சனி, 23 ஜூன், 2018

*பகுத்தறிவாளர் யார்?*

*இதோ பெரியார் சொல்கிறார் கேளுங்கள்*

1. எண்ணம், சொல், செயல் ஆகியவற்றின் அடிப்படையாகப் பகுத்தறிவையே முன்னி றுத்தி, தன்னம்பிக்கையுடன் இயங்குபவர்.

2. மனஉறுதியும், தெளிவான சிந்தனையும் பெற்றவர்.

3. அஞ்சாமையுடன் அறிவுக்கு முதலிடம் தந்து ஆக்கப்பணிகளில் ஈடுபடுபவர். நல்ல நோக்கத்துடன் தீமையைக் களைந்திட அறிவுப்பணி ஆற்றவும் தயங்காதவர்.

4. எங்கும் எதிலும், யாரிடத்திலும் என்றும் உண்மையை ஆராய்ந்து அறிவோர்.

5. சிந்தனையே அனைத்து ஆற்றல்களையும் அளிக்க வழி வகுக்கும் மாமருந்து என உணர்வோர்.

6. கடவுள், மதம், சாதி முதலிய பொய்மைகளினின்றும் விடுபடுவதுடன் - நாடு, இனம், மொழி, மரபு, இலக்கியம் முதலான எல்லைகட்கும் அப்பாற்பட்டு இயங்குபவர்.

7. ஆண், பெண் வேறுபாடுகளைக் கருதாதவர்; பொதுஉரிமையுடன் கூடிய பொதுவுடைமைச் சமுதாயம் அமைக்கப் பாடுபடுபவர். புரட்சி - மனப்பான்மை மிக்கவர்.

8. அடக்கமும், அமைதியும் உடையவராய்த் தற்பெருமையும், தாழ்வு மனப்பான்மையும் இன்றி வாழ்வோர்.

9. துன்பம், தடை, சிக்கல், ஒழுக்கம், அச்சம், பிணி முதலியவற்றை அறிவியல் முறையில் அகற்றக் கற்றவர்.

10. மனித உடல் பல நுட்பங்கள் பொருந்திய பொறி (இயந்திரம்) என்னும் உண்மையைக் கருத்தில் கொண்டு உடலை ஓம்பி, எந்நிலையிலும் மாள அஞ்சாதவர்.

11. பெயர், புகழ், வீண் பெருமை ஆகியவற்றுக்காக ஆடம்பரமான வாழ்வு நடத்தாமல், தற்புகழ்ச்சியைத் துறந்து, பிறர் நலம் பேணுபவர்.

12. மனிதரைச் சமநோக்குடன் அணுகி, மதிக்கும் இயல்பும், உண்மை அன்பும், தன்னலமின்மையும், வினைத்தூய்மையும், மிக்கவராய் ஊக்கமுடன் உழைப்பவர்.

13, தான் ஏற்றுக் கொண்ட பொறுப்பு ஒவ்வொன்றிலும், சமுதாய முன்னேற்றத்திற்காகத் தொண்டாற்றுபவர்

  *தந்தை பெரியார்*

புதன், 20 ஜூன், 2018

உலகளவில் நாத்திகர்கள்



உலகிலேயே அதிக விழுக்காட்டில் நாத்திகர்கள் இருப்பது சீனாவில்தான் என்று ஆய்வுத்தகவல் கூறுகிறது.

globalnation.inquirer.net இணையத்தில் (9.5.2018) இத்தகவல் வெளியிடப்பட்டுள்ளது.

கேல்லப் இன்டர்நேஷனல் நிறுவனத்தின் சார்பில் 2017ஆம் ஆண்டுவரை பன்னாட்ட ளவில் 68 நாடுகளில் சுமார் 68,000பேரிடம் மத நம்பிக்கை உள்ளவர்கள் மற்றும் மத நம்பிக்கையற்றவர்கள்குறித்து புள்ளிவிவரம் திரட்டப்பட்டது.

சீனாவில் 67 விழுக்காட்டினர் நாத்திகர்கள்


அப்புள்ளிவிவரத்தின்படி, சீனாவில் 67 விழுக்காட்டினர் மத நம்பிக்கையற்ற நாத்தி கர்களாக தங்களை அடையாளப்படுத்திக் கொண்டுள்ளனர்.

பத்துபேரில் ஏழு பேர் நாத்திகர்களாக உள்ளனர்.  வேறு எந்த நாட்டையும்விட, இருமடங்கு அளவில் 23 விழுக்காட்டினர் மத மற்றவர்களாக அறிவித்துக்கொண்டுள்ளனர்.

சீனாவில் 9 விழுக்காட்டினர் மட்டுமே தங்களை மத நம்பிக்கை கொண்டவர்களாகக் குறிப்பிட்டுள்ளனர்.

சீனாவைத் தொடர்ந்து நாடுவாரியாக நாத்திகர்களின் எண்ணிக்கை விவரம் வருமாறு:

ஜப்பான் நாட்டில் 29 விழுக்காடு, சுலோவேனியா நாட்டில் 28 விழுக்காடு, செக் குடியரசில் 25 விழுக்காடு, தென்கொரியாவில் 23 விழுக்காடு, அய்ரோப்பிய நாடுகளான பெல்ஜியம் 21 விழுக்காடு, பிரான்சு 21 விழுக்காடு, சுவீடன் 18 விழுக்காடு, அய்ஸ்லாந்து 17 விழுக்காடு அளவில் நாத் திகர்களாக தங்களை அறிவித்துக்கொண் டுள்ளனர்.

நம்பிக்கையில் பல விதங்கள்


மதநம்பிக்கையைச் சார்ந்துள்ளவர்களாக 62 விழுக்காட்டினர் தங்களை மதநம்பிக்கை உள்ளவர்கள் என்று கூறியுள்ளனர். மத நம்பிக்கை உள்ளவர்களிடையே ஆன்மா என்ற ஒன்று இருப்பதாக நம்புபவர்களாக 74 விழுக்காட்டினரும், கடவுள் நம்பிக்கை யாளர்களாக 71 விழுக்காட்டினரும், சொர்க்கம் என்று இருப்பதாக நம்புபவர்களாக 56 விழுக்காட்டினரும், மறுபிறப்பு உள்ளதாக 54 விழுக்காட்டினரும், நரகம் என்ற ஒன்று இருப்பதாக 49 விழுக்காட்டினரும் உள்ளதாக புள்ளி விவரத் தகவல் கூறுகிறது.

