதங்கள்குறித்தோ  கூறலாம். ஆனால், நுற்றாண்டுகளாகவே அந்த நாடு மத மற்றதாக இருந்து வருகிறது என்றார். நூற்றாண்டுகளாக மிஷனரி இயக் கங்களுடன் எந்த காரணம்முன்னிட்டும் இணையாமல் இருந்து வந்துள்ளது. இப்படிக்கூறுவதன்மூலம் அவரை பணியிலிருந்து விடுவித்துவிடுவார்களா என்று கேட்டபோது, அதற்கான அவசியமே இல்லை. இருக்கும் நிலையை மாற்றுவதற்கான சாத்தியக்கூறுகள் ஏதும் இருப்பதாகத் தெரியவில்லை. மிஷன் என்றோ, எவாங்கலைஸ் என்றோ, புதிய ஏற்பாடு என்றோ   எந்தவிதத்தில் முயன்றாலும் அவர்கள் கவனிப்பதாகவே தெரியவில்லை. மதத் தின்பெயரால் அவர்களைப் பிரிப்ப தாகவே கூறுகிறார்கள். எப்போதுமே மதத்தின்பேரால் செயல்படுபவர்களை மதிப்பதாகவே தெரியவில்லை. அவர்களுடைய இலட்சியங்களை வெளிப்படையாகவே கொண்டுள்ளனர். அவர்களுடைய பலவீனங்களை மறைக்க முயற்சிப்பதில்லை என்று டைஃபென்சீ கூறினார்.
எர்ஃபர்ட் நகரில் நடைபெறும் ஜெர்மானிய பிஷப்புகளின் மாநாட்டுக் குழுத் தலைவரான  ஹுபெர்டஸ் ஸ்கோனிமேன் கூறும்போது, மிஷன ரியமாக செயல்படும்குழுவாக புதிய வாழ்வுக்காலக் கொண்டாட்டம் என்கிற தலைப்பில் விளக்கக் கூட் டங்கள் நடத்தப்படுகின்றன.
கிழக்கு ஜெர்மனியில் 14ஆம் வயதை பருவ வயதை அடைந்ததாகக் கொண்டாடு வதன்மூலம் சிறிதளவு வெற்றி பெற்றுள்ளதாகவும், அதேபோல் கிறிஸ்துமஸ்  விடுமுறை என்பதால் கிறிஸ்துமஸ் நாளுக்கு முதல்நாளிலேயே விழா கொண்டாடப்படுவதன்மூலமும், காதலர் தினவிழாவில் காதலர்களுக்கு சேவை ஆற்றுவதன்மூலமும் மத நம்பிக்கையை வளர்த்துவருவதாக கூறும்போதே, இவை அனைத்தும் கடவுள்மீதான நம்பிக்கையை வளர்ப் பதற்கே தவிர தவறாக எடுத்துக் கொள் ளக் கூடாது என்றும் எச்சரிக்கையுடன் கூறுகிறார்.
-_ வேர்ல்டுகிரென்ச்.காம்
-விடுதலை ஞா.ம.,14.6.14

வறுமையில் வாடிய ஸ்டாலின்!


சோவியத் ஒன்றி யத்தின் அதிபராகப் பல்லாண்டுகள் ஆட்சி  செய்தவர் ஜோசப் ஸ்டாலின். இவருடைய இயற் பெயர் இயோசிப் விஸ்ஸாரி யோனோவின் டிலுகாஷ் விலி என்பதாகும். இவர் 1879ஆம் ஆண்டில் ஜார்ஜியாவில் கோரி என்னும் நகரில் பிறந்தார்.
இவருடைய தாய்மொழியாகிய ஜார்ஜியன் மொழி ரஷிய மொழியி லிருந்து முற்றிலும் வேறுபட்டது. எனினும், ரஷிய மொழியை இவர் பின்னர் கற்றுக் கொண்டார். ரஷிய மொழியை இவர் ஜார்ஜிய மொழிச் சாயலுடனேயே எப்போதும் பேசி வந்தார்.
ஸ்டாலின் கொடிய வறுமையில் வளர்ந்தார். இவருடைய தந்தை ஒரு செருப்புத் தைக்கும் தொழிலாளி. அவர் எப்பொழுதும் அளவுக்கு மீறிக் குடித்துவிட்டு, மகனை முரட்டுத்தனமாக அடிப்பார். இயோசிப் 11 வயதாக இருக்கும்போது அவருடைய தந்தை இறந்தார். இளமையில் கோரி நகரில் ஒரு மடாலயப் பள்ளியில் இவர் கல்வி கற்றார்,
வாலிப பருவத்தில் டிரிப்ளிசில் ஓர் இறையியல் கல்விக் கூடத்தில் கல்வி பயின்றார். எனினும் 1899-ஆம் ஆண்டில், புரட்சிக் கருத்துகளைப் பரப்பியதற்காக கல்விக் கூடத்திலிருந்து வெளியேற்றப்பட்டார்.
அதன்பின் இவர் தலைமறைவு மார்ச்சி இயக்கத்தில் சேர்ந்தார். சாதாரணப் பின்னணியில் வாழ்க் கையைத் தொடங்கிய ஸ்டாலின், உல கின் பெரிய நாடு ஒன்றின் அதிகார மிக்க தலைவராக உயர்ந்தார். அதற்குப் பொருத்தமாக, இரும்பு மனிதன் என்று பொருள்படும் வகையில் தனக்கு ஸ்டாலின் என்ற பெயரையும் சூட்டிக் கொண்டார்.
-விடுதலை ஞா.ம.,6.9.14