வங்கதேசம், இந்தோனேசியா, பிலிப் பைன்ஸ் நாடுகளைச் சேர்ந்தவர்களிடையே மதம், கடவுள், ஆன்மா, சொர்க்கம், நரகம் ஆகிய நம்பிக்கைகள் மிகுந்துள்ளதாக கேல்லப் இன்டர்நேஷனல் நிறுவனப் புள்ளிவிவரத்தகவல் கூறுகிறது. மங்கோலியா நாட்டில் 8 விழுக்காடு, வியட்நாம் 6 விழுக்காடு, இந்தியா 2 விழுக்காடு, பாகிஸ்தான் மற்றும் தாய்லாந்தில் ஒரு விழுக்காடு நாத்திகர்கள் என்று அறிவித்துக் கொண்டவர்கள் இருப்பதாக புள்ளிவிவரத் தகவல் கூறுகிறது.

ஆக, மதத்தை நம்புவோரிடையே ஆன்மா, சொர்க்கம், மறுபிறப்பு, நரகம், கடவுள் ஆகிய கருத்துகளை ஏற்காதவர்களும் இருக்கிறார்கள் என்று இப்புள்ளி விவரத்தகவல்கள் மூலம் தெரிகிறது.

வருவாய், கல்வி, சமூக பண்புநலன்கள் பெருக நாத்திகம்


புள்ளிவிவரத் தகவலின்படி, மதநம்பிக்கை குறைவாக உள்ள நிலையில் வருவாய் மற்றும் கல்வி நிலை அதிகரித்துள்ளதாக புள்ளிவிவரத் தகவல் கூறுகிறது.

மத நம்பிக்கை சார்ந்தவர்களிடையே குறைவான வருவாய் கொண்டவர்களாக 66 விழுக்காடும்,

மத நம்பிக்கையற்றவர்களாக இருப்பவர் களில்  50 விழுக்காட்டளவில் அதிக வருவாய் கொண்டவர்களாகவும் இருக்கின்றனர்.

அதேபோன்று மத நம்பிக்கை மிகுந்தவர்களிடையே 83 விழுக்காட்டளவில் கல்வி நிலையில் குறைந்து காணப்படு வதாகவும், மதநம்பிக்கையற்றவர்களிடையே  49 விழுக்காட்டளவில் கல்விநிலையில் உயர்ந்து காணப்படுவதாகவும் புள்ளிவிவரம் கூறுகிறது. புள்ளிவிவரத்தின்படி, மதம் சார்ந்த நம்பிக்கை மற்றும் சமுதாயத்தில் மக்களின் பண்புநலன்களிடையே ஒப்பீட்டளவில் வயது, வருவாய், கல்வி நிலை உள்ளிட்டவற்றில் மதநம்பிக்கை இல்லாதவர்களின் நிலை ஓங்கியும், மத நம்பிக்கையாளர்களின் நிலை குறைந்தும் காணப்படுகிறது. மேலும் இளைஞர்கள் ஒரே மதத்தைச் சார்ந்திராமல், பன்மத நம்பிக்கையாளர்களாக அதிகரித்துவருவதாக தகவல்கள் கூறுகின்றன.

சமுதாயத்தில் மதத்தை ஏற்றுக்கொள்வதில் கூட, கல்வியின் தாக்கம் குறிப்பிடத்தக்க அளவில் இருப்பதாக  தகவல்கள் கூறுகின்றன.

பன்னாட்டளவில் தனிமனிதர்களின் வாழ்வில் மதம் பொருந்தக்கூடியதாக உள்ளது. ஒவ்வொரு நாட்டின் வரலாற்றைப் பொருத்தவரையிலும்கூட,கல்விநிலைமட்டுமே குறிப்பிடத்தக்க மதிப்புகளை பெறுவதாக இருந்து வருகிறது.

- இவ்வாறு புள்ளிவிவரத் தகவல் கூறுகிறது

- விடுதலை ஞாயிறுமலர், 12.5.18

வெள்ளி, 18 மே, 2018

கேரள மாநிலம், எர்ணாகுளத்தில் "சார்வாகம் 2018"

அறிவியல் பகுத்தறிவுக் கருத்தரங்கத்தில் திராவிடர் கழகம் பங்கேற்பு




கேரள மாநிலம், எர்ணாகுளத்தில் யுக்திவாத பாடனகேந்திரத்தின் ஏற்பாட்டில் "சார்வாகம் 2018" நிகழ்ச்சி  மே 12-13 ஆகிய இரு நாள்கள் நடைபெற்றது. இந்த நிகழ்வின் ஒரு பகுதியான அறிவியல் பகுத்தறிவு கருத்தரங்கத்தில் திராவிடர் கழகத்தின் சார்பில் வெளியுறவுச் செயலாளர் வீ. குமரேசன் பங்கேற்றார்.

"மதச்சார்பற்ற இந்திய நாட்டில் பகுத்தறிவாளர் களுக்கான அறைகூவல்கள்" எனும் தலைப்பில் கருத்தரங்கம் நடைபெற்றது. எர்ணாகுளம் நகரின் மய்யப் பகுதியில் அமைந்துள்ள நகர் மன்ற அரங்கில் இரண்டு நாள் நிகழ்ச்சிகள் நடைபெற்றன. முதல் நாள் பிற்பகலில் நடைபெற்ற கருத்தரங்கிற்கு "டெக்கான் கிரானிக்கல்" ஆங்கில ஏட்டின் நிர்வாக ஆசிரியர் கே.ஜே. ஜேக்கப் நெறியுரைஞராக இருந்தார். கருத்தரங்கில் அனைந் திந்திய பகுத்தறிவாளர் சங்கக் கூட்டமைப்பின் தலைவர் பேராசிரியர் நரேந்திர நாயக், மகாராஷ்டிர அந்தஸ்திரத நிர்மூலன் சமிதியின் செயல் தலைவர் அவினாஷ் பாட்டீல், கேரள யுக்திவாதி சங்கத்தின் பொதுச் செயலாளர் ராஜகோபால் வக்கதானம்  கர்நாடக மாநில பகுத்தறிவாளர் சங்கத்தின் துணைத் தலைவர் பி.வி. சுப்பாராவ், யுக்திவாத பாடனகேந்திராவின் துணைத் தலைவர் ஷிபு எரிக்கல் ஆகியோருடன் திராவிடர் கழக வெளியுறவுச் செயலாளர் வீ. குமரேசனும் பங்கேற்றார்.

கருத்தரங்கில் வீ. குமரேசன் உரை


கருத்தரங்கில் திராவிடர் கழக வெளியுறவுச் செயலா ளர் வீ. குமரேசன் ஆற்றிய உரையின் சுருக்கம் வருமாறு:

மதச் சார்பற்ற இந்தியா எனக் குறிப்பிடும் பொழுது நாட்டுக் குடிமக்களிடத்தில், நாட்டை ஆட்சி செய்யும் அரசமைப்புச் சட்டத்தில் மதச்சார்பின்மை உள்ளதா எனக் கேள்வி எழுகிறது.  குடிமக்களைப் பொறுத்த அளவில் தொன்றுதொட்டு மதச்சார்பின்மை, சகிப்புத் தன்மை கொண்டவர்களாகவே இருந்துள்ளனர்; இன்றும் இருந்து வருகின்றனர். 'மதமா? மனித  சமுதாய நல்லிணக்கமா? என கேள்வி எழுந்தபொழுதெல்லாம் மத உணர்வுகள் மக்களிடம் மட்டுப் பட்டே வந்துள்ளன. அரசமைப்புச் சட்டத்தினைப் பொறுத்த அளவில் மதச் சார்பின்மையினை வலியுறுத்தும் விதிகள் உள்ளன. விதிகள் எனும் பொழுது மதச்சார்பின்மை கருத்தினை வலியுறுத்தும் எழுத்துகள் உள்ள அளவிற்கு மதச் சார்பின்மை எண்ணங்கள் இன்றைய ஆட்சியாளர்களால் போற்றப்படவில்லை; பேணப்படவில்லை என்பதுதான் உண்மை நிலை. மத உணர்வுகளை பாதுகாத்து மத நடவடிக்கையால் விளைந்த மனித சமத்துவத்துக்கு எதிரான நிலைகளுக்கு ஏதுவான விதிமுறைகளும் அரசமைப்புச் சட்டத்தில் இடம் பெற்றுள்ளன.

அரசமைப்புச் சட்டத்தில் ஜாதியினை வலியுறுத்தும் விதிமுறைகள் நீக்கப்பட வேண்டும் என 1957-இல் தந்தை பெரியார், அரசமைப்புச் சட்ட எரிப்புப் போராட் டத்தினை நடத்தினார். 3000க்கும் மேற்பட்டோர் சிறை புகுந்தனர். மேலும் ஒரே மதத்திற்குள்ளே ஏற்றத் தாழ்வு, தொட்டால் தீட்டு, என்று, தாம் விரும்புகின்ற கடவுளைக் கூட பூஜை செய்யும் பணி ஒரு ஜாதியினருக்கு மட்டுமே உள்ளது. இதனை எதிர்த்து அனைத்து ஜாதியினரும் கோயில்களில் அர்ச்சகராக நியமிக்கப்பட வேண்டும் என பெரியார் தொடங்கிய போராட்டம் பெரியார் நிறுவிய பகுத்தறிவு சுயமரியாதை இயக்கமாகிய திராவிடர் கழகத்தின் இன்றைய தலைவர் ஆசிரியர் கி. வீரமணி தலைமையில் இன்றும் நடைபெற்று வருகிறது. தமிழ்நாட்டில் இதற்கென தனிச் சட்டம் இயற்றப்பட்டாலும் இன்னும் நடைமுறைக்கு வரவில்லை.

கேரள அரசு அனைத்து ஜாதியினரும் அர்ச்சகராகும் ஆணையினை கொண்டு வந்து நடைமுறைப்படுத்தி யுள்ளது. அரசமைப்புச் சட்டத்தில்  மத உணர்வுகளை போற்றிப் பாதுகாக்கின்ற விதிமுறைகள் பலவீனப்படுத்தப் பட வேண்டும். இறுதியில் முறையாக நீக்கம் பெற வேண்டும். மதச் சார்பின்மைக்கு வலு சேர்க்கும் விதி முறைகள் கூடுதலாக சேர்க்கப்பட வேண்டும். வெறும் விதிமுறையாக எழுத்தில் மட்டுமல்லாமல் நடைமுறை யிலும் ஆக்கம் பெறுகின்ற வகையில் ஆட்சியாளர்களை நடத்திடும் பணி பகுத்தறிவாளருக்கு உள்ளது.  அறிவியல் மனப்பான்மை எதனையும் கேள்விக்கு உள்ளாக்கி உண்மையினை அறிந்து கொள்வது குடிமக்களின் அடிப்படைக் கடமையாக அரசமைப்புச் சட்டம் வலியுறுத்துகிறது. அரசமைப்புச் சட்டத்தின் மீது உறுதி கூறி பதவி ஏற்றுள்ள ஆட்சியாளர்கள் அடிப் படைக் கடமைகளுக்குப் புறம்பாக வெறும் புராணச் செய்தி களையும் அறிவியல் ஆதாரம் அற்ற செய்தி களையும் அறிவியல் தொழில் நுட்பச் செய்திகளாக கூறி வருகின்றனர். ஆளும் பிஜேபி அரசின் பிரதமர் தொடங்கி மத்திய மனித வள மேம்பாட்டுத் துறை அமைச்சர் மற்றும் மாநில முதலமைச்சர்கள் எனப் பலரும் முக்கிய நிகழ்ச்சிகளில், அறிவியல் மாநாட்டில் ஆதாரம் ஏதுமின்றி, போகிற போக்கில் புராணச் செய்திகளை அறிவியல் தொழில் நுட்பத்துடன் தொடர்பு படுத்தி கருத்தினைக் கூறி வருகின்றனர்; அரசமைப்புச் சட்ட விதிகளுக்குப் புறம்பாக நடந்து வருகின்றனர். சட்டத்தைக் காப்பாற்றும் பொறுப்பில் உள்ளவர்கள் சட்டத்திற்குப் புறம்பாக நடந்துகொள்ளுவது பகுத்தறி வாளர்களுக்கு ஒரு பெரிய அறைகூவலாக இருக்கிறது. இதனை எதிர்த்துப் பிரச்சாரம் செய்திடும் பகுத்தறி வாளர்கள் தொடர்ந்து கொலை செய்யப்படு கிறார்கள். 2013-இல் தொடங்கி டாக்டர் நரேந்திர தபோல்கர், தோழர் கோவிந்த் பன்சாரே, பேராசிரியர் எம்.எம். கல்புர்கி மற்றும் இதழியல் மனித உரிமை ஆர்வலர் கவுரி லங்கேஷ் ஆகியோர் ஒரேவிதமான முறையில் கொலை செய்யப்பட்டுள்ளனர். ஆண்டுகள் பல கடந்தும் இன்னும் கொலையாளிகள் கண்டுபிடிக்கப் பட்டு தண்டனை வழங்கப்படவில்லை என்பதே ஆட்சியின் சட்டம் ஒழுங்கு எந்த நிலையில் உள்ளது என்பதுவும்  கொலை செய்த மத ஆதிக்கவாதிகள் இன்னும் சட் டத்தின் பிடியில் சிக்காததுவும் மதச் சார்பற்ற இந்தியாவை கேள்விக்குள்ளாக்கியுள்ளது. மேலும் பல பகுத்தறிவா ளர்கள் - மனித நேயர்கள் மதவெறியர்களின் கோரப் பசிக்கு இரையாகலாம். இவ்வளவு இன்னல் களையும் எதிர்த்துதான் பகுத்தறிவாளர்கள் போராட வேண்டி யுள்ளது; எதிர் வன்முறை தவிர்த்து பிரச்சாரம் செய்திட வேண்டியுள்ளது. தொடர்ந்து பகுத்தறிவாளர்கள் செய் திடும் பிரச்சாரத்தின் மூலம்தான் பொது மக்களிடம் விழிப்புணர்ச்சியினை ஏற்படுத்திட முடியும். அறிவியல் மனப்பான்மையினை அவர்களிடம் உருவாக்கிட முடியும். அறிவியல் அல்லாதவற்றை, அறிவியலுக்கு புறம்பானவற்றை பகுத்து, தவறாக வழி மாற்றிடும் ஆட்சியாளர்களை அடையாளம் காண முடியும். இதுவே மதச் சார்பற்ற இந்திய நாட்டில் பகுத்தறிவாளர்கள் நேர் கொண்டுள்ள அறைகூவல்கள்; ஆற்றிட வேண்டிய கடமைகள். இது நீண்ட நெடிய பணி - பயணமாகும். ஆனால் மானுடத்திற்கு நிலையான பயனை அளித்திட வல்லதாகும். அத்தகைய பயணத்தை பகுத்தறிவாளர் களாகிய நாம் மேலும் உறுதிபூண்டு வலிமையாக தொடர்ந்து நடத்துவோம்! இவ்வாறு வீ. குமரேசன் தமதுரையில் குறிப்பிட்டார்.

பகுத்தறிவாளர் பேராசிரியர் நரேந்திர நாயக் அவர்களுக்கு விருது வழங்கல்


கடந்த ஆறு ஆண்டுகளாக "சார்வாகம்" நிகழ்வு நடத்தப்பட்டு வந்தாலும், நடப்பு ஆண்டு (2018) முதல் "சுதந்திர சிந்தனையாளர் விருது" வழங்கிட யுக்திவாத பாடனகேந்திரம் முடிவெடுத்தது. "சார்வாகம் 2018" நிகழ்ச்சியில் முதன் முறையாக சுதந்திர சிந்தனையாளர் விருது (Free Thought Award) வழங்கப்பட்டது. அனைத் திந்திய பகுத்தறிவாளர் சங்கக் கூட்டமைப்பின் தலைவர் பேராசிரியர் நரேந்திர நாயக் அவர்களுக்கு விருது வழங் கப்பட்டது. விருதுக் கேடயம், விருது மடல் ஆகியவற் றுடன் விருது பண முடிப்பாக ரூபாய் பத்தாயிரத்தை யுக்திவாத பாடனகேந்திர அமைப்பினர் வழங்கினர்.

"சார்வாகம் 2018" இதர நிகழ்ச்சிகள்


முதல் நாள் முற்பகல் நடந்த நிகழ்ச்சியில் கவிஞர் குரீபுழா சிறீகுமார் தொடக்கவுரை ஆற்றினார். பின்னர் இந்திய கம்யூனிஸ்ட் ஆட்சியின் தேசிய செயலாளர் பினாய் விஸ்வம் சிறப்புரை வழங்கினார். அடுத்து "உண்மையின் மணம்" (Fragrance of Truth) எனும் தலைப்பில் பேராசிரியர் சி. ரவிச்சந்திரன் கணினி படங்கள் மூலம் விளக்கம் அளித்து உரையாற்றினார்.

மாலையில் கணினி தொழில் நுட்பத்துடன் கூடிய ஆடல், பாடல் நிகழ்ச்சிகள் நடைபெற்றன. சிறார்கள் மகளிர் மிகவும் ஆர்வமுடன் பங்கேற்றனர். கலை நிகழ்ச் சிகள், பார்த்தோர் மனம் கொள்வதாக சிறப்புடன் நடந்தன.

இரண்டாம் நாள் நிகழ்ச்சியில் ஒரு கிரேக்கப் புராணம் (A Greek Myprology) எனும் தலைப்பில் தொழில் நிறுவன உரிமையாளர் ஜோர்டி ஜார்ஜ், 'மதம் சார்ந்த சமூகத்தில் மகளிருக்கு சுதந்திர சிந்தனை சாத்தியமா? (Is Free Thought Possible for Women in Religion Society) எனும் தலைப்பில் கல்வியாளர் அஜா சூசன் ஜார்ஜ் மற்றும் "குடியரசு மற்றும் மக்களாட்சி; இந்தியாவின் ஏக்கங்கள்" (Republic and Democracy Longing India) எனும் தலைப்பில் டாக்டர் அருண்குமார் அவர்களும் சிறப்புரை ஆற்றினர்.

பிற்பகல் 'பயம் பற்றிய உள்ளுணர்வுகள்' (Chemistry of Fear) எனும் தலைப்பில் உளவியலாளர் இ. பிரியதர்சினி, 'ஹேராம் (Heyram) எனும் தலைப்பில் மனுஜா மைத்ரி, 'ஆட்டம் முடிக்கப்பட்டது. (Innings Declared) எனும் தலைப்பில் டாக்டர் பி.எஸ். ஜினேஷ் மற்றும் "நான் நேர்கொண்ட கேள்விகள்"(Questions I Faced) எனும் தலைப்பில் இ.பி. ஜாபர் உரையாற்றினர்.

"சார்வாகம் 2018" நிகழ்வுகள் இரண்டு நாள்கள் சிறப்பாக நடந்தேறின. யுக்திவாத பாடனகேந்திரத்தின் பொறுப்பாளர்கள் ஜார்ஜ், கோபக்குமார் மற்றும் ஆர்வ லர்கள் மிகவும் சிறப்பாக ஏற்பாடு செய்திருந்தனர்.

- விடுதலை நாளேடு, 16.5.18

ஞாயிறு, 8 ஏப்ரல், 2018

உலக நாத்திகர் மாநாட்டுப் பிரகடனம்!

நீதி, சமத்துவம், அறிவியல், மனிதநேயம் மற்றும் பகுத்தறிவு ஆகியவற்றுக்காக நம்முடைய குரல் உலகெங்கும் ஒலிக்கும்!"
உலக நாத்திகர் மாநாட்டுப் பிரகடனம்!
திருச்சி, ஜன.9 திருச்சி பெரியார் நூற்றாண்டு கல்வி வளாகம், தஞ்சை - வல்லம் பெரியார் மணியம்மை அறிவியல் மற்றும் தொழில் நுட்ப நிறுவன நிகர் நிலை பல்கலைக்கழகம், சிறுகனூர் பெரியார் உலகம்,  திருச்சி பெரியார் மாளிகை ஆகிய இடங்களில் உலக நாத்திகர் மாநாடு ஜனவரி 5,6 & 7 ஆகிய மூன்று நாள்களில் மிகவும் எழுச்சியுடன் திராவிடர்  கழகத் தலைவர் தமிழர் தலைவர் ஆசிரியர் கி.வீரமணி அவர்கள் தலைமையில் நடைபெற்றது. மாநாட்டில் பன்னாட்டு அறிஞர் பெருமக்கள் கலந்துகொண்டு கருத்தரங்க உரை, ஆய்வுரைகளை வழங்கினார்கள். மாநாட்டின் நிறைவு நாளில் உலக நாத்திகர் மாநாட்டுப் பிரகடனம் அறிவிக்கப்பட்டது. அதன் விவரம் வருமாறு:
திராவிடர் கழகம், விஜயவாடா -  நாத்திகர் மய்யம் மற்றும் பகுத்தறிவாளர் கழகம் ஆகியோர் இணைந்து திருச்சியில் 2018 ஜனவரி 5,6 & 7 நாள்களில் நடத்திய உலக நாத்திகர் மாநாட்டில், நாத்திகர், மனிதநேயர், பகுத்தறிவாளர் சுதந்திர சிந்தனையாளர்கள் மற்றும் ஒத்த கருத்துடையோர் ஆகிய நாங்கள் பிரகடனப்படுத்தி உறுதி கூறுகிறோம்.
சிறார்களும் இளைஞர்களும்தான் உலக மக்களில் பெரும்பான்மையினராக இருக்கின்றனர். அவர்களிடம் நிலவும் தளைகளான அறியாமை, கல்வியறிவின்மை, மூடநம்பிக்கையொட்டிய பழக்கங்கள் ஆகியவைகளிட மிருந்து அவர்களை விடுதலை செய்திட வேண்டும். திறனாய்தல் மற்றும் தடையற்ற கேட்டறிதல் ஆகியவற்றை அவர்களுக்குப் புகட்டிட வேண்டும். இதனால் அறிவியல் மனப்பான்மை அவர்களிடம் பெருகி, பகுத்தறிவு மற்றும் நன்னெறி சார்ந்து வாழ்ந்திட வழி ஏற்படும்.
நாத்திகர், மனிதநேயர் மற்றும் பகுத்தறிவாளர் ஆகியோருக்கு எதிரான சகிப்புத் தன்மையின்மை, கொடுமைகள், வன்முறைகள் அதிகரித்து வருகின்றன.
மதவாத அடிப்படையாளர்களின் நடவடிக்கைகளால் இளைஞர்கள், தீவிரவாதத்திற்குப் பலியாகிக் கொண்டு வருகிறார்கள்.
மூடநம்பிக்கைப் பழக்க வழக்கங்களாலும் மோசடி செய்திடும் சாமியார்களாலும், குழந்தைகளின், பெண்களின், ஒட்டு மொத்த சமுதாயத்தினரின் நலமும் நல்வாழ்வும் பாதிக்கப்படுகின்றன.
பெண்கள், குழந்தைகள் மற்றும் ஒரின, ஈரின, பால் மாற்றின மக்கள் அனைவரும் சம உரிமை படைத்தவர்கள்;  பாகுபடுத்தி வேறுபடுத்தும் விலங்கிலிருந்து விடுபட வேண்டியவர்கள். அவர்களுடைய சமத்துவத்திற்கும் சம உரிமைக்கும் பாடுபடுவோம்!
மதச்சார்பின்மை மற்றும் தளையற்ற சிந்தனையினை வளர்த்தெடுப்போம்!
சமுதாயத்தில் விளிம்பு நிலையில் உள்ள மக்களுக்கு, பெண்களுக்கு எதிராக ஏவப்படும் அனைத்துவித கொடுமை களையும் அறவே நீக்கிடுவோம்!
அனைவரையும் போலவே, நாத்திகர்களும், மனிதநேயர்களும், பகுத்தறிவாளர்களும் தளையற்ற சிந்தனையாளர்களும் சம உரிமை படைத்தவர்கள் என்பதை உறுதி செய்து, அதனை, ஆளும் அரசினர்தம் கருத்திற்கு, கவனத்திற்கு கொண்டு செல்ல  உரியன செய்வோம்!
மதத்தையும், அரசையும் பிரித்துப் பார்த்தல், மதத்தையும் அரசியலையும் பிரித்தல், மதத்தையும் கல்வியையும் மற்றும் மதத்தையும் அரசாட்சியையும் பிரித்துப் பார்க்கும் கருத்துக் கண்ணோட்டத்தை வளர்த்தெடுப்போம்!
கல்வி புகட்டுவதிலும் இளைஞர்களிடையே பகுத்தறிவுச் சிந்தனையை வளர்ப்பதிலும், அரசினர் முக்கிய பங்கு ஆற்றிட வேண்டுகிறோம்.
நாத்திகம், மனிதநேயம் ஒரு வாழ்க்கை முறை என்னும் கருத்தோட்டத்துடன், திறனாய்வு, அறிவியல் மனப்பான்மை, உய்த்து அறியும் கேள்வி உணர்வுகளை வளர்த்திடுவோம்!
அனைத்து மனிதர்களுக்குமான கண்ணியத்தினை சுயமரியாதையினை உயர்த்திப் பிடிப்போம்!
நன்னெறி என்பது ஒரு சமூக அவசியம், அதன்மீது மத முக்கியத்துவம் ஏதும் இல்லை என்பதை உறுதிப் படுத்துவோம்!
உலகெங்கிலும் உள்ள தெய்வ நிந்தனைச் சட்டங்களை நீக்கிட உரத்தக் குரல் கொடுப்போம்!
'தீண்டாமை' கொடுமையினை உள்ளடக்கிய ஜாதி முறையினை, இந்திய அரசமைப்புச் சட்டத்திலிருந்து நீக்கிட வேண்டுகிறோம்!
பகுத்தறிவு சார்ந்த ஒப்புரவு சமூகத்தை உருவாக்கிட  அனைத்து நாத்திகர்கள், மனிதநேயர்கள், சீர்திருத்தவாதிகள் எடுக்கும் முயற்சிகளை செயல்களைப் போற்றுவோம்!
2018 ஜனவரி 7 ஆம் நாளான இன்று  நீதி, சமத்துவம், மனிதநேயம், அறிவியல் மனப்பான்மை, பகுத்தறிவு மற்றும்  கேள்வி கேட்டிடும் உரிமைகளின் - உணர்வு எழுச்சிக் குரலே இந்தப் பிரகடனம் என்று உலகுக்கு அறிவிக்கிறோம்.
- உலக நாத்திகர் மாநாட்டுப் பேராளர்கள்
இவ்வாறு உலக நாத்திகர் மாநாட்டில் பிரகடனம் அறிவிக்கப்பட்டது. உலக நாத்திகர் மாநாட்டில் பங்கேற்ற அனைவரும் உணர்ச்சி மிகுதியுடன் பிரகடனத்தை ஆதரித்து பலத்த கரவொலி எழுப்பி வரவேற்றார்கள்.
இந்தப் பிரகடனத்தை மாநாட்டு வரவேற்பு குழு சார்பில் திராவிடர் கழகப் பொதுச் செயலாளர் வீ. அன்புராஜ் முன்மொழிய, மாநாட்டில் பங்கேற்ற அனைவரும் எழுந்து நின்று பெரும் கரஒலி எழுப்பி வரவேற்றனர்.
(பிரகடனத்தின் ஆங்கில வாசகங்கள் 3ஆம் பக்கம் காண்க)
-விடுதலை நாளேடு, 9.1.18

புதன், 4 ஏப்ரல், 2018

புரட்சியாளர் Dr.B.R.அம்பேத்கரின் 22 உறுதிமொழிகள்:-

Dr.B.R.அம்பேத்கர்,அவர்கள் அக்டோபர் 15, 1956 அன்று நாக்பூரில் பௌத்த சமயத்தைத் தழுவியபோது ஏற்றுக்கொண்ட 22 உறுதிமொழிகள்.

01. பிரம்மா, விஷ்ணு, சிவன் மூன்றையும் கடவுளாகக் கருதி வணங்கமாட்டேன்.

02. ராமன், கிருஷ்ணன் இரண்டும் இறைவனின் அவதாரமென எண்ணி வணங்கமாட்டேன்.

03. கணபதி, 'கௌரி' மற்றும் இந்து தேவதைகளை தெய்வங்களாக ஏற்று வணங்கமாட்டேன்.

04. கடவுள் பிறந்ததாகவோ, அவதாரம் எடுத்ததாகவோ நம்ப மாட்டேன்.

05. மகாவிஷ்ணுவின் அவதாரம்தான் புத்தர் என்ற விஷமத்தனமான பிரசாரத்தை எதிர்த்து முறியடிப்பேன்.

06. இறப்பு நிகழ்ச்சியில் இந்துமதச் சடங்குகளை செய்யமாட்டேன்.

07. புத்தரின் போதனைகளையும் நெறிகளையும் மீறமாட்டேன்.

08. பார்ப்பனர்களின் எந்தவொரு ஆச்சாரச் செயலையும் அனுமதிக்க மாட்டேன்.

09. மானுட சமத்துவத்தை நம்புவேன்.

10. சமுத்துவத்தை நிலைநிறுத்த முழுமூச்சாக பாடுபடுவேன்.

11. புத்தரின் எட்டு வழிநெறிகளை நம்பிக்கையோடு பின்பற்றுவேன்.

12. புத்தரின் பத்து தம்ம போதனைகளை ஏற்று செயல்படுவேன்

13. எல்லா உயிர்களிடத்தும் இரக்கம் காட்டி, பாதுகாத்து, வாழவைப்பேன்.

14. பொய் பேச மாட்டேன்.

15. களவு செய்ய மாட்டேன்.

16. உடல் இன்பத்துக்காகத் தவறுகள் இழைக்கமாட்டேன்.

17. மது அருந்த மாட்டேன்.

18. புத்தரின் அன்பு, அறிவு, பரிவு ஆகிய உயரிய நெறிகளின் அடிப்படையில் என் வாழ்க்கையை அமைத்துக்கொள்ள முயற்சி செய்வேன்.

19. மனித நேயத்துக்கு முரணான, சமுத்துவம் இல்லாத கேடுகெட்ட இந்து மதத்தை விட்டொழித்து, இன்றுமுதல் மேன்மைமிகு பௌத்தத்தை தழுவிக்ககொள்கிறேன்.

20. புத்தரும் அவர் தம்மமும் உண்மையான மார்க்கம் என்று உறுதியாக ஏற்கிறேன்.

21. இன்று மறுவாழ்வு பெற்றதாக நம்புகிறேன்.

22. புத்தரின் கொள்கை கோட்பாட்டுக்கு ஏற்ப இன்று முதல் செயல்படுவேன்.

புதன், 28 மார்ச், 2018

பகுத்தறிவாளர் கழகம், பகுத்தறிவு ஆசிரியரணி, பகுத்தறிவு எழுத்தாளர் மன்றத்திற்கு புதிய பொறுப்பாளர்கள்: தமிழர் தலைவர் அறிவிப்பு

சென்னை, மார்ச் 28 25.3.2018 அன்று சென்னை - பெரியார் திடலில் பகுத் தறிவாளர் கழகம், பகுத்தறிவு ஆசிரியரணி, பகுத்தறிவு எழுத்தாளர் மன்ற பொறுப்பாளர்களின் மாநில கலந்துரையாடல் கூட்டம் புரவலர் தமிழர் தலைவர் ஆசிரியர் கி.வீரமணி அவர்களின் தலைமையில் நடைபெற்றது. அக்கலந்துரையாடல் கூட்டத்தில் புதிய பொறுப்பாளர்களை தமிழர் தலைவர் ஆசிரியர் கி.வீரமணி அறிவித்தார்.

கலந்துரையாடல் கூட்டத்தில் உரையாற்றியோர்

தாம்பரம் மாவட்ட தலைவர் அ.தா.சண்முகசுந்தரம், தென்சென்னை மாவட்ட தலைவர் எஸ்.அருள்செல்வன், பட்டுக்கோட்டை மாவட்ட தலைவர் தங்க.வீரமணி, திருவாரூர் மாவட்ட தலைவர் எஸ்.கரிகாலன், கடலூர் இரா.தமிழன்பன், புதுச்சேரி நெ.நடராசன், மேட்டூர் பகுத்தறிவு ஆசிரியரணி தலைவர் புள்ளை.வீரமணி, தஞ்சை கோபு.பழனிவேல், காரைக்குடி மாவட்ட அமைப்பாளர் பேராசிரியர் மு.சு.கண்மணி, தர்மபுரி தலைவர் கதிர்.செந்தில்குமார், செயலாளர் மாரி.கருணாநிதி, மேட்டுப்பாளையம் தலைவர் டி.வீரமணி, கும்மிடிப்பூண்டி மாவட்ட தலைவர் டி.இருதயராஜ், லால்குடி மாவட்ட செயலாளர் ஜி.பாலசுப்பிரமணியன், பழனி மாவட்ட தலைவர் திராவிடச்செல்வன், ஆத்தூர் மாவட்ட செயலாளர் முருகானந்தம், ஆவடி பகுத்தறிவு ஆசிரியரணி அமைப்பாளர் எழிலரசி, திருப்பத்தூர் ஆசிரியரணி சார்பில் இரா.பழனி, மயிலாடுதுறை தலைவர் ஞான.வள்ளுவன், வடசென்னை தலைவர் கோவி.கோபால், குடியாத்தம் செந்தமிழ்ச்செல்வன்,  திருச்சி மாவட்ட செயலாளர் மலர்மன்னன், புதுச்சேரி தலைவர் கு.ரஞ்சித்குமார், பகுத்தறிவாளர் கழக துணைத் தலைவர்கள் அண்ணா.சரவணன், கே.டி.சி.குருசாமி, கோ.ஒளிவண்ணன், அமைப்புச் செயலாளர் இரா.தமிழ்ச் செல்வன், பொருளாளர் சி.தமிழ்ச்செல்வன், பகுத்தறிவு ஆசிரியரணி அமைப்பாளர் சி.ரமேசு, ப.க.பொதுச் செய லாளர் மா.அழகிரிசாமி, பகுத்தறிவாளர் கழக செயல் தலைவர் ஜெ.தமிழ்ச்செல்வி, பகுத்தறிவாளர் கழக தலைவர் வா.நேரு, மாணவரணி மாநில செயலாளர் பிரின்சு என்னாரெசு பெரியார், திராவிடர் கழக வெளி யுறவு செயலாளர் வீ.குமரேசன், திராவிடர் கழக பொதுச் செயலாளர் இரா.ஜெயக்குமார், திராவிடர் கழகத்துணை தலைவர் கலி.பூங்குன்றன், நிறைவாக பகுத்தறிவாளர் கழக புரவலர் தமிழர் தலைவர் வழிகாட்டுதல் உரையாற் றினார்கள்.

கூட்டத்தில் மாடர்ன் ரேசனலிஸ்ட் இதழுக்கு சந்தா வழங்கியவர்கள்: மேட்டுப்பாளையம் மாவட்ட தலைவர் டி.வீரமணி, மேட்டூர் மாவட்ட தலைவர் கோவி.அன்புமதி, பொருளாளர் சி.தமிழ்ச்செல்வன், திருப்பத்தூர் மாவட்டம் சார்பில் ஆசிரியரணி மாவட்ட தலைவர் இரா.பழனி, அண்ணா.சரவணன், மாடர்ன்ரேசனலிஸ்ட் சந்தா இது வரை 100 சந்தாக்களை வழங்கி இலக்கினைஅடைந்தது மேட்டுப்பாளையம் மாவட்டம். காரைக்குடி மாவட்டம் 75 சந்தா வழங்கியுள்ளது. மாவட்ட தலைவர் அ.சிவக்குமார் நன்றி கூறினார்.

பகுத்தறிவாளர் கழகம் - புதிய மாவட்ட பொறுப்பாளர்கள்

தென் சென்னை மாவட்டம்

எம்.ஆர்.மாணிக்கம் - தலைவர், இளம் பெரியார் - துணைத்தலைவர், ராஜராஜன் - மாவட்ட செயலாளர், தமிழரசன் - துணைச் செயலாளர், செல்வக்குமார் - பொருளாளர்

வேலூர் மாவட்டம்

இர.அன்பரசன் - தலைவர், க.அருள்மொழி - செய லாளர், பெல் தங்கராசு - அமைப்பாளர்

தஞ்சாவூர் மாவட்டம்

ந.காமராசு - தலைவர், ச.அழகிரி - செயலாளர், பொ.ராஜீ - அமைப்பாளர்

ஆத்தூர் மாவட்டம்

வ.முருகானந்தம் - தலைவர், அறிவுச் செல்வன்-  செயலாளர்

மாநில கலந்துரையாடல் கூட்டத்தில் அறிவிக்கப்பட்ட புதிய பொறுப்பாளர்கள்

பகுத்தறிவு எழுத்தாளர் மன்றம்: மாநிலத் தலைவர் - வா.நேரு, மதுரை, மாநில துணைத் தலைவர் - கோ.ஒளிவண்ணன்

திராவிடர் கழக மகளிரணி மாநில அமைப்பாளர் - தகடூர் ஜெ.தமிழ்செல்வி

பகுத்தறிவாளர் கழகம்: மாநிலத் தலைவர் - மா.அழகிரிசாமி, (தஞ்சாவூர்), பொதுச்செயலாளர் - இரா.தமிழ்ச்செல்வன், பொருளாளர் - சி.தமிழ்ச்செல்வன்

பகுத்தறிவு ஆசிரியரணி

பள்ளிகள்: மாநில அமைப்பாளர்கள் - சி.ரமேசு (நீடாமங்கலம்), வா.தமிழ்பிரபாகரன் (ஆத்தூர்)

ஆசிரியர் பயிற்சிக் கல்லூரிகள் அமைப்பாளர் - இரா.கலைச்செல்வன், திருச்சி

பல்கலைக்கழகம், கல்லூரிகள்: மாநில அமைப்பாளர் - எஸ்.அருள்செல்வன் (சென்னை)

தருமபுரி மாவட்ட பகுத்தறிவு ஆசிரியரணி

தலைவர் - ஆசிரியர் இரா.கிருட்டிணமூர்த்தி, துணைத் தலைவர் - கே.ஆர்.குமார், செயலாளர் - ஆசிரியர் தீ.சிவாஜி, அமைப்பாளர்: மு.பிரபாகரன்

பகுத்தறிவாளர் கழக மாநிலத்துணைத் தலைவர்கள் மற்றும் ஒதுக்கப்பட்ட பொறுப்பு மாவட்டங்கள்

1. அ.தா.சண்முகசுந்தரம், தாம்பரம்

மாநில துணைத் தலைவர் (தாம்பரம், அரக்கோணம், காஞ்சிபுரம், தென் சென்னை) 2. அண்ணா .சரவணன், மத்தூர்

மாநில துணைத் தலைவர் (வேலூர், திருவண்ணாமலை, செய்யாறு, திருப்பத்தூர், கிருட்டிணகிரி, தருமபுரி, சேலம், மேட்டூர், ஆத்தூர்)

3. த.வீரமணி, மேட்டுப்பாளையம்

மாநில துணைத் தலைவர் (ஈரோடு, கோபி, திருப்பூர், தாராபுரம், கோவை, நீலமலை, மேட்டுப்பாளையம்)

4. மு.நடராஜன், புதுச்சேரி

மாநில துணைத் தலைவர் (புதுச்சேரி, காரைக்கால், விழுப்புரம், திண்டிவனம், கல்லக்குறிச்சி, விருதாச்சலம், கடலூர், சிதம்பரம்)

5. ச. மணிவண்ணன், துறையூர் மாநில துணைத் தலைவர் (திருச்சி, லால்குடி, கரூர், பெரம்பலூர், அரியலூர், நாமக்கல்)

6. கே.டி.சி. குருசாமி, ராயகிரி

மாநில துணைத் தலைவர் (குமரி, நெல்லை, தூத்துக்குடி, தென்காசி)

7. கா.நல்லதம்பி, விருதுநகர்

மாநில துணைத் தலைவர் (விருதுநகர், மதுரை, மதுரை புறநகர், தேனி, திண்டுக்கல், பழனி)

8. பேராசிரியர் மு.சு.கண்மணி, காரைக்குடி மாநில துணைத் தலைவர் (காரைக்குடி, சிவகங்கை, இராமநாதபுரம், அறந்தாங்கி, புதுக்கோட்டை)

9. கோபு.பழனிவேல், தஞ்சாவூர்

மாநில துணைத் தலைவர் (தஞ்சாவூர், கும்பகோணம், பட்டுக்கோட்டை, திருவாரூர், திருத்துறைப்பூண்டி, நாகை, மயிலாடுதுறை)

10. எம்.ஆறுமுகம், ஆவடி

மாநில துணைத் தலைவர் (கும்மிடிப்பூண்டி, வட சென்னை, ஆவடி, திருவள்ளூர்)

- விடுதலை நாளேடு, 28.3.